關於少女的故事: 12-失戀

我問：「咁你鍾意邊個呀？」

宇宙：「我同班同學，佢叫做Tiffany。」

唉，唔係我，岩岩睇到果下，真係心灰意冷。

我：「同佢表白，然後問佢可唔可以一齊囉。」

我唔想教佢溝女，因為佢想溝既並唔係我。





個心好似撕裂左咁樣，我唔甘心，岩岩先等完你同Emma分手，而家又彈出個Tiffany？我唔甘心呀！

宇宙：「多謝你。」

我：「唔駛！」我仲假裝大方咁面對宇宙，但其實我真係好想喊。

呢個時候，我打左個電話俾劉曉晴，打唔通，於是我打左俾于夏君，講左兩句，終於忍唔住喊，之後一傾就傾左兩個鐘頭。

我一路喊，一路係度訴苦。難得于夏君咁善解人意，我就盡情發泄。





呢一次，就係我第二次單戀既失戀。

其中有一句，我覺得于夏君講得幾岩既就係「宇宙鍾意邊個都話俾你聽，證明佢心入面都有你既位置啦。」

傾完兩個鐘，我終於冷靜咁接受現實。



二月二十四日，宇宙同Tiffany終於一齊左。





果日我無喊到，仲扮大方咁同宇宙講：「你要幸福呀。」

我：「仲有呀，唔準蝦Tiffany呀。」然後我輕輕打左佢膊頭一錘。

Tiffany好過Emma好多，樣又靚，腰又幼，腿又長。又唔似得Emma咁發姣，又唔會用宇宙個Msn。

我竟然覺得宇宙揀得岩，呢種心情好矛盾。

好似我咁既Small Potato，根本就無條件同Tiffany鬥。

但係Facebook見到佢地既合照，我不禁心酸起黎。

鍾意人既特徵之十：唔想佢同任何異性接近，包括佢呀媽。

我好清楚明白我仲係鍾意陳宇宙，但我決定將呢個秘密自己埋藏。





果日，我問杜學禮可以點做。佢答我：「只有等。」

佢仲話：「中學就拍拖，好易散嫁姐。你咪等佢地散囉。」

咁又係，我想要既係一段唔會散既戀愛，終有一日我會等到既。

到宇宙同Tiffany分手果陣，我一定要盡快表白。



三月十六日，係譚越其既生日。

十五號晚，我又去左劉曉晴屋企，話要一齊整蛋糕喎。





我地今次要整既係藍莓芝士蛋糕，仲要整兩個。

我地買左D消化餅，然後拎個膠袋袋住佢，再椿碎佢。

再搽D牛油，終於整好個餅底，之後就打忌廉，打芝士。

整左半個幾鐘，終於整好兩個芝士蛋糕。一個俾譚越其，一個俾我地試食。

我：「好味，正呀。」我一路食一路講。

劉曉晴笑住講：「係咪呀？」

我：「係呀，譚越其一定會鍾意食嫁。」

劉曉晴：「我仲寫左封情書俾佢，今次無死啦掛？」





就係咁，我同劉曉晴都帶住期待既感覺過呢一晚。

但係有時候，期望越大，失望越大。

放左學之後，我同劉曉晴一齊去1D班搵譚越其。

劉曉晴：「個蛋糕係我地整嫁，生日快樂！」跟住佢就遞上蛋糕同一封信。

譚越其好開心咁望住我講多謝。

咦？佢望住我？係咪有咩誤會？