(短故）《為咗係聖誕前出pool，我居然去咗玩tinder》: 11.
我和阿君和一般的情侶無異，不過對我而言我和他心靈的交流一定是最重要的部分。
「傻妹，做咩係到傻笑。」阿君拖著我走在觀塘海濱公園上，因為我很喜歡看海，他會陪我在這些地方散步。
「我覺得同你一齊到好難得姐。」其實我們從來沒有提過tinder的事，不知道是默契還是什麼，這就好像一個共識一樣。
「我都無諗過。」他莞爾一笑：「我諗要多謝阿鋒。」
「關佢咩事？」
「唔係佢我都唔會係show個日同到你傾計啦。」他摸摸我的頭：「仲要係個咁靚嘅女仔。」
「靚你個頭，我好醜樣。」我裝作要打他，然後攬著他的腰：「唔準咁口花。」
「對住你先口花。」他把頭挨在我頭頂上，再說：「我地一月份去旅行好無。」
「咁快？」我抬起頭望著他：「去邊先？」
「台灣喇，我好耐無去過。」阿君拿出電話：「我前兩日睇個youtuber介紹台北啲好嘢食，睇到我流哂口水，一於去台北啦。」
「好，你點話點好喇。」我甜笑著說。
當晚阿君就買了一月份去台北的機票。雖然好像有點快，不過想想也沒有什麼大不了，反正我們連愛也做了，去旅行也是小事而已。
-------------------------
有晚我如常地在咖啡店收拾碗碟，當時只有我和老闆娘負責關門。
「卓怡，你同呢個男仔點識㗎？」老闆娘知道我終於再次談戀愛，不過她對阿君一無所知，只是見過他來接我下班。
「咪玩tinder，之後咁啱睇show個時就相認咗啦。」我簡單地解釋我們的相識經過，沒有講太多。
「咁搞笑？乜咁易撞到㗎咩。」她孤疑地問：「你地又肯定到對方就係果個人？」
「其實我都唔知係佢㗎，係個晚返到去佢無啦啦講得出我全名，咁我就知原來佢就係阿君囉。」
「呢啲咁嘅電影情節都畀你遇到。」
「人生如戲，戲如人生，就係咁戲劇化㗎喇。」
這時候有人推門進來，我正想大喊我們已經打烊之際，對方問口：「沈卓怡。」
「阿鋒？」我非常奇怪：「你嚟搵我？」
他一臉憔悴的樣子，比起早一個星期前的他明顯沒有精神，雙眼也佈滿紅筋。
「收工有無嘢做？」
「無嘅，本身都係返hall。」我有點擔心地問：「無事呀嘛？」
「陪我傾下計得唔得？」他嘆了一口氣：「去邊都無所謂。」
老闆娘經過聽到後拍一拍我：「你走先喇，呢到有我搞掂。」
我向她做了個雙手合十的動作，之後便和阿鋒離開了咖啡店。
「你想去邊到傾呀？」我完全不知道阿鋒發生了什麼事，只能問著這些小事，等著他開口傾訴。
「唔好去酒吧啦，你唔飲得；我地買酒去公園坐啦，你睇我飲。」他帶著我走到油麻地一條內街，這裡有一條長長的樓梯，爬上了幾十層後還要走一段路，終於來到一個遊樂場。
我們走到遊樂場對面的涼亭，這晚的月色被浮雲遮擋著，沒有街燈的位置更是暗淡無光。
「嘩，呢到咁僻嘅。」我四周環顧了一圈，這裡真的一個人都沒有：「人影都無個喎。」
「我就係貪呢到無人先走上嚟。」他馬上點起煙：「我叫呢到做大雄後山。」
「點解？」
「因為我每次一有唔開心就會自己跑上嚟，就好似大雄有咩唔開心就會去果個後山一樣。」
然後是一陣靜默，他良久才開口：「我同佢分咗手。」
「吓？幾時嘅事？」我張著嘴巴，完全掩蓋不了驚訝的情緒。
「上次見完你第二日。」
