【校園】現實與平行時空的愛情故事: 第四十一章 – 一件影響一生的事-3 (現實)

- 第四十一章 – 一件影響一生的事-3 (現實)
 
有時候，人有好多幻想，幻想自己中六合彩，幻想自己會飛黃騰達，幻想自己有超能力，幻想自己識時光倒流。可惜，又有幾多真係可以實現呢？
 
…………………分隔線…………………
 
「起身啦！起身啦！你今日唔洗返學咩？」一把熟悉既聲音，係我阿媽。
 
「咩呀？」
 




「你唔係話今日要交報告咩？」
 
「哦。」
 
我起身，刷牙洗面。打開電視，播緊香港早晨，望望個日子，原來發完夢啦。
 
個夢幾真，好似做左好多野咁，但又好似岩岩發生完既事。
 
有時候想返去改變歷史，真係唔容易，或者支筆可以令我發下夢都好。
 




又返去繼續讀HD既日子，日復日，夜復夜既日子。
 
一返到學校就要準備Present，我拎住份準備好既講稿，我係第一組準備Present，突然電話一震，我冇理到，應該係啲訊息黎。
 
好快就Present完，緊張但講得哂，應該合格。
 
Present完之後就成組人啦啦聲走，去附近餐廳食返個Lunch。
 
大家係到講頭先Present既野，邊個邊個講得好慢，邊個邊個隻手係到震，然後我部電話又震多兩震。
 




我拎部電話一睇，詠珩傳來訊息。
 
當我見到既時候，心諗唔通真係改變左？
 
「放學諗住同我食咩呢？」
 
「今日Present成點呀？」
 
「食飯未？」
 
以上呢啲結果係幻想。
 
「你放低我啦。」
 
「搵一個比我更好既人。」




 
「我地既事已經過去左。」
 
現實終歸現實，每一年佢既生日，我都會同佢講生日快樂。
 
雖然我未試過以男朋友身份同佢渡過佢既生日，但都希望每一年佢既生日都會記得我。
 
或者係因為每一年我既生日都會記得佢既出現。
 
食完個Lunch之後就返左屋企。
 
我醒起我地我發夢同詠珩影既一張合照仲會唔會係電腦到做背景相。
 
一開電腦。
 




冇背景相。
 
我見到支筆，令我諗返起夢中見過既筆仙。
 
我拎起支筆，再伏低訓教。
 
-夢中-
 
再次見到筆仙，我立即上前追問「點解改變唔到現實既？」
 
「我冇話可以改變到現實。」
 
「咁點先可以改變到呀？」
 
「過去左既事已經過去，冇人可以真正回到過去改變歷史，否則會造成蝴蝶效應，影響好大。」




 
「咁姐係改變唔到？」
 
「過去既事已經冇得改變，你可以改變既就只有將來既自己，好好反省一下自己，為自己既將來而改變。」
 
不久，一道白光照射，我就醒左。
 
我訓醒就發現支筆已經唔係我手上，而我努力搵都再搵唔到。
 
或者我唔應該留戀過去，而係更加珍惜現在身邊擁有。
 
 
 
好快我就大專畢業，一開始就想係酒店業發展，但發覺自己唔適合做呢一行，好快就走左去地盤做散工，一做就做左幾年。
 




係幾年間，遇過既女仔唔多，但總會有幾個睇得上眼，可惜佢地睇唔上我做地盤。
 
直到智能電話更加普及，交友App更加盛行，於是我就玩交友App識下女仔，而我就遇上一個對我好重要既女仔……
 
-待續-