【懸疑】《連登連環殺人事件》: —-第十章—- 4.
「唔......」
沉吟的聲音。
阿田渾身乏力的靠在牆壁，手腳也被鐵扣緊鎖著。周遭動蕩的情況，波及到來隔離囚室，令瓦片一直從天掉落。
但她依舊是那片模樣，迷迷糊糊又帶點帳然，即使知道自己身處危機亦面不改容。
可能因為掙扎也逃不掉吧。
鐵門倏然發出解鎖的聲音，微微吸引了阿田的注意力。她一直認為開門的人會是監官或是獄長，因此沒太大反應。不過門扉一開，她訝異得立即拉動鐵扣，發出鏗鏘聲。
「An...angel？」她吃吃的說，眼眸亮出驚喜。
走進隔離房的是三個穿黑白囚服的人，有兩個的模樣是日本人的輪廓，還有一人，正是美玲。
美玲雖然不像平時的穿高貴大衣，但庸俗的囚衣裡，她仍能散發出獨特的優雅。
「小田！」她發現面容憔悴，渾身傷痕的阿田，立即擺出一副很關心的模樣走過去。
「係邊個搞成你咁架？」她問，未等阿田回應，她已經自己覓出答案：「一定係重案組果班人啦。」
「唔緊要架。」阿田語調溫柔，以思慕的眸光投向美玲，羞答答的笑。
美玲嘆聲氣，四看周遭震盪的環境，看來時間不多了。她又瞧了瞧牆上化開的血液，直截了當的問：「牆上既呢啲紅字，係咪寫緊我個名？」
「係......」阿田垂頭說：「因為一諗起你，好唔自覺就寫左你個名出嚟。」
美玲聽罷，眼睛隨即笑瞇成一線，笑得不甚自然。
「好唔自覺？」她重覆阿田的話。
「嗯嗯。」
「咁你有冇好唔自覺咁講哂我地Hearts既野出去？」
「緊係無啦，關於Hearts既野，我咩都無講過。」阿田曾經是日本刑警，當然知道亂說話的後果。
美玲詭譎的揚揚嘴角，回頭向兩位日本手下打了個眼色，他們頓時獰笑起來，從口袋想要掏出些什麼。
「小田，好多謝一直為我同埋Hearts付出左咁多......」美玲閉上了眼：「不過，我地唔再需要你喇。」
「呃？」
阿田錯愕，緊接著是兩記槍響，響聲迴盪隔離房。
她的頭額穿了兩個硬幣大小的孔穴，子彈從她的腦袋劃過後嵌在牆上。
阿田瞬即失去意息，腥血徐徐從穴中流出，嘴和眼睛依然張著的。
是美玲的兩個手下掏槍擊斃了她，他們臉上不帶一片憐憫之情。
「再見了。」美玲對著眼前的死人說。
開槍過後，隔離房的搖晃情況變得更嚴重了，碎石連同灰土不斷從天傾倒。
美玲抬頭：「果三條友（Hearts成員）搞咩啊？」
「本身諗住喺監獄製造混亂啫，而家監獄都就冧喎，佢地幾個放炸藥會唔會放得太勁啊？」其中一個手下和應說。
「唔癡線既又點會係Hearts既人喎。」另一個手下訕笑。
「拿拿聲走啦，唔係既話我地下場同小田一樣。」美玲說。
三人回身，打算離開之時，只見子熹擋在門前，他的眼神展現出徹底的失望。
「子熹？！」美玲睜大眼眶。
「估唔到...」子熹右手又一次發作的抖著：「我仲以為你只係諗住報仇先殺人，估唔到你對阿田都會狠下毒手。」
兩個日本手下意欲上前，美玲馬上伸手攔截他們，示意不要動手。
「果然係因為入左黑幫之後，成個人都變哂。」子熹嘆氣：「我當初認識既美玲，並唔可能係個咁暴戾既人。」
「當初既美玲已經死左。」美玲搖頭：「就係喺比自己最愛既人推落山既一刻，而家你眼前既我，只係個失去靈魂既人。」
「我承認，當時既我實在係做左一個好錯既事，我之後每日都好後悔，所以我更唔想你好似我咁。」
「你無資格要求我去做啲咩。」美玲向前走了幾步：「上次喺電話，我已經講過唔想再見到你，唔該借開。」
「我係唔會比你走，唔會比你再害人。」
