《印度 · 尋油 · 台灣妹》: 《九》

公主 Priscilla 見到咁嘅情況，緊緊握住我隻手，我扮晒鎮定，仲 CHOK 咗下！花仔強首先開口 


「包皮環境，點睇？」 


「錢就無所謂，最怕唔止咁啫！」我同花仔膊貼膊咁講 


「以我地兩個 <牛頭角下邨跆拳道死仔>，四個都勉強可以，但係拖住兩件，就唔同講法！」 花仔話 






「十二碼，一係入，一係唔入，博唔博？」 我反問 


「屌！比你揀先！前面定後面？」花仔好禮讓咁講 


「是旦啦！都無乜分別！我前你後，衝咗出去先算啦！」 我地決定咗之後，就同旁邊位小公主講 






「不用怕，緊握我手，明白嗎？」 


只見 Priscilla 雙眼早已通紅，但仍然能夠點頭回覆。我同花仔互望一眼，深呼吸一下，之後就數 一、二、三 …… 


三字一出，我即時握實 Priscilla 隻手，就衝向一肥一矮度，一秒、兩秒、三秒，當距離只淨低一米左右，我腳下一沉，運勁，一招低角度側踢，隨即踢中肥仔下盤，得勢不饒人，再補一腳高角度側踢，"嘭" 一聲，肥仔應聲倒地，攪掂一件，正想扮型之際，個死矮仔竟然偷襲，提刀一劈，我本能反應一個上擋手 …… 






頂！ 


玩大咗添！嬲嬲地隨即一個直拳打落矮仔個鼻到，當場噴血，眼見兩人暫時失去戰鬥力，我就把握呢個時間，一野抱起 Priscilla，起勢咁跑，都唔理得咁多，見到前面有路就走！


九曲十三彎，度度都差唔多，腳下又濕又滑，兩把急速嘅喘氣聲，摸黑穿梭市集，一時轉左，一時走右，走吖走，連回頭偷望嘅時間都無，根本就唔知背後仲有無人追嚟，只想盡快行番出大路。 


頂班馬（我吖）負重磅（Priscilla 輕極都100磅喇），跑2400米大長途，原來係咁金㗎！ 


都唔知走咗幾耐，只係知道唔可以停落嚟，踏踏踏踏 …… 踏踏踏踏 …… 腳步聲、喘氣聲同心跳聲混合埋一齊，一個彎角之後，終於行番出人車爭路嘅大馬路。我依然抱住 Priscilla 無停下步伐，繼續橫衝直撞，响人群入面左穿右插，直至走入一間旅館嘅大堂先停。 






嗄嗄嗄嗄 …… 雖然我同 Priscilla 坐咗响梳化度，但仍然未能夠冷靜落嚟，依家回想起，其實頭先真係好鬼危險，自己就好似電影入面嘅男主角，抱住條女係咁跑，諗落又幾型，哈哈哈 …… 

Priscilla 見我响度傻笑，問我做乜事，我話無野，就問佢 


「妳有沒有受傷？」 


「沒有，不過剛剛真的很危險！」 Priscilla 驚魂未定咁講 


「這樣就好哪！」見佢無受傷我都放心啲 


即時攞部電話出嚟，諗住打比花仔，點知一睇，咩訊號都無嘅？仆街喇，我唔記得我同花仔都無漫遊添！ 






我問 Priscilla 可唔可以打個電話比 Heidi，見佢摸摸件民族服，跟住同我講 


「不見了！」Priscilla 好唔開心咁話 


正當我諗緊用咩方法聯絡花仔之際，突然間，我腦海湧現出一個更嚴重嘅問題 …… 


究竟我地尋晚住果間酒店叫咩名？