[星級甜故] 我條仔係 Superstar: 第八章 - 決賽在即

第二日, 終於到咗全城造 B 嘅總決賽之日, 三人下晝一收咗工之後, Carrie 同洛儀就已經興奮到話要落紅磡磨到今晚入場之時, 三條女響紅館附近徘徊咗一輪再食埋飯之後, 終於, 已經到咗可以入場嘅時候嘞。
 
入到場館, 三人揸住啲飛正搵緊自己嘅座位果陣, 但當 Carrie 同洛儀發覺到原來佢哋係坐響第一行兼對正舞台中央位置嘅時候, Carrie 同洛儀即時興奮到情緒就更見高漲。
 
「嘩正呀可可, 今次真係要多謝哂妳個 friend 先得嘞。」

「果然真係識人就好過識字, 嘩, 比我班 friend 知道就實會羨慕死佢哋都似嘞。」

三人坐低咗之後, 而坐響中間嘅可可就正在神不守舍咁, 似乎佢正擔心緊一陣楓楓 Sir 響台上嘅演出有無受到佢哋二人嘅事影響。
 


現場觀眾正繼續魚貫地入場, 但突然有人正指住 Carrie 隔離嘅座位之處, 「係呢度嘞。」

三條女抬頭望吓, 跟住就已經同時呆哂響度咁, 眼前正經過響佢地面前嘅四個男人, 正正就係呀弟, 利安, 質奇同埋呀枉, 四人坐咗響 Carrie 嘅左手面之處, 而坐響 Carrie 隔離果個居然仲係佢嘅頭號型男偶像呀枉嚟添。
 
Carrie 已經嚇到膽顫心驚, 魂不附體, 見佢正在手騰腳震, 心跳加速, 而 Carrie 發夢都估唔到自己今日居然可以同偶像並排而坐, 正定哂格兼擘大口得個窿嘅 Carrie, 冷不防比熱情如火嘅洛儀衝住過嚟就嗌住四人。
 
「唔好意思, 你哋四個真係好靚仔呀, 唔知我哋三個可唔可以同你哋影張合照咁呢?」

四個人正面露住微笑, 跟住就再好 nice 咁同時企咗起身, 而出哂名好人嘅呀弟就攞咗洛儀部電話準備為大家開始自拍。



「嗱, 望住鏡頭呀, 一…二…三…笑….」 咔擦, 搞掂。
 
呀弟比番部電話洛儀之後, 洛儀即時就望吓呢張七人合照嘅靚相, 正呀, 一張發夢都無諗過可以有機會影倒嘅相。
 
三條女望住張相已經樂不開支, 又再坐番低嘅時候, 但坐響右手面嘅洛儀, 隔離位又有一個男人坐低咗響度, 洛儀望吓呢條友, 一個載住黑超但又面部肥腫嘅男人, 正木無表情咁面向住舞台之上。
 
洛儀覺得呢個男人好面善, 但一時之間又 up 唔出到底會係邊個嚟, 個男人好似發覺洛儀係咁注視住佢, 跟住見佢正細細聲咁指住個舞台同洛儀講。
 
「以前, 我曾經都同呀妹, Danny 同 Leslie 響上面一齊唱過歌, 仲記得當時我, Leslie, Danny 同呀妹響金曲季選果陣, 而我, Danny, 呀妹同 Leslie 都有幾首歌入選……..」
 


洛儀正在 send 緊相, 個男人見洛儀居然無鬼理到佢, 跟住就好無癮咁繼續扮 cool 咁呆望住舞台之上。
 
三人又再四圍咁望住, 期間又發現到有好多巨星就正坐響佢哋嘅附近位置, 校長, 黑人, 美君, 燙斗人, 周仔, 等等等等, 一時之間, 眾人身邊正在星光熠熠, 但轉眼間, 舞台上就開始煙霧瀰漫住, 全城造 B 總決賽似乎即將亦快要開始嘞。
 
一吓突然嘅音樂巨響, 緊隨節目終於就正式要展開, 眾 B 開始先嚟逐個跳舞出場介紹, 但到咗楓楓 Sir 出場嘅時候, 可可發現楓楓 Sir 好似唔在狀態之中。
 
一輪勁歌熱舞過後, 司儀跟住就再講咗一大輪節目開場說話之後, 好快地, 又到咗眾 B 正式要開始逐一比賽表演嘅時候。
 
首先出場嘅就係次熱門輝 B, 輝 B 一出場就先嚟一輪高難度嘅舞蹈動作, 全場呼叫聲正在不斷彼此起落, 現場支持者亦舉起咗無數嘅 LED 人名燈牌嚟支持自己心愛嘅偶像。
 
隨住一個一個 B 表演完畢之後, 司儀終於都宣佈下一個表演參賽者就會係今晚嘅大熱門楓楓 Sir 嚟嘞, 全場觀眾聽倒之後即時大聲尖叫狂呼住起嚟, 就連可可身邊嘅 Carrie 同洛儀都情不自禁咁一齊大聲叫住楓 B 楓 B 咁。
 
但舞台上就依然空無一人, 眾人仍正等緊楓楓 Sir 出場嘅時候, 而司儀亦正不斷重覆地宣佈楓楓 Sir 即將就要出場, 台下監制等人已經開始緊張住起嚟, 而可可亦正在擔心緊之際, 呢個時候, 楓楓 Sir 終於都響後台緩緩咁行緊出嚟。
 
現場氣氛再度熾熱, 楓楓 Sir 正緩緩咁行到舞台嘅中央之處, 但見楓楓 Sir 正面無表情咁手執住小提琴, 而台下監制等人就變得突然好緊張起嚟咁。



「呀楓佢又做咩呀? 係邊個叫佢攞個小提琴出場架?」
 
強勁音樂開始響起, 但見楓楓 Sir 依然都仲係雙眼無神咁呆企住響舞台上之中………