「害人？」美玲虛笑一聲：「我喺連登Post度寫到好清楚，講明「想死」既人就喺度留言。結果想死既人可以去死，我亦可以對網民作出威嚇同報復。你情我願，何來害人？」
「無人會相信網上既呢啲瘋言瘋語，你咁樣只會令無辜既人受罪。」
落石開始變得頻密，整個天花分分鐘塌下來。兩個手下已經想立即離開，可是沒有美玲的同意，他們不能就這樣走出去。
他們把害怕的情感轉化成怒氣，臉色變得兇悍，如像野狗般，緊緊盯著子熹。
這時，康仔到了，他跑到子熹身邊。
他看到被槍殺的阿田和美玲三人後，警戒的拿出警槍，雙手擺後藏到身後。
「講起無辜既人......」美玲想一想，忽然說：「果位叫芊芊既女仔先係最無辜啦。」
「芊芊？」
「你果個所謂既現任女朋友啊。」
「佢做咩？」
「佢做錯事囉。」美玲淺笑：「佢愛錯左一個根本唔愛佢，只係當佢水泡既人。」
子熹一怔，馬上抗議道：「亂講！」
「唔好諗住你可以呃到我啦，我查到你同佢一直係同事，只不過並無任何其他曖昧關係。但係當你知道我同黑幫大佬結左婚之後，好快就同佢一齊左，你咁樣做，係咪對我既一種抗議？」
康仔不禁嘩了一聲，皆因美玲說得不無道理，時間線上實在太巧合了。
他孤疑的把目光投往子熹。
拜託，她所說的話千萬不要是真的......
「唔好意思，我諗你諗多左喇。」子熹撥撥掉在他身上的塵灰：「我係因為經歷今次困境時，得到佢既鼓勵同幫助，先至清楚感受到佢既重要性，所以我選擇同佢一齊，而我到呢刻都覺得係個非常啱既決定。」
「嘩你個死仔...比芊芊聽到你呢句話實開心死。」康仔暗暗感嘆。
美玲受不了子熹的答案，頓時變得激動：「你講大話！你肯定係因為覺得我背叛左你，先至同個女仔一齊！」
子熹也走前了幾步，兩人相隔只有幾米：「我唔係個咁既人，你知架？」
美玲用力的搖一搖頭。
「佢有咩比我好？」她聲線變得混濁：「係咪我唔夠佢靚？定係我唔夠後生啊？我知喇，佢一定係識講甜言蜜語討你歡心......」
「都唔係。」子熹摸摸美玲的秀髮：「呢個世界，有時唔係每樣野都要比較既。如果真係要比較既話，我都係比較中意以前既你。」
美玲怔怔的呆望著子熹，水汪汪的眼眸映著他的臉龐。
「如果我願意變翻好似以前咁，你會唔會原諒我？」
「你覺得呢？」子熹揚上嘴角一笑。
「咁即係點？即係芊芊只係水泡？」一旁聽著的康仔弄糊塗了。
美玲仿佛找到救贖一樣，淚水直流。
下一秒，她緊緊的擁抱著子熹。
與此同時，芊芊也趕到來了，她恰巧看到這一幕，驚訝得無言以對。
空氣一刹冷冰冰的凝結了，碎石震盪跌落也聽不出聲音，場景靜如止水，子熹和美玲的這個舉動，仿佛把整個世界吸了進異空間。
芊芊沒有哭，沒有做些什麼，只是一直怔呆的看著他們兩人。
康仔瞧著這個三角關係，當中的錯綜複雜，簡直就似看著一齣悲劇收場的愛情電影。
他悶嘆半聲，握槍的手也放鬆下來。
這大概是A0的男人，永遠不會遇上的煩惱吧。
猛然間，一個日本手下用槍指向子熹，大喝一句：「Angel，唔好再同呢個人糾纏啦，唔通你想派綠帽比老大？」
美玲聽後，輕輕放開子熹向他一笑，續向那手下說：「同你老大講，我要退出Hearts，唔會再翻去日本。」
兩人睜大眼睛，拿高著槍的手下更是火冒三丈。
「臭雞，我大佬對你咁好，你竟然背叛佢？」
「我由一開始就無中意過果個男人，對唔住。」
「你...你話咩話？」他激動起來，隨即扣起板機：「一定係因為呢個男人影響左你！佢正一狗公嚟，去死啦！」
「唔好啊！！」芊芊喊。
康仔見狀，立即舉槍向那手下。可是太遲了，那手下對著子熹開了一槍。
「砰！」
子熹眼裡瞬間冒湧血紅。