[專員≠Hugo] 我係溫文樂，奉命調查一宗垃圾站藏屍案: 十二

我同呀燊先去附近茶餐廳食野。 
由於正值打工仔放飯時間，周圍都水洩不通。 
好不容易我地先擠入左一間茶餐廳。 

“伙記，豆腐火腩飯唔該。” 我豪邁咁嗌。 

“你話喇，個八婆係咪玩野丫！”呀燊嬲到一口氣飲哂杯水。 

Er…杯水好似係上一手留低既… 





“喂…你…好口渴咩？ 
我硬係覺得有少少唔妥。正常都唔會咁樣放走個老細啦。 
我覺得許家富一定預左我地黎搵佢。”我好意提醒呀燊一句。 

“咁下一步點做好？真係剷上佢到？ 
如果佢真係知道我地會搵佢，佢一定會有所準備架喎。”呀燊好似冇為意… 

“咁都冇計，見步行步囉。而家得佢一條線咋。” 我心諗既係，如果佢真係有心避我地，咁佢更加似身有屎。 

由於我同呀燊坐既係四人卡位，對面個對男女食完之後，好快又有新既客人坐低。 




開頭我都冇多加為意岩岩坐落黎既一個客，但係佢實在太過出位喇。 

點解？佢拎住份報紙，但係佢就好似電視個D低能跟蹤劇咁， 
篤左兩個洞係報紙上面，你當呀SIR弱智架？ 

由於唔知對方來歷，我又唔想表露身份住， 
於是我就SEND左個MESSAGE俾呀燊，提下佢留意下對面個個人， 
唔好亂講野。 

唔知呀燊係咪淨係睇到MESSAGE既前面部份，佢居然一手扯開份報紙。 





“做咩咁鬼鼠呀？”呀燊劈頭就問。