《印度 · 尋油 · 台灣妹》: 《二》

「印度神油？？」 我有啲唔係好明咁問


「係啊！印度神油啊！星爺電影講嗰啲吖！上網見過有人話响新德里個市集有，原產地出肯定勁啲，幫我買支，但唔好咁揚！！」大鳥哥千叮萬囑咁話


其實到呢刻我仍然唔係好知佢想買乜，正想問清楚之際 ……


「咩啊？歧視我呀？咁小事都托手踭，用神油好撚出奇咩？你估你遲啲唔洗用，我唔理你，總之你同我攪撚掂佢！」佢講完之後，開門就走鬼咗去。






廁格之內，淨番滿腦子疑問嘅我，我心諗 "大佬啊！去旅行最憎就係要幫人買野，依家我係去旅行，唔係去團購啊！仲要講得唔清唔楚，究竟買乜啫？咩係《印度神油》先？我睇葉念琛啲戲大㗎，星爺啲戲我只係睇過 <功夫>、<長江七號> 同 <西遊> 咋，有鬼講過咩！都黐孖筋㗎！采佢都有味！"


失驚無神比老頂入咗嘢，重要唔知佢噏乜，都係費事理佢，開大要緊。


嗰日之後，我都無將呢件事放响心，直至出發當日，我一早起身梳洗完，正準備出門，突然 Whatsapp 收到個訊息，一望，原來係大鳥哥，打開一睇，寫住






"達仔，記得幫我買支神油吖！如果番到黎無，我唔擔保今次你個 "小菊花" 安全㗎！知無？呵呵 ……"


原本懷著開開心心嘅心情出門，睇完之後，火都黎埋，咩料啊，恐嚇呀？邊有人咁仆街㗎，乜野印度神油咁正閉啊？白花油唔好咩？仲有福仔，黐線㗎！正當我睇到忟忟地，大我一年嘅家姐啱啱起身，見我準備出門，就同我講


「細佬，咁早出門？去旅行記住小心啲，尤其係啲財物同證件，記住、記住唔好咁單純，咁易信人啊！」






「知喇，家姐，又唔係第一次，係呢 …… 有個問題想問下妳！」 我帶點疑惑咁講


「有咩咪問囉！兩姊弟 」


「想問妳知唔知咩叫 《印度神油》？」 我問


「印度神油？唔知啊！咩黎㗎？」 家姐竟然反問我


「我就係唔知先問妳！我老頂千叮萬囑叫我記住响印度買，神神化化咁，講啲又唔講啲，淨係話乜鬼星爺電影果啲！」我越講越迷惘






「好易啫，上網搵下咪知囉！」跟住家姐就用手機上雅虎，打 "周星馳電影印度神油"，即刻顯示一堆相關資料，隨便揀咗一段 "再和印度神油一起使用更是如虎添翼 谷德昭 食神 The GOD of Cookery "


一Click，有條四秒短片，片中所見肥谷企咗响星爺隔離，手舞足蹈，跟住講咗句 "加上印度神油一起用更是如虎添翼！"，最後兩人大笑一番！


「唓 ~ 原來煮餸用，洗唔洗咁緊張啊，仲以為係咩添！」我睇完之後就話


「唔緊要啦，幫到人咪幫囉，總之萬事小心，有咩就打比我！」 家姐講完之後，就伸一伸懶腰入咗廁所，而我亦起程去機場會合花仔強。