[星級甜故] 我條仔係 Superstar: 第二章 - 互道近況

一聲低沉嘅叫喚, 而楓楓 Sir 居然亦望倒可可就正企響佢面前嘅欄杆之處, 楓楓 Sir 見倒可可之後, 跟住見佢亦突然呆咗響度, 但人群實在太過瘋狂, 而幾個助手亦正推住楓楓 Sir 示意佢唔好停留響同一位置。
 
一吓驚醒, 楓楓 Sir 突然推開助手再擠番到可可嘅方向, 一張閃卡正刻意遞住比可可, 而可可接過楓楓 Sir 張閃卡之後, 跟住楓楓 Sir 就比助手用力推到向前繼續派發閃卡比其他粉絲。
 
可可望住楓楓 Sir 逐漸遠去, 而四周身邊攞唔倒閃卡嘅粉絲就正露住一副唔友善嘅目光嚟望住可可, 可可揸住楓楓 Sir 張閃卡正開始迫出人群離開欄杆之處。
 
現場氣氛繼續熾熱, 而可可就企咗響一處較為少人嘅地方, 正等緊 Carrie 同洛儀行番出嚟。
 
今晚嘅表演經已全部都完畢, 一眾 BB 亦已經隨住節目完結而靜俏俏咁離開咗表演場地之處, 而到咗正式開始投票嘅時候, 仍心情激盪嘅粉絲就正排住隊響現場大會設置嘅平板電腦度開始上前投票。
 


「可可。」 可可見倒 Carrie 同洛儀同佢揮住手, 「快啲過嚟幫手投楓 B 票啦。」 可可行到上前, Carrie 同洛儀見可可正手揸住楓楓 Sir 張閃卡, 洛儀首先大嗌住, 「哇, 點解妳可以攞倒楓 B 張閃卡嘅? 可可呀, 妳比張閃卡我啦, 我同 Carrie 一張卡都攞唔倒呀。」
 
可可望住洛儀苦苦哀求住嘅樣, 跟住就再諗咗一陣之後, 然後就有啲茫茫然咁同洛儀講, 「張卡…….., 等我影番張相留底先比妳啦。」
 
三人行去平板電腦度投咗楓 B 一票之後, Carrie 同洛儀嘅心情似乎好似仲未平伏倒咁, 「喂 Carrie, 我哋行去果便睇吓仲會唔會撞倒佢哋未走搵佢哋影相咯。」 但可可就正仲好似係雲遊咁住就話, 「個楓 B 咩仲未走嘅咩?」
 
三人四圍係咁搵住眾 B, 但行左好耐都仲見唔倒啲 B 蹤, 洛儀同 Carrie 就有啲失望咁話, 「喂, 不如行去停車埸門口等, 睇吓會唔會有機會撞倒佢哋架車出嚟咯。」 但可可就同佢哋講, 「咁妳哋去等啦, 我想自己搭車番屋企先嘞。」
 
同 Carrie 洛儀拜拜完之後, 可可就正獨自一人諗住行去搭地鐵番屋企, 可可行到皇室堡門口之處, 突然, 可可聽倒有人嗌咗一句, 「可穎……」
 


一把好耐都無再聽過嘅聲線, 可可望吓聲音嘅方向, 見到有個頭戴住黑超鴨咀帽口罩嘅男人正響可可不遠之處向佢揮住手, 而一種熟悉嘅感覺令到可可已經 feel 到眼前嘅人會係邊個。
 
「呀楓…….」
 
兩個人正呆咗一陣之後, 跟住口罩男就開始緩緩咁行到可可嘅面前, 黑超除低咗之後, 可可望到一對熟悉嘅眼神, 「呀楓, 咩真係你嚟呀?」
 
楓楓 Sir 同可可行咗去附近一間環境比較昏暗嘅餐廳度食飯, 期間楓楓 Sir 就只係除低口罩咁同可可開始傾住偈, 「穎穎, 我哋好耐無見嘞。」 可可點一點頭, 「呀楓, 做咩你會參加埋啲咁嘅節目嘅?」
 
二人跟住就開始詳談番數年前分手之後嘅境況, 原來響半年前左右, 楓楓 Sir比幾個朋友游說佢一齊參加呢個新免費電視台所搞嘅全城造 B 嘅節目, 但經過一輪篩選過後, 楓楓 Sir 就憑住高大而俊朗嘅外型, 到最後終於都可以突圍而出咁成功入圍接受訓練。
 


但節目一出咗街之後, 就連楓楓 Sir 自己都估唔倒佢係會咁受啲妹妹仔歡迎嘅, 到咗節目一路播放住期間, 楓楓 Sir 嘅人氣亦不斷逐漸地提昇, 所以而家嘅佢, 可以講已經成為咗城中熱門嘅話題之一。
 
楓楓 Sir 同可可講, 「穎穎, 無見咁耐, 妳而家好似比起以前仲更加靚咗咁。」 可可笑住搖頭講, 「咁比起而家嘅楓 B, 你身邊都有大把靚過我好多嘅女仔圍住你啦。」楓楓 Sir有啲尷尬咁搖住頭。
 
「穎穎, 其實同妳分手之後, 我真係有一段時間覺得係好迷茫架, 妳知唔知呀, 雖然之後我都試過同兩個女仔拍拖, 但到最後我都覺得佢哋係比唔上妳。」 可可聽倒之後心下一甜, 「唓, 而家先識得咁同人講, 不過你都就嚟做大明星啦, 其實而家我就真係高攀唔起你就真。」
 
楓楓 Sir 又再搖頭咁講, 「穎穎, 而家妳有男朋友未架?」 可可搖一搖頭, 楓楓 Sir再講, 「咁不如我同妳又再響番埋一齊吖。」