關於少女的故事: 14-一巴掌

我：「其實我無乜興趣知。」

譚越其：「乜你咁架，做我女朋友係咁既咩？」

我：「我只係睇在劉曉晴既幸福份上，先會陪你架咋。」

譚越其：「可唔可以做得好D？唔係既話，我唔收貨架。」

我沒好氣地說：「你話點就點好啦。」





譚越其：「咁我地拖住手咁行啦。」

我：「哦。」

行到餓，跟住求其搵左間餐廳食野啦。

一坐低，竟然撞到兩個人，坐正隔離枱：宇宙同Tiffany。

呢個世界真係細，咁都撞到。





霎時之間，我都唔知俾咩反應好，只有即刻fing甩譚越其隻手。

譚越其見到佢地，就主動say左句：「Hi！」

宇宙：「乜咁岩呀？」

譚越其指住我：「佢囉，佢話要去遠D既地區拍拖喎。」

我慌忙解釋道：「唔係呀，我同佢無野嫁，佢想我陪佢行街咋嘛。」





譚越其：「咁你地呢？做咩咁遠黎到觀塘？」



宇宙：「我陪Tiffany探佢婆婆呀，跟住順便行街食飯囉。」

譚越其：「哦，佢婆婆住係觀塘？」

宇宙：「係呀。」

跟住我地Dead Air左好耐，雙方都好腼腆，唯有等佢地食完走先。

食完埋單，譚越其話要請我，我話AA制，佢都唔制，死都話要請我。

好啦咁，佢俾完錢，我地就繼續行。





行行下，佢無啦啦Kiss我塊臉，嚇死我！

我本能地縮開，然後打左譚越其一巴掌。

「啪！」我右手大大力打左佢左臉一巴。

譚越其：「Sorry呀，我實在係……忍唔住。」

我用手抹一抹臉，再講：「無下次呀。」

唔知係咪因為譚越其既一吻破壞哂原本既節奏，我地一路上只有尷尬，無乜點講野。

譚越其：「我送你返屋企？」





我：「唔駛啦，拜拜。」

就係咁，我做佢一日既女朋友呢件事已經完左。



返到屋企之後，我打左電話俾譚越其。

我：「喂，下星期你一定要追返劉曉晴喎。」

佢：「知啦，仲有無其他野？」

我：「無啦，拜拜。」

時間黎到三月二十三日，星期一，小息。





譚越其過左黎1C班，入黎拖住劉曉晴隻手出班房。

睇到呢一切既于夏君好開心咁同我講：「劉曉晴話譚越其鍾意佢喎。」

好，譚越其果然係一個信守承諾既人，不枉我同佢出街。

我跟住呢一對戀人落樓下籃球場，睇譚越其同人鬥波。

我同劉曉晴坐左係旁邊既長椅，兩人中間隔住一個身位，仿佛有個心靈的距離。

「Sorry呀，之前我仲以為你想搶走佢。」率先開口既係劉曉晴。

「Sorry呀，係我令你誤會左。」我答。





劉曉晴：「唔緊要啦，琴日佢打黎同我講話：『我同你講笑咋，我鍾意果個唔係黃寶靈，而係你呀。』咁樣喎，嘻嘻。」

見到好朋友得到幸福，我個心都感到好安慰。

但唔知係咪由果時開始，我同劉曉晴變得既熟悉又陌生。