【校園】現實與平行時空的愛情故事: 第一章 - 初戀的回憶-1（入學與第一位女生）

- 第一章 - 初戀的回憶-1

2006年 - 中一

第一日踏入呢一間中學, 左右兩排有班學生迎接住我, 心諗: 咁似啲軍隊列隊歡迎咁。

再行入啲就見到兩個老師企左係到, 應該係訓導老師。

突然有把聲叫我: 同學, 整理一下你件校服。





我望住佢, 佢又望住我。佢心口掛住個紅色牌寫住PERFECT。

估唔到第一日就要比人捉儀容。

結果要整完件校服先上得班房。

上一層就應該係FORM1既班房, 左望右望, 原來行到最後最尾

先係自己果班 - 1A班





隔離係粉紅色既....女廁

一入班房, 已經坐左唔少學生係到。

個個都靜靜地坐係到。

始終第一日返學係陌生啲。

不過我就見到幾個熟悉既面孔。





阿民 – 以前小學讀隔離班, 高高瘦瘦
阿昌 – 以前小學同班左3年, 矮矮地, 同佢係曾經小學足球隊成員
阿詩 – 以前小學同班左3年, 唔算高唔算靚, 150左右, 但已經有種發育完成既感覺

我立即坐去阿昌隔離。

我:『喂! 我地今年又同班啦。』

昌:『睇住細佬我呀!』

我:『大家咁話!』

過左一陣, 就有一男一女既老師入黎。

佢地介紹左自己, 原來係正副班主任。





Miss邱係正, 吳Sir係副

Miss邱會負責教我地中文, 而吳Sir會負責教我地數學

望多兩望, 個吳Sir真係幾似戇豆先生。

…………………分隔線…………………

時光飛逝, 好快就同左班內既同學熟左。
​Ken – 肥仔一個, 幾多野講, 幾搞笑, 幾玩得
阿桶 – 矮矮地黑黑地但幾cute既女仔
阿剪 – 都係個矮矮地幾cute既帶眼鏡女仔
阿飯 – 高少少白白地既女仔
阿琪 – 高高地肥肥地既女仔




阿牛 – 唔算高但睇落幾靚既女仔
阿君 – 睇落唔錯既帶眼鏡女仔, 經常語出驚人
阿魚 – 幾乖幾靜既女仔
 
當年仲係好流行msn呢樣野, 當然會加佢地既msn啦。

初初熟既時候, 我對阿剪有啲好感, 當然會多啲留意佢。

會成日係msn同佢傾計, 咁當然對佢有好感就會想知佢中意啲咩類型既男仔。

過左咁耐就唔記得佢中意啲咩類型啦。

咁當然對佢有好感就想知佢有冇中意既人啦。

咁我就係msn問左佢幾次, 佢之後仲終於肯比啲tips我啦。





我: 『你係咪有中意既人呀?成日問你都唔講』

剪: 『實死』

我: 『唔明』

剪: 『tips黎』

我: 『估唔到就真係實死啦』

剪: 『學號黎呀』

我: 『14?』





剪: 『係』

我果下係有啲SAD, 佢係我比較熟既女仔, 仲諗住有啲機會, 可惜佢中意第2個。

我: 『洗唔洗我幫下手呀?』

剪: 『點幫?』

我: 『我有我辦法』

於是我就做左佢地之間既媒人。

當年msn有得開返個群組聊天, 我就係呢個群組聊天拉埋左佢地一齊。

雖然當時我對佢係有啲好感, 在所難免係有啲失落, 但係都算係成人之美。

結果佢地真係一齊左。(雖然最後過左一兩年就散左, 但我同阿剪都keep到熟絡)