【懸疑】《連登連環殺人事件》: —-第四章—- 1.
「突發！會員肥媽公主被殺！」
「(爆料)連登仔連環死亡事件，原來受害人已經去到6個！」
「到底傷心小棧係咪兇手？連登神探全面進場！」
「禾輋邨出現示威，控訴黑警辦事不力！」
夜色陰沉，總部外的街上落著滂沱大雨。行人稀少，就連平日車來車往的大馬路也變得靜止一般。
康仔靠著走廊窗台滑動手機，眉頭深鎖。
雨點似針的不斷墜落，好像未有停止的意思，打在地面上的雨聲在他耳根縈迴著。
他抽了一口悶煙。
重案組其他人聚集於盤問室外的錄音房，從錄音房的玻璃窗，可以清楚看到盤問室裡的畫面。
他們一臉凝重，沒有任何對話，錄音房恬靜得可怕。
芊芊眼睛放空的望進玻璃窗裡的男子。
男子帶上手銬，對著白桌子獨坐在狹少漆黑的盤問室。他穿了輕便的Polo裇衫和啡色棉褲，身體濕漉漉的。
「入去喇。」胡文軒拍拍子熹肩膀。
兩人拿著紙筆打開門進去，男子瞥了他們一眼，然後別開視線。
兩人在他對面的位子坐下來。
胡文軒以凌厲眼神注視著他，他感到不舒服的動一動身子。
「羅明亮先生。」子熹開口。
羅明亮沒有回應。
「定係應該嗌你阿亮？抑或者，應該嗌你「傷心小棧」？」
他依舊不語。
胡文軒見狀，突然用力拍打桌面大呼：「阿Sir同緊你講野啊！」
聲音之響，把羅明亮嚇得彈了一跳，他眼神閃縮的投向胡文軒。
「係...隨便嗌啦。」
「唔該你合作啲啊，唔好諗住玩野啊你，你要玩既我地大把時間慢慢陪你玩。」胡文軒警告說。
「知道。」羅明亮膽怯的回答。
子熹注視著羅明亮，繼續說：「點解你會忽然出現喺總部呢度？」
「因為...」
羅明亮瞄了玻璃窗一眼，但由於設計上，只有錄音房才能看見另一邊的畫面，他看到的只是灰濛濛一片。
「因為啲咩呢？」子熹追問。
「呃...因為...」羅明亮支吾以對。
「唔好打算轉彎抹角喇，講事實出嚟我地先幫到你架。」
羅明亮嘆了一口氣：「唉啊阿Sir，我唔係唔想講啊，但我唔講得架。」
「唔講得！？」
胡文軒站起走去他旁邊，抓著他衣領，羅明亮整個人被他抽了起來。
「你無啦啦走嚟總部，無啦啦走去三樓既Safe House，然後無啦啦有煙霧彈襲擊我地，然後我地既保護人物無啦啦被人暗殺左。而家我地捉到事件最大可疑既你，你居然同我講唔講得？」
他用力向羅明亮一推，羅明亮砰啪的撞向椅子，失去重心狼狽的跌在地上。
「好痛...」他喃喃道。
胡文軒上前，打算再踢他一腳，此時子熹阻止了他。
「胡Sir，唔好動粗住，咁樣對件事無幫助。」
望著胡文軒的眼裡，子熹感覺到濃濃似火的怒氣，是因為兇手多次挑戰他的底線而令他受辱生氣吧，子熹心想。
胡文軒閉氣深呼吸幾次，把空氣通通吸進肺部填滿它，再徐徐呼出來，整個人才冷靜下來，回到座椅上。
「阿亮，你都坐番起身先啦。」子熹說。
宛如驚弓之鳥的羅明亮，蹣跚的坐回位子上。
「一係等我進入正題啦。阿亮，你係咪殺左我地既保護人物阿宜？」
「無啊，我無殺人！」羅明亮澄清。
「雖然你口講話無，但從你開既Post見到你喺今次事件上有殺人動機，而且你出現一刻，阿宜就死左。」
子熹停一停頓，觀察羅明亮的反應，續說：「再者，你本身會喺呢度出現就已經係最可疑既事。所有證據嚟睇，都係對你不利。」
「我真係無殺人啊但係！」羅明亮強調：「我的確係過嚟搵阿宜，但我係被迫架，有人要脅我。」
他說完以後連忙掩著嘴巴，看來是無意中把重要的信息說漏了嘴。
「要脅你？」胡文軒困惑的問：「邊個要脅你？」
羅明亮再次回到沉默。
「你放心喎。」子熹說：「如果你真係無殺到人，我地一定會全力幫助你......」
