【懸疑】《連登連環殺人事件》: —-第十章—- 1.
子熹從床上起來，滿意的伸伸懶腰。
近期的睡眠質素好像改善了。
之前失眠的問題已經解決了，好幾天也一覺睡天光，感覺如獲新生。
習慣性的伸手從茶几上拿起手機，放到眼前一瞧，只見芊芊發了一條短訊給他。
芊芊：一陣十二點喺咖啡廳等，有啲緊要事想同你傾。
他看看手機左上方的數字鐘，現在是十時二十分。
「好，陣間見。」子熹答應她。
起床梳梳洗，剃剃鬍子，添點髮泥在頭髮上撥弄，再換件厚外套和牛仔褲，整個人馬上精神抖擻。
芊芊忽然急急找我，應該不會有什麼事吧。
反正也是惦掛我才急急叫我出來吧，這個傻女孩，子熹心忖。
十二時正，子熹準時到達咖啡室。
自從跟康仔鬧翻以後，他已經好一陣子沒有回來過了。
推門而進，門扉連繫的鈴鐘發出清脆的鈴鈴聲。他掃視餐室一眼，結果在以前經常坐的位子上覓見芊芊。
「芊芊。」他笑著臉走過去。
芊芊瞧見他，擠出繃緊的笑容揮手，她的臉色十分蒼白難看，令子熹有些困惑。
「咩事咁急叫我出嚟嘅？」他擔心的問。
「無啊。」芊芊細聲說：「有個朋友想見下你。」
「朋友？」
「係。」一把男聲插進兩人的對話裡。
子熹回眸，康仔已經站在他後方。
「雖然我唔肯定我地仲算唔算係朋友。」康仔凝重的說。
子熹先是錯愕，但馬上擺出生氣表情：「你點解會喺度？」
「因為我有野要問清楚你...」
「我都有野要問清楚你。」子熹搶著問：「你要調查我地都算，但點解你要搵埋三唔識七既連登仔去幫你，搞到我地重案組個個都好似係殺人犯咁，你到底有冇諗過我地感受？」
康仔見他搶先佔領了道德高地，對自己作批判，無奈的搖搖頭。
他深呼吸一下，然後說：「子熹，我查出左邊個係內鬼。」
突然的一句話，子熹似乎被嚇倒，他勃怒的模樣漸漸瓦解，露出驚訝的表情。
「內鬼係邊個？」他問。
康仔先觀察他的表情一番，看不出端倪，續說：「喺我地三人之中。」
子熹眼神瞬變銳利，他瞥了瞥芊芊，從她怯懦的神色，很快便得出情況的結論。
「你懷疑係我？」
「係。」
「我有乜野要殺人既理由？」
「你未必有，但你有一個喺日本既朋友有。」
「我喺日本無朋友。」
「呢個只係你片面之詞，無人可以證明。」
「咁你懷疑我亦都不過係片面之詞啫。」
「我有證據。」
「攞出嚟。」
「喺我攞出證據前，你係咪都唔打算同我呢位兄弟坦白事實？」
「我地......唔再係兄弟。」
「好！咁我就更加唔需要顧慮。」
康仔二話不說，從芊芊的背包取出電腦，開出昨晚「日本妹」帳號調查的結果放在子熹眼前。
「你點樣解釋呢件事？」
「！？」
子熹望進螢幕，詳細調查報告顯示所有分析數字，而在報告的末段，可見結果寫著自己的名字。
他不敢相信自己的眼睛，呆滯的站著。
康仔終於從他的臉上發現恐懼之情，他因此暗暗肯定，子熹必定是內鬼。
子熹待了幾秒，才怔怔的回應：「有人駭入左我既電郵，一定係！」
「我都有考慮過你會唔承認。」康仔從口袋裏掏出一張相片，遞給子熹，相中人是一個高貴女人。
「認唔認得佢？」
「...」子熹的右手猛烈抖震。
「羅老亮被炸死之前一刻，連埋住咁啱離開病房，佢見到一個戴口罩既女人鬼崇咁入去，所以佢趁機偷影左個女人一張相。」
康仔再拿出另一張照片，照片可見子熹跟一個女人的合照：「我曾經喺醫院同呢個女人擦身而過，總覺得有啲眼熟，但當我知道「日本妹」既電郵用户係你既時候，我馬上就聯想到呢個女人。之後搵出你地既合照再作比對，發現即使隔著口罩輪廓依然極似，所以更加確信係佢。」
他繼續說：「喺我地所有人當中，只有你同美玲既關係最親密，作為內鬼既動機就變得清晰，就係要為佢被欺凌既過往而報復！」康仔豎起手指指向子熹的臉。
「美玲...」
子熹垂頭喪氣的喃道，看來是投降了。
康仔瞧瞧門外，連埋住等人早已包圍著咖啡室，以防子熹被識穿後逃走。他向他們打個眼色，示意兇手便是子熹，眾人頓時警戒起來。
把目光放回子熹，可是過了半隔，他依然一動不動的站著。康仔見他目無反應，繼續說：
「如果係因為對美玲既愛，咁你背叛我地，我或多或少亦能理解......只不過，我估唔到佢未死啫。」
「並唔係咁既一回事，我並無咁偉大。」子熹忽然說。
「咩意思？」
「我咁做，係為左贖罪。」
「你做過對佢唔住既事？」
「記唔記得，我同你講過我同美玲之間既故事？」
「記得啊。」康仔雙手交握放到背部，眼珠向眼眶左上隅溜溜：「你地邂逅之後，互相中意大家然後一齊左。但因為美玲比人網絡欺凌，最後所以喺富士山自殺......」
「呢個係謊話嚟。」
「下？」
子熹嚥了口水，徐徐續說：
「美玲，最後係比我推落富士山。」
康仔不敢置信的望著子熹，下意識的退後一步。一旁的芊芊更是嚇得眼紅，冒出淡淡淚光。
「所以你一路以來，都係一個殺人兇手？」
「對唔住。」
他望向芊芊，芊芊已經掩著嘴巴啜泣著。
「你快啲同我地講，今次既連登連環殺人事件係乜野一回事。」康仔嚴肅的問：「美玲係咪就係Angel，佢同日本黑幫Hearts點解會有關係？唔該同我通通坦白！」
子熹抑望天花，事到如今唯有把真相說出來吧，他想。
記憶，再一次回到雪白紛飛的兩年前。