《印度 · 尋油 · 台灣妹》: 《七》

點知 Priscilla 見到緊張到不得了，不斷咁摸我個頭 （唔好心邪！） 


「你有沒有受傷呀？痛不痛呀？」 Priscilla 好擔心咁問 


呢一刻我彷如天使般喺天空中飛翔，飛吖飛，漫無目的咁飛 .......... 一個咁靚嘅台灣妹，一副擔心愛人受傷嘅樣，比著係你，咩傷都好番晒啦！ 


「我沒事！」 我飄飄然咁答 






佢見我無事，就放心啲，但隻手仍然不斷摸住我個頭，可能我個樣太冧，佢突然縮番隻手，塊面變到紅撲撲，仲不停講 


「對不起，對不起 …… 」 


好鬼死可愛吖！，其實我唔介意你繼續摸，當然我無講出口喇，之後大家都無再出聲，呢個咁尷尬嘅場面，都維持咗成分幾鐘，直至落車為止。 






花仔強架車比我地早到一步，佢同司機交代幾句後，今日嘅行程就正式開始，我地由較遠嘅蓮花形廣場起步，慢慢向阿克薩達姆神廟進發，花仔同 Heidi 唔知有心定無意，雞啄唔斷，好似一對熱戀中嘅情侶，四隻眼完全睇唔到我同 Priscilla 嘅存在，佢有佢地行，我地有我地跟，我見 Priscilla 有啲悶悶不樂，咪學下花仔，講下笑話，做個鬼臉，又幫佢影下靚相，都氹到佢開懷大笑，不知不覺就行到阿克薩達姆神廟前面嘅廣場。 


嘩 ～ 身處廣闊嘅廣場，遠望四周，呢度真係大得可怕，個人而言，壯觀程度可媲美北京紫禁城，走近阿克薩達姆神廟，就會深深比呢座印度教式建築物所吸引，鬼斧神工嘅技術，細緻嘅雕刻，非筆墨所能形容，令人一見難忘，唔怪之得咁多人遊客嚟睇。 


行完阿克薩達姆神廟已經下晏三點幾，坐二十分鐘車，就到咗附近嘅 Paharganj 市集，呢度比我第一個感覺就係 ～ 「亂」，點解咁講？因為呢個市集好大，四通八達，橫街小巷多不勝數，有啲似深圳嘅東門，但就落後好多，除咗人多之外，就係乜野都多，牛車、馬車、三輪車、單車 …… ，連野生嘅牛同大笨象都會响同一條街出現，你有無諗過行街會同時見到牛、馬同象㗎？唔係動物園喎，你話係咪真係千奇百趣！ 






遍地 "黃金" 同垃圾嘅 Paharganj，衛生環境一定唔好，但兩旁佈滿一間又一間嘅商舖，高高低低，頭頂上又掛滿大大小小嘅招牌，各有特色，完全淹蓋呢個缺點。Priscilla 同 Heidi 好似中咗降咁，入完呢間，就去果間，出出入入，入入出出，兩位過度 "活潑" 嘅公主响其中一間鋪頭試民族服飾，換完緊係想我地讚下喇，出嚟一睇， 


嘩 ～ 印度西施吖！！ 


我同花仔望到流晒口水，靚到咁，佢地衫都唔換就比錢走人，我地兩個男士唯有暫時充當阿四，跟隨主人遊歷。 


行下行下，聞到好濃烈嘅香草味，即時令我醒起有野要買 - 


「印度神油！」