此際我更加覺得震驚。我的反應和他們分開沒有關係，反而是Celina在這段時間完全沒有找上我。
「你開口嘅？」我又問。
「係。」阿鋒慢慢閉上眼睛：「我個晚返去諗咗成晚，既然我知道佢唔係我要搵嘅人，就唔想再拖佢時間，寧願佢搵個第二個男人一齊。」
「一年唔長都唔短，點都有感情，你捨得㗎啦？」我試探著問。
「唔捨得還唔捨得，但我諗得好清楚，佢真係唔適合我。」阿鋒又張開了眼：「我想搵個同一個世界嘅女仔，但佢唔係囉。」
「點樣叫做同你同一個世界？」我好奇地問。
「例如係聽歌咁樣，我聽indie多嘅，但佢淨係聽周杰倫林俊傑個啲。唔係話唔好聽，但係唔啱我聽囉，你明唔明？」他又再嘆氣搖頭：「有時候你好想分享你鍾意嘅嘢畀佢，但當你發現佢一啲都唔感興趣，你漸漸就唔會再想講，久而久之我覺得同佢連話題都少咗好多。」
對於他的說法其實我很有共鳴，就像的和家明，簡直是一模一樣。
「係，我都咁樣諗。」我補上一句：「我同個ex都係咁樣分手。」
「所以我真係無辦法再同佢行落去。」他抽完第一根煙後又隨即點起第二根：「行多一秒我都覺得浪費緊佢時間。」
「唉，我都唔知講咩好。」以我和Celina的友誼，我替她感到可惜；但同時又很明白阿鋒的感受。
「Celina無同你講？」阿鋒問道。
「就係無，我覺得好奇怪。」我思前想後想不通Celina為什麼沒有告訴我：「我諗佢要講就會搵我掛，唔知喎。」
「如果佢搵你，唔好話佢聽見過我。」阿鋒千叮萬囑：「廢時喇，你地咁friend。」
我點點頭，然後我們就開始聊起其他事，例如他問起我和阿君。
「你同阿君無啦啦點解會撻著嘅。」他饒有意味地問：「睇show個時睇中人？」
「你當係啦，哈哈。」我不想解釋有關tinder的事，於是就輕輕帶過：「個首歌呢，我好鍾意，佢又好鍾意。」
「海浪？」
「係呀。」
「哈哈，條友仔其實第一次聽deca joins㗎咋。」
「吓？」我還以為自己聽錯：「佢第一次聽？」
「佢淨係上youtube聽過一次《海浪》囉。我本來自己買飛睇嘅，個日同佢食完飯問我有咩做，我話睇show，之後佢就跟埋嚟喇。」他一臉無奈：「我仲驚悶親佢，話哂indie嘢唔係個個人都啱。」
「哦，原來係咁。」我還以為阿君真的很喜歡deca joins，我聽到之後有一點失望。
「阿君好仔嚟嘅，如果佢恰你嘅話一定要話我知，幫你打鳩佢！」阿鋒拍拍自己心口。
我們坐在這個人煙稀少的公園裡直到五點，我們才意識到天都幾乎要亮起來。
「喂，走啦。」阿鋒先站起來：「返hall？我送你返去喇。」
「唔洗送喇，我的士返去得啦。」我連忙擺手。
「你比我送你喇，咁夜你一個女仔好危險。」阿鋒很堅持要送我，最後他送我到宿舍大堂，一直看著我直到我進了升降機。
當晚我想了又想，總覺得有點奇怪。
然後我重新下載了tinder，打開了我和K的對話，看到他原來有再找過我。
為了更肯定我的想法，我拉上去看多次和K的對話。
「嚟緊12月deca joins嚟香港！」
「真係？幾時！」
「12月16號。」「快啲買飛啦。」
我的後腦突然一陣發麻，阿鋒的話猶在我耳際：「哈哈，條友仔其實第一次聽deca joins㗎咋。」
這個晚上我居然徹夜難眠。
於是重重覆覆把所有和K的對話看過一次，我久久不能入睡。
「張poster我點樣寄畀你？」這是K最後一句和我說的話。