關於少女的故事: 16-願望

黃Sir：「今年邊個要做班長呀？男女班長各一個。」

全班默不作聲，仿佛無人想做班長。

黃Sir：「無人想做？咁我隨手指兩個人啦，劉曉晴，譚越其，就你地兩個啦。」

情侶檔做男女班長，真係好。

上完班主任堂，小息，突然有人係我後面抆走我條辮。





我擰轉頭，原來係鄭熙龍。我問：「做咩抆走我條辮喎？」

鄭熙龍：「玩下之嘛。原來你放頭髮落黎都幾靚架喎。」

我唔知好嬲定好笑：「……」

鄭熙龍：「俾返條橡筋你，我落去食野。」

劉曉晴見到之後，用手肘頂一頂我，再係我耳邊講：「個插班生都唔錯丫，你不如放棄陳汝州啦。」





我推開佢，再講：「痴線，我最憎人抆我條辮。」

劉曉晴：「我地都落去食野咯。」

我：「好呀。」

到後來，出左黎工作先發覺以前有小息既時候真係好正。

可惜一切已經返唔到轉頭，呢個就係青春既可恨之處：容易過，更容易錯過。







自從宇宙同左Tiffany一齊之後，我每逢家政堂，煮既野食都益哂肥輝。

而劉曉晴既野食唔駛講啦，當然係留俾譚越其啦。

仲記得有一次家政堂整蛋糕，我俾左舊蛋糕肥輝食。

然後肥輝話：「如果娶著你真係好，唔驚無啖好食。」

我：「多謝喎。」我受寵若驚。

某一日，上上下數學堂，大家專心一志既時候。

「Lin！！！！！！」火警鐘突然響起，似乎係火警演習。





由於太多人同一時間落去操場，前梯同後梯都塞滿哂人。

我同劉曉晴、譚越其、于夏君、李永輝、杜學禮佢地一齊行。

劉曉晴：「好野，唔駛上堂lu。」

我：「直落小息，正。」

落到操場，全校同學一齊點完名，報齊人，訓導老師講野講左幾分鐘就解散，放小息。

有時候，真係想一把火燒左自己間學校。只不過係發夢既時候。







十月十三日，係劉曉晴既生日。

我準備左一張生日卡，一底蛋糕同一隻Melody公仔，諗住送俾佢。

我張卡寫住：Dear 劉曉晴

首先，祝你生日快樂，雖然同你只係識左一年多D，但係個感覺就好似同你識左好耐咁。多謝你一直幫我追宇宙，雖然我仲未追到佢，但係都希望譚越其同你能夠永遠幸福落去。十三歲生日快樂！

By 黃寶靈

果陣時好興Melody，而劉曉晴亦鍾意。所以我用左200蚊買左隻手抱咁大既Melody公仔。

200蚊對中學生黎講話少唔少，係我蓄左兩個月零用錢得黎既。

可見我有幾重視劉曉晴呢個朋友。





而其他人，好似于夏君、宇宙、李永輝既生日，我都只係寫左張生日卡俾佢地就算。無整蛋糕又買禮物咁大陣象。

十月十三日放學，我地拉左劉曉晴去有蓋操場，吹蠟燭切蛋糕。

我、譚越其、于夏君、李永輝、杜學禮：「劉曉晴，生日快樂！」

蠟燭吹熄，唔知道你許左個咩願望呢？