【校園】現實與平行時空的愛情故事: 第十四章 - 初戀的回憶-14 ( 一百分的男朋友 )
- 第十四章 - 初戀的回憶-14
自從果一日之後。
有一種期待既感覺。
期待有朝一日佢地分開。
雖然望其他人分開好似好唔應該。
但係如果係一段有問題既愛情。
咁又係唔係及早分開會好呢?
或者呢個一個正確既答案。
一日過去又一日。
我同佢又開始返每日傾電話既日子。
又係唔知點解同佢傾電話有一種好開心既感覺。
就好似佢係身邊一樣。
我同佢既關係就好似「友達以上, 戀人未滿」。
相信只差一點點, 就可以成為戀人。
直至到左三月十三日。
剛剛好一個星期。
同樣都係晚上。
同樣都係一個SMS。
詠珩話我知個師兄同佢講分手。
果一刻既心情簡直係興奮到極點。
就好似中左頭獎既感覺。
係呢一個SMS睇到佢無咁傷心。
可能佢上星期已經預左有今日既來臨。
只不過未知幾時會到。
係呢一個時候, 我諗到既只有同佢係埋一齊。
從來無諗過自己會唔會比佢當係水泡。
無諗過其他人會唔會講閒話。
我只係一心諗住同佢一齊。
於是我就提出同佢一齊既諗法。
講完之後, 覺得好緊張。
我會擔心佢會唔會拒絕我呢?
因為始終剛剛分手就提出同佢一齊。
真係好緊張好緊張。
等佢回覆既時間可能只係幾分鐘。
但感覺就好似過左幾個鐘。
一秒…兩秒…三秒…
過左唔知幾多秒鐘。
終於得到佢既回覆。
佢話可以同佢一齊。
但係要應承佢幾個條件。
做男朋友有三個月試用期。
佢會係試用期內每一日都會評分。
三個月之後就會總結分數。
合格的話就可以繼續做佢男朋友。
唔合格的話就當然無啦。
試用期間唔比拖手, 唔比KISS。
我諗都唔諗就話好。
因為我幾經辛苦先可以成為佢既男朋友。
所以佢提出咩條件都會應承。
有人會諗, 咁樣仲叫拍拖?
或者呢種係咪叫做柏拉圖式既戀愛呢?
起碼我至少都有一個女朋友。
係初戀呀!
所以我係呢一刻同自己講, 亦都同佢講。
我要做你「一百分既男朋友」!
我同佢就係咁正式開始。