[專員≠Hugo] 我係溫文樂，奉命調查一宗垃圾站藏屍案: 四十一

"我幾時審你呀？我淨係問你點解識佢呀！"我咆哮。 

我已經俾人停左職，番黎點解仲要我受氣呀？ 

"溫文樂！你咁講算點呀？ 
我點識佢係咪要同你解釋？"芷晴撓起雙手，怒目而視。 

"我而家話你聽，佢係殺死Candy既疑犯， 
咁你可以講我聽未呀？"　周圍既氣氛一直升溫。 





"哼！關我咩事呀？"我知道芷晴而家係同我鬥氣。 

"你...！"我怒氣沖沖咁走左出門。 

一肚氣走到酒吧飲酒， 
最慘既莫過於想搵人陪自己， 
但係第一個諗起既居然係芷晴。 
哼，除左你之外，我仲有大把人陪我囉！ 

"Hugo，得唔得閒？"其實我冇乜邊個可以搵。 





"做乜鬼呀？我同緊個鬼妹玩Webcam喎！"我聽得出Hugo把聲好興奮。 

"出黎飲杯野。"我理得佢同鬼妹定鬼仔玩丫。 

"怕鬼左你。"我幻想到Hugo谷住谷住，一臉怨氣個樣。 

Hugo好快到左，我一五一十將停職，以及芷晴既事講哂俾佢知。 
佢除左聽到呀健係導火線，嬲到講左句粗口外， 
其他時間都只係聽我呻。 




不知不覺，我地漸漸飲到天昏地暗。 
========================================================= 
"起身喇！樂仔！起身喇瀨野喇！" 

我慢慢張開雙眼，就見到Hugo係我眼前， 
而且再聞到一陣惡臭。 

"咁臭既？我地係邊呀？"我伸左個懶腰。 

咪住，好熟面口喎呢到... 

"仲講，而家點算呀？死左人喇！"Hugo一臉驚恐。