[星級甜故] 我條仔係 Superstar: 第十章 - 暗自落寞

繁華嘅黑夜裡面, 可可正帶淚且走咁遠離咗紅館範圍之處, 一切都已功成身退, 而可可亦已經照足偉哥嘅說話吩咐, 令到楓楓 Sir 響台上大放異彩地完成咗呢次精彩嘅比賽演出。
 
街上, 可可正一個人呆呆咁響街上遊盪住, 可可個心好亂, 就連 Carrie 同洛儀狂打電話比佢都無接聽到。
 
不經不覺已經行到去尖東某個商場嘅大電視之處, 可可望住屏幕上正直播緊全城做 B 嘅時候, 比賽終於都到咗要宣佈結果嘅時候, 但見屏幕上人群之中嘅楓楓 Sir 正面無表情咁呆企住, 想必係見到台下嘅座位之處已經唔見咗可可三人嘅蹤影。
 
司儀開始宣佈比賽結果, 第三名嘅係 Janet B, 而到第二名嘅果然就係次熱門嘅輝 B, 到咗要宣佈冠軍嘅時候, 全紅館包括商場嘅人正大叫住 楓 B 楓 B 楓 B 楓 B 楓 B 楓 B 楓 B……..
 
司儀正在刻意制造緊張, 而眾 B 嘅心情亦正在忐忑不安。



「好嘞, 全城造 B 比賽冠軍嘅就係…….嗱嗱嗱…..會唔會就係你哋嗌緊果個咁呢? . 冠軍就係……..7 號嘅楓 B。」
 
楓楓 Sir 贏咗, 楓楓 Sir 果然真係贏咗, 可可呆望住商場上嘅大電視, 見楓楓 Sir 同樣都係面無表情咁上前領獎, 但可可心內知道, 隨住楓楓 Sir 呢一刻得獎之後, 亦係佢哋兩個人需要畫上句號之時。
 
可可正想黯然轉身離去嘅時候, 但背後嘅大電視就傳嚟楓楓 Sir 正開始要發表得獎感受嘅一番說話。
 
「多謝各位有份投票支持我嘅人, 多謝各位導師, 多謝監制偉哥, 多謝各位有份為呢個節目出過力嘅工作人員………..」
 
楓楓 Sir 視線正望住台下三張空櫈位置, 跟住見佢再眼濕濕掩住個咀咁講唔倒嘢, 但現場零星女觀眾就正在大嗌。



「楓 B 唔好喊呀, 我哋永遠都支持你架。」

「楓 B 撐住呀, 我哋點都繼續支持你架。」
 
可可突然停止咗腳步, 跟住就擰轉身開始睇住楓楓 Sir 嘅繼續。

「多謝, (索吓個鼻再嚥住喉嚟講) ……響尋晚, 有一個人同我講, 佢話….如果今晚我能夠贏倒比賽嘅話, 佢就會….應承….同我響番埋一齊, 而我….今晚亦真係做到咗, (高舉住個冠軍獎座) 我已經贏咗今晚嘅比賽嘞…….
 
(再望住台下三張空櫈方向) 但我知道, 呢個女仔最終佢都唔會對我兌現佢呢個承諾嘅, 因為佢曾經同我講, 佢話….佢將會係我事業上嘅一大障礙, 而我哋亦已經係兩個唔同世界嘅人……
 


(開始又嚥住喉) 但而家我想響度同大家講, 穎穎, 無論妳而家個心入便係點諗, 但妳永遠都係我心目中嘅穎穎, 而我永遠都係咁愛妳嘅, 穎穎, 如果妳而家聽倒嘅話, 我想響紅館呢度當住大家面前咁同妳講, 穎穎,  I Love You…….」
 
全場觀眾正靜哂落嚟, 但境頭就正影住台下呀弟, 呀枉, 質奇同利安, 四個人正同時起身為楓楓 Sir 鼓掌, 跟住鏡頭再見有好多巨星亦同時起立鼓掌, 繼而就輪到全場觀眾緊隨發出熱烈嘅掌聲。
 
眨時間, 掌聲遍佈住紅館每一個角落, 而商場之內亦同樣響起雷動嘅掌聲, 跟住可可就聽倒身邊嘅人咁講。

「好嘢, 呢條 。靚仔真係有吉士, 有女使咩驚啫, 有實力先係最緊要架嗎。」

「呢個楓 B 真係堅呀, 本來我都係撐輝 B 嘅, 但而家我反而仲更加欣賞佢多啲, 好嘢。」
 
大電視正傳嚟現場觀眾正齊聲地大嗌, 「穎穎, 穎穎, 穎穎, 穎穎, 穎穎, 穎穎, 穎穎…………..」 而鏡頭就影住眾 B 上前安慰正喊緊嘅楓楓 Sir 埸面。
 
可可看在眼內, 一股突然覺得楓楓 Sir 此刻正好需要自己嘅衝動, 令佢即時就發足狂奔到街外截咗部的士上車, 「唔該, 紅磡體育館吖。」
 
節目終於都宣佈完滿結束, 後台上, 楓楓 Sir 雖然仍手執住冠軍獎座, 但面上就只流露住強顏歡笑咁面對住記者同眾人, 而響呢一刻, 楓楓 Sir 心內就只記掛住緊一個人, 一個剛對台下向佢唱出自己心聲嘅一個人。