《印度 · 尋油 · 台灣妹》: 《十七》

「你講真㗎？」我仲有啲疑惑咁問 


「呃你有獎抽吖？」花仔一句串埋嚟 


「又去番果度 …… 怕唔怕啊？」我有啲不祥嘅預感 


「怕條鐵咩，你依家又無穿無爛，咪生人唔生膽啦！」花仔一有女就咩都唔怕 






「咁好啦！」唔夠佢講，唯有投降 


仲有成半個鐘先起行，但係花仔強已經蓄勢待發，好似一隻叫春嘅雄獅咁，不停响我面前行嚟行去，屎忽生瘡，坐唔定，真係名副其實嘅未出發先興奮，頂佢唔順。 


我行咗去梳化度休息，喺褲袋攞咗部電話出嚟，一㩒，係一張偷拍嘅相，我尋晚襯 Priscilla 瞓著果時偷影嘅， 






我嘅小公主，唔知妳依家點呢？ 


望住部手機發夢，冷不防花仔個死佬偷襲，比佢一手搶走咗，跟住就講 


「阿文西哥，駛唔駛咁黐筋情長劍吖！」 






「攞番嚟啦，你唔明㗎喇！」對付花仔要直接 


「咁咪唔玩囉，牛郎，行喇！」收番埋部電話就一齊出發


「又話五點三，依家五點九都嚟喇，最撚憎啲唔守時嘅人 ……」花仔等到發晒肥四，係咁爆粗 


「可能塞車啫，等多陣就到㗎喇！」我坐咗响酒店門口咁講 


就係咁我同花仔戇居居等咗帶路果條友半粒鐘，坐响度又無嘢做，個腦好自然咁諗起 Priscilla，Priscilla 吖！正當我雲遊四海、漫遊太空之際，响遠處傳嚟一啲好強勁嘅音樂，我同花仔不其然望向山坡下面，見到一架黑色嘅私家車正駛緊上嚟，架車喺我地前面停低，落車嘅係一個三十零歲嘅男人，一身Nike風褸、佐敦波鞋、Levis牛仔褲嘅打扮，睇落好普通，但係印度男人大多都係著恤衫西褲黑皮鞋，咁著算係少有，佢見到我同花仔企咗喺度，就上前用廣東話同我地講 






「Sorry Sorry ~ 兩位老細，我係 Ankit，遲咗少少，要你地等咁耐，真係唔好意思！」 


「算喇，快啲起程！」花仔急不及待行咗上車 


「係嘅，老細！」講完就閃上司機位 


响車度，Ankit 好似開籠雀咁不停講野，最慘就係佢啲廣東話流利到不得了，就算你唔想聽都鑽入你耳仔度，加上崎嶇不平嘅路面，我真係差啲頂唔順想嘔吖，講到咁上下，我忍唔住問佢 


「Ankit，點解你啲廣東話咁正嘅？」 






「呢位老闆，其實係咁嘅，我响香港出世，住咗香港三十幾年，前年番嚟娶老婆，之後就留低响度做導遊。」Ankit 就話 


「其他野一陣先講，有啲咩好介紹？」花仔一早就等得唔耐煩 


「按摩吖！印度按摩出名，啲技師手勢好，好多客都話爽到不得了，保證你滿意！」Ankit 手舞足蹈咁講 


「真係？」花仔腦裏面產生一連串幻覺


「人頭擔保！！」Ankit 百分百肯定咁話 






「你預佢得喇！我麻麻！」我無嚟心情咁講 


「Ankit，唔駛理佢，係呢想問下印度係咪有得買印度神油？男人重振雄風果隻喎！」花仔開始向 Ankit 問神油一事 


「其實 …… 都有嘅，你地係咪要吖？我幫你地買，要幾多支？」Ankit 吞吞吐吐咁講 


「一支得喇！唔該！」我搶住答 


「收到，轉多兩個彎就到，你地去按摩，我就去買油！」Ankit 一路開車，一路講 






轉完彎，架車就停低咗，落車一睇，係一楝三層高嘅舊樓，抬頭一望，上面掛有兩個七彩斑斕嘅廣告牌，一、二樓應該係酒吧、餐廳之類，行前多少少，地下果層有一度玻璃門，隔離寫住啲印度文，完全唔知寫乜，Ankit 推門先入，即刻同櫃台職員打招呼，寒暄一輪，Ankit 就行番過嚟同我地講 


「兩位老細，咩都攪掂晒，我去做啲野，一陣番嚟接你地，玩得開心好啲！」佢講完之後，就閃人走咗，我就細細聲同花仔講 


「嗱，我陪你嚟齋揼㗎咋！」我再從新表明立場 


「知喇，知喇，辛苦你吖，聖人」花仔敷衍我咁話 


我啤一啤佢，但又無佢符，正仆街仔，之後個職員向我地揮揮手，我同花仔就跟佢入去呢個鬼異嘅領域 ……