惡城: ch.2
第二章
行咗一陣，見到好似一般office嘅格局，有大約10個人係到做緊野，見到我之後都主動行過黎打招呼。
「hello，我叫Peter呀，喺呢到我地唔會叫我地嘅client做客人，我地會叫佢地做partner，夥伴；或者我地同事之間都會叫大家做partner。我地想比佢地樂放心咁講出佢地心底話，好似朋友之間傾計咁。」Peter仔咁講。
「Hello，我係阿俊，你可以叫我阿俊或者阿Don都得，我係Senior Counsellor 。」
「Hello，我係Christy 張穎兒。都係Senior。」
「我叫阿希，係到做緊Trainee Counsellor，叫我Leo得啦。」
「我係禧兒呀Ada，我負責安排每一位Partner去見唔同嘅counsellor，你當我係秘書啦。」
仲有其他唔同嘅partner，個個都好nice。
之後Cherry同我講其實Senior同Junior工作性質都冇乜分別，不過Senior通常都係Full-time，Junior係part time；同埋年資上嘅差別。
我登記咗自己嘅個人資料之後，Ada就同我講平時工作嘅流程。其實都冇乜特別，上到黎嘅partner，可以揀單獨同counsellor傾，又可以3-4人咁傾。
之後Ada就分配咗我嘅座位，比咗其他partner嘅資料我睇吓。
睇咗唔夠一陣，枱面上嘅電話就響咗起身
「Ada呀，有個新partner上咗黎，你同阿俊一齊黎試下，順便同佢學下野。」
眼前呢個人，大約30歲，斯斯文文咁
我同阿俊之後就帶個partner入咗房。
「hello，我叫阿俊呀」
「你好呀，我係阿威呀」
「你地好，我叫jason⋯⋯」
「今日過成點呀，飲啖野先啦」
阿俊隨手喺雪櫃拎咗罐可樂比jason
「唉，其實我係做學校社工嘅」
一個社工要黎輔導中心，香港到底係一個咩社會黎。
「其他人成日都覺得學校社工好似好好做咁，但係其實好多辛酸只有我地自己先知。」
「嗯，你繼續講呀，或者我地可能真係唔明，但係我地會繼續聽你講。」
「好似今日咁，食飯前岩岩處理完一個有抑鬱嘅學生，翻去我間房，凳都未坐暖，有個老師就入咗黎話，仲以為你去咗邊，原來係到食飯。大佬，社工唔洗食飯咩，社工都係人黎。」
講完，佢大啖大啖咁灌咗幾啖可樂。
「仲有，有時社工真係慘撚過做泥工，每級每個禮拜都要參加德育堂，啲教材差唔多又係我地準備，日日都趕頭趕命，留到差唔多成7,8點先走。每次一有學生黎搵我，學校又規定我要寫一份詳細report，交代點解佢會黎搵我，我地傾咗啲咩，遇到一啲問題學生，我地份report仲要交上教育局，痴撚線，我得一個人，點做到咁多野。」
「仲有一次，有個老師打電話黎，話佢班有個學生好殘冇翻過學，電話又打唔通，一打黎就叫得去做家訪。喂大佬，做家訪我都要得閒先做到架，同埋唔好用一啲命令式嘅語氣黎講嘢得到唔得」
「嗯，有時工作好多苦都剩係可以自己默默咁承受，不如你試諗下果陣係為咗啲咩而入行？又係啲咩令你撐到依家？」阿俊問
Jason愣一愣
「為咗啲咩⋯⋯」
「其實我有個阿妹，佢有亞氏保加症，佢彈琴好叻，好乖，但係佢唔識同人溝通。我好想做一個醫生，或者社工去同佢溝通。我見到一班有需要嘅人，好想認識佢地多一啲，好想了解佢地內心世界，知道唔同人嘅故事。我唔知最後係咪真係幫到佢地，但係至少，至少佢知道喺佢生命入面曾經有人用一個咁嘅方式為佢付出過，咁就夠。但係學校啲行政，老師同社工之間嘅磨擦，唔好話去幫人呀，我依家幫我自己都成問題。」Jason咁講
傾下傾下，原來都傾咗差唔多3個鐘，jason同我地傾完之後，擺低咗2張500蚊就走咗。
「你岩岩見唔見到，其實有時partner上黎，佢都係想要一個樹洞聽佢講野，有時唔好吓吓話明佢諗啲乜，就係因為佢覺得冇人明佢先上黎搵我地傾。加油啦威仔。」阿俊講。
通常人都會有一個自己心理嘅防衛機制，例如受到挫折時會否認、歪曲事實、壓制等等。呢啲都係幫助自己逃離現實嘅不公，反而佢仲可以好開誠布公咁同面前兩個陌生人分享佢嘅故事，可能因為佢自己都係一個社會工作者，但係不禁令我諗起，其實有時表面上堅強嘅人往往都係最脆弱，有時去到一個臨界點，壓抑得太耐就會爆發出黎。2017年，港鐵縱火案主謀，張錦輝，同老婆離婚之後獨力照顧兩個子女，或者，平時旁人睇上黎覺得佢同一般人冇分別，但係生活嘅辛酸，現實嘅壓迫，相信唔少人明白，但係張錦輝根本無機會同人講，冇朋友、冇親人，令佢患上精神病，生存對佢黎講係一種折磨，迫不得已走上同其他人同歸於盡嘅呢條不歸路。
當然，縱火點講都係錯，社會憎恨佢都唔出奇。但係無論傳媒，大眾，剩係報導咗佢有精神病就草草了事，係，精神病的確係元兇，但係個前提係點解佢會有精神病？無人會主動去問。佢自己都唔想有呢個病，但係社會有聽過佢嘅辛酸咩？精神科醫生平均見病人嘅時間只係得8分鐘。8分鐘⋯⋯我煮再加食個即食面都係岩岩好夠時間。得8分鐘救一個人嘅思想，未免太兒戲？老實講，政府將一千億倒落去人工島，倒不如cut走每日湧落黎嘅新移民，將少少資源投放係社福方面，對成個香港唔係更加好嗎？