【懸疑】《連登連環殺人事件》: —序—
「突發！再有連登仔離奇死亡！死亡預言真係咁準？」———2分鐘前
「啱啱喺傷心小棧個post留左名，你問我答！」———3分鐘前
「公投：傷心小棧咁做有冇錯？」———6分鐘前
男子一邊在夜市邁步走著，一邊滑動手機。討論區近幾星期也圍繞著這些話題，他嘆口悶氣，嘖了一聲。
身穿深藍色直間裇衫，啡色西褲的他收起電話，擠過圍觀的人跨過紅白封鎖線。有警員上前打量他，男子掏出警章在他臉上掃過，警員頓時敬禮讓路。
「康仔！」裡頭不遠處有人喊他，熟悉的臉映在眼前。
「喂......」康仔瞇起眼睛，露出驚訝又興奮的神色：「我無睇錯嘛，呢個咪係子熹？」
子熹跟康仔是公事上的同事，私下也很友好，不時放工後相約吃飯。他臉上有著清晰的輪廓，頭髮很清爽，是模範的帥哥樣子。
「係呀，放完長假要開工嘛。」子熹聳聳肩。
康仔走到他跟前拍拍他膊頭：「去旅行玩左咁耐，有冇買手信益兄弟先？」
「手信既野轉頭先講啦，處理左呢度先。」子熹揚揚下巴，示意他往後望。
放置雜物的小巷，一個肥胖的中年男人背著臉擱在路中央，檢驗人員戴上手套正檢查屍體，看看有沒有什麼線索，把蛛絲馬跡記錄下來。
「初部估計，佢係一個鐘前死既。」子熹覆述早前法醫既說話。
「死因？」
「死因不明，不過以現場環境判斷，唔似係自殺。」
康仔注視屍體，喃喃道：「果然係咁。」
子熹對他的反應感到一點意外，繼續說：「而且，喺屍體上發現到啲奇怪既線索。」
「嗯？」
「喺屍首額頭上，有人貼左張黃色memo紙，上面仲寫左野。」子熹從身邊法醫手上取來透明密封膠套，裡面放著褪黃色便箋。
「LIHKG 陽光小妹」
康仔隔著膠套讀出便箋上的字句，然後頻頻搖頭：「睇嚟同之前幾單都係同一個人所為。」
「你意思仲有其他受害者？」子熹睜大了眼睛。
「你啱啱旅行完返嚟可能唔清楚，呢個已經係近排第四個受害者，每隔兩日死一個。佢地被發現遇害既時候，通通都有張memo紙喺身，應該係有人蓄意所為。」
「原來已經第四個......」子熹略略沉思，面上露出一條條魚尾紋：「有冇詳細檢驗過之前果幾個既死因？」
「法醫解剖過之前既死者屍體，發現佢地頸部血管同神經線有切斷既情況，應該係致死既原因。但係就無發現屍體受到襲擊，或者表面傷痕。」
「清唔清楚兇手有機會係咩人？」
康仔苦笑：「我地查過，之前三個死者之間幾乎無任何關聯，亦無人有殺佢地既動機。而且兇手專喺無閉路電視地方落手，至今都無留低髮絲或者指模痕跡——兇手似係個心思細密既人。」
其實子熹於傍晚甫到步香港，便已收到上頭多通來電和信息，要他馬上服工，大概是想要他快點著手調查這宗連環死亡案件吧。只是萬萬想不到，時隔不到幾小時，便有新一宗命案。
「睇嚟，又要開始晚晚通頂OT既日子喇。」子熹伸個懶腰。
「等等先.....」康仔指著子熹手上的透明膠套：「你忽略左佢喇。」
「你明白呢張野既意思？」
康仔頷首，然後問：「有冇上連登？」
「連登？」子熹納悶。
「即係討論區啊，唉睇你個樣應該都無上架喇。」
「你知我最憎呢啲網上討論區㗎。」
「都係既......」康仔似是明白了些什麼，垂下了頭：「但係呢刻查案要緊，你望一望會好啲。」
康仔掏出手機，往黃色笑臉的app按下去，螢幕隨即彈出討論區介面。他按向熱門的帖子，然後把手機端到子熹前。
「近排討論區有一個長期置頂既post，有超過二萬個正評，引起網民熱烈討論。我㩒過入去睇，發現內文同呢件案有明顯既關聯性。」
發帖者的帳號名叫「傷心小棧」，他於兩星期前發了帖文，標題名是「想死既入一入嚟」。子熹看著畫面按進帖文，隨即顯示著血紅色文字。
———————————-
#1 傷心小棧
各位連登既巴打絲打你地好，我係傷心小棧——擁有令人死亡既能力者。
只要留個名，我就會送你一程。
要唔要試下？
———————————-
讀完簡單幾句文字，子熹眉頭深鎖，康仔從他臉上能讀出他的困惑。
「呢度都未算精彩，睇埋下面先。」
康仔用食指輕輕滑動屏幕，把頁面停留於第五個回覆，子熹啊的一聲叫了出來。回覆的帳號名稱，正是「陽光小妹」。
——————————————-
#5 陽光小妹
小妹厭倦左生活喇，成日都遇上壞男人，如果可以一死亦無妨。
——————————————-
讀完這段回覆以後，子熹瞥了屍體一眼，不自覺的打個冷顫。
「如果無估錯，呢個中年肥佬就係「陽光小妹」。」康仔補充一句。
「係咪搞錯左啲咩？」子熹渾身起了雞皮疙瘩。：「呢個男人點睇都唔係小妹啦，如果佢真係寫左啲咁既野出嚟，會唔會嘔心左少少啊？」
「網絡上有唔少呢種人，佢地通常被稱做假膠。但係今次呢個假膠實在唔好彩，遇著個真正既瘋子。」
子熹的眼神裡盡是感覺荒謬，康仔聳肩：「社會就係咁荒謬。」
「但係咁喎，如果兇手連呢啲假膠喺現實生活既身份都分辨到，大概只有管理員身分先有呢個能力做到。」
康仔從西褲口袋掏出煙盒，抽出一支煙啣在嘴裏，然後點火呼出裊裊白煙。
「一於去挖佢地出嚟。」