《醜小鴨》: 自決？屎就有得你食。

喺謝師宴過後，我就要執定行李，因為成績問題，令到連IVE都唔收嘅我，只能北上讀個冇乜國家認可嘅鄰國大學…而收我嘅亦只有哈爾濱工業大學。初時我只覺得哈爾濱係喺廣西呢d少數民族嘅地名，而且又夠近香港，點知喺一次2家人聚餐嘅時候，被表姨媽問起，從表姨丈口中先得知哈爾濱係咁撚遠嘅地方，心中隨即浮現一個重重複複而又似傻瓜青蛙般嘅共鳴嘅單字：屌…

正當我諗諗吓，喺佢哋面前話唔讀之際，大表妹靄琪就話：「既然難得有學校肯收你，不如讀咗先啦。」，表姨媽亦搭嘴：「係囉，既然有機會就讀住先啦，第時搵份工先再自我進修香港嘅課程。」，而老母喺聽完表姨媽嘅話之後，隨即喺先擔心我會遠赴邊緣世界嘅心情後，360度轉為支持我去讀哈工大，咁我唯有死死氣咁去啦，雖說我真撚係唔撚想去……

喺正式放暑假嘅第一日，表姨丈偷偷摸摸約我去金鐘，仲叫我拎埋本BNO，當我到咗金鐘站，居然見到大表妹，然後問佢：「咦？點解你自己一個喺度㗎？約咗男友？」，我問到最後時，眼睛慢慢瞇到成個金魚佬咁，然後佢無言到勁似多啦A夢對大雄無言咁嘅樣-> (-_-)：「唔係囉！Daddy叫我出嚟等你先，因為佢行到半路先話唔記得帶本passport，先至衝返屋企攞，不過等咁耐，應該係返到屋企比媽咪省咗陣。」，隨即同佢笑起上嚟，令到站內嘅人都望住晒，而我哋則尷尬死人。

等到表姨丈嚟到，喺問佢為乜要帶本過期N年嘅BNO嚟，佢就話帶我去英領事館度幫我renew本passport，然後請我同佢全家去沖繩同九州玩。喺我震驚同埋話要示老母先，佢當堂就話聯同表姨媽一齊同老母講數：「阿晴，表姐我，見思恆要去咁遠讀書，同阿威都覺得不如我哋2家人去日本旅遊一轉，等佢放鬆D同平伏吓個心。」，「2家人？1個人都要成幾千銀來回機票同酒店，我哋仲要4個人，你哋本身都5個人啦，計埋你哋想買咩食咩呢D，其他蠟蠟雜雜都差唔多成10萬。咪喇！要去你哋自己去 啦。」，點知佢2個企硬唔讓步，而老母亦不甘示弱，話唔去，然後靄琪就做㗎兩：「咁不如淨係請大表哥去啦，既可以安撫佢，有我哋同佢一齊，又可以令表姨姨放心。」，老母先比我去。但係我愰惚就好似冇發言權同人權，完全冇絲毫自決嘅權利，就好似X英聯合聲明咁，香港聲都冇得聲咁…