「你地點幫啊？」羅明亮忽然激動的喊道：「我老豆喺日本比人綁架呀。」
「下？」兩人愕然。
他倒抽一口氣，說：「喺尋日晏晝，我接到一通匿名電話，對方首先以確認我「傷心小棧」既身份，然後佢就叫我跟足佢既指示去做，如果唔係會對我爸爸不利。我初時唔信，但對方就比左我爸爸把聲我聽......聽到爸爸痛不欲生咁求救果刻，我幾乎呼吸唔到，個心跳得好快，之後佢講低左資料之後就cut左線。」
子熹把他說的話一一記錄下來。根據記憶，他的爸爸好像是個住在日本工作的工程師。
「對方講低既資料係啲咩？」胡文軒問。
「果個人叫我跟住一個目標人物，喺適當時機搶走佢。然後果個人清楚講出目標人物幾點會喺邊，幾點要偷襲佢，佢仲忽然喺我門前放左個土製煙霧彈，叫我到時用個煙霧彈搶人。我本身係打算喺你地禾輋上車一刻突襲，但等左好耐都唔見人，咁我咪走囉......點知佢突然又要我去總部，仲話唔跟住做既話我爸爸就無病，我咪唯有照做囉，點知會搞成而家咁架！」
「你意思你收到既指令只係要搶走阿宜，而唔係殺左佢？」
「係呀，我無殺人呀！」羅明亮臉頰通紅，激動的說：「阿Sir你又唔係未見過我，你知我根本無能力同勇氣去殺一個人嘛......而家我無端端就捲入謀殺事件，爸爸仲要生死未卜，我好無助呀！有冇人可以教我點做啊......」
羅明亮焦急得哭起來，雙手掩著眼抖顫。兩人意欲繼續問下去，可是他過份激動，暫時無法鎮靜下來再說些甚麼。
「我地出翻去先啦一係，等佢冷靜一陣。」
「唯有係咁啦。」胡文軒說。
兩人回到錄音房，此時康仔也從另一邊門進來了。影姨關上了錄音房的喇叭，盤問室裡的哭喊聲頓時中斷了。
錄音房四邊貼滿了深藍色的隔音牆，當所有人也沉默不語時，那種無聲的寧靜交織成另一個世界，感覺就是身處擠壓的異度空間般。
靜得連空氣游動聲音也能聽見。
各人的臉也黯淡無光，眼睜睜的看著胡文軒，等待他先開口去說些什麼。
「相信大家頭先都聽到羅明亮所講既野。」胡文軒一聲劃破沉靜，在房間裏迴盪。
眾人點點頭。
「由於當時Safe House既閉路電視比煙霧遮住左，睇唔到行兇既人係邊個。所以而家要判斷既事，就係羅明亮講既野可唔可信。但首先，我想聽下你地每個人既意見。」胡文軒掃視每個人，再把目光放回最左邊：「就由你先啦影姨。」
影姨深思一會，說：「我覺得佢講緊大話。」
「點解呢？」
「因為從客觀事實去睇，羅明亮忽然出現喺總部已經係非常可疑既事，而且阿宜比人暗殺既時候佢就喺隔離。所以佢有機會係講緊一個好大既大話，去掩飾佢既行為。」
胡文軒明白的點點頭，眼光移向下一人：「芊芊，你覺得呢？」
「嗯...」她瞧了瞧玻璃窗裡的羅明亮：「我覺得佢講既都係真話。」
影姨驚訝：「唔係掛，你信果條友？」
「因為眼淚。」芊芊說：「無論佢講啲咩都好，眼淚始終唔係咁易流出嚟，尤其作為一個連環殺人犯，應該係冷血得多。」
「同意。」康仔舉手：「因為上次我上過佢屋企見過佢，仲有頭先同佢搜身既時候都搵唔到兇器。憑我既感覺，佢只不過係個長期宅喺屋企既男人。」
「子熹呢，你點睇？」胡文軒問他。
子熹抬了抬頭，想了一會後說：「我覺得佢講大話。」
「原因？」
「如果佢係作為一個長期留喺屋企既人，理應該無咁既身手同能力喺煙霧中闖入Safe House，但客觀事實上佢真係做到，所以絕對有機會係受過訓練，正如之前閔法醫所講既一樣。」
「而家即係二比二啦。」胡文軒抱著雙臂：「MK晴，差你咋喎。」
眾人把目光投在她身上。
她皺著眉，然後站過來沿著房間走了一圈，以珍珠般的黑瞳打量著每個人。
「搞乜啊你？」康仔問。
她沒有回答，最後回到自己的位子後緩緩開口。
「我覺得我地之中有內鬼。」