我係一個驅魔師，專幫人驅散妖魔鬼怪: 特別採訪—5
「大家好啊，我係夏舞，唔經唔覺原來神秘台靈異專輯都嚟到最後一集，真係有啲唔捨得大家啊……」
「快啲執柒去啦……（謎之聲）」
「咳咳……最後一集，當然邀請咗重量級嘉賓啦！佢就係嚟自教廷，閱鬼無數，驅除過嘅妖魔數量足以堆積成山，地位僅次主教嘅穆爾泰樞機！」
「……你好。」
「話說最近穆樞機人氣急升，對呢件事你有咩睇法？」
「……無睇法。」
「哦！不為名聲，只為幫有需要嘅人，睇嚟穆樞機係一位做實事嘅驅魔師啊！」
「我只係履行教廷給予我嘅職責，除此之外其他嘢一律唔重要。」
「果然係硬漢子！聽聞你同凌先生，仲有白寧小姐係相識，係咪？」
「……佢係若兒嘅徒弟，若兒曾經係我麾下學生同伙伴，而小妹妹係凌寧壹嘅徒弟。」
「哦……原來大家之間嘅關係係咁！其實我想問下，係咪一定要有陰陽眼先有資格做驅魔師？」
「都唔係，睇唔睇到靈體取決於視錐細胞，部分人視錐細胞基因突變，能感知更廣泛頻率嘅能量，因而見到靈體。我哋以科學手法分析，製造出令所有人都望到靈體嘅隱形眼鏡，所以陰陽眼已經唔再特別。」
「原來有啲咁方便嘅道具㗎！邊度有得買㗎，我都想要啊！」
「只有受認可嘅驅魔師先可以買到。」
「嗚……原來係咁，但戴住隱形眼鏡驅魔，唔驚萬一太激烈會甩咗嘅咩？」
「……你幾時見Hulk變大時會撐爆條褲？」
「哦，原來係咁（穆樞機睇落咁cool，原來仲幽默過我）……其實網上有個熱哄哄嘅傳聞，前排香港發生咗宗教恐怖襲擊事件，凌先生佢……」
「……佢係個稱職嘅驅魔師。」
「我仲記得佢上次上嚟專訪嘅時侯……估唔到係真，我哋為佢默哀一秒鐘。」
（默哀）
「穆樞機，你介唔介意我問關於凌先生嘅問題？」
「無問題。」
「凌先生佢平時住邊㗎？」
「……」
「Sor……我仲以為唔好一開始問啲咁沉重嘅問題，可以俾氣氛輕鬆啲……」
「佢爸媽本身有間屋，加埋保險，我哋幫凌寧壹賣咗間兇宅之後，佢用筆錢喺出面買咗個單位自住。」
「我聽講過，若兒係凌先生害死，其實一直以嚟到呢刻，你對凌先生有咩睇法？」
「……我從一開始就唔鍾意佢，永遠一副憂鬱嘅樣，好似自己係全世界最慘嘅人，之後佢害死若兒，將若兒嘅屍首煉成昆迪拉，褻瀆死者……我對佢嘅憎恨嗰刻開始一直無停止過，一直，一直……直到嗰件事。」
「嗰件事？」
「直到……我見到佢俾若兒嘅怨靈，以及佢對自己嘅憎恨束縛。」
「……」
「咁多年嚟，佢都俾呢一切束縛，活喺虛假之中，我就只覺得佢……好悲哀，而且亦覺得自己……無資格再憎恨佢。」
「點解？」
「因為佢為咗若兒，不惜付出一切代價，包活被當成十惡不赦嘅人。當佢想將天魔連埋無辜嘅龐亮消滅時，我無辦法阻止到佢……」
「因為當時受咗重傷？」
「係因為，我心底裡，都想幫若兒報仇。」
「……你並無錯，你同凌先生一樣，或者世人眼中呢一切係罪大惡極，但唯獨你兩個人知道，呢一切係應該要做嘅事，即使所有人認為係錯。」
「從嗰刻開始，我就已經放低一切。」
「咁凌先生死嗰陣，你有無感到難過？」
「我……認為對佢『難過』係侮辱咗佢嘅覺悟，亦侮辱咗若兒。」
「點解……？」
「因為佢同若兒一樣，為咗珍惜嘅人不惜一切，當我知道佢要赴死時，我喺身上再次望到若兒嘅影子……係無論點樣都無法阻止，只有死亡才能停止落嚟嘅信念。」
「真係命運弄人……」
「我有嘅，只有『無力』呢兩個字。當日若兒為救佢犧牲性命，今日佢為救白寧犧牲性命，然而呢兩次我都只能眼白白望住佢哋咁做，但咩都做唔到，咩都改變唔到……！」
「呢一切唔係你嘅錯。」
「我責無旁貸，若兒係我嘅學生，凌寧壹係若兒留低嘅遺產，但最後我保護唔到若兒留低嘅嘢。」
「但係佢哋留低嘅嘢並無中斷，唔係咩？」
「嗯，係白寧。」
「你有無諗過收白寧為徒，繼承佢哋兩個人嘅意願？」
「我曾經向佢提議過，不過佢拒絕咗。」
「啊？點解佢要拒絕嘅？」
「對我嚟講，佢哋三個都係重要嘅人，但對佢嚟講，重要嘅人只有一個。」
「……真係一件令人傷感嘅故事。」
「喺呢個世界，悲劇無時無刻發生，所以先會有驅魔師出現。」
「都差唔多，不如我哋輕鬆返少少！話說好多網民都認為你係個肉盾，對此你有咩睇法？」
「……你玩lol都要坦幫adc吸傷啦。」
「哦，原來係咁（穆樞機睇落咁浪子，原來仲潮過我）……喺嗰次恐怖襲擊，除咗你之後，教廷係咪仲派咗支援嚟香港？」
「嗯，當中有部分係其他城市嘅樞機。」
「最後教廷損失慘唔慘重？」
「因為太陽神殿召喚咗Aamon同Asmodeus，有唔少同胞戰死，包括四位樞機。」
「Aamon同Asmodeus……都係實力非常高嘅惡魔？」
「Aamon係所羅門七十二柱魔神第七位，位階侯爵嘅惡魔，Asmodeus更係位階為王，被認為係魔王級別嘅大惡魔。」
「咁犀利……最後你哋係點驅散佢哋？」
「Asmodeus附身咗喺一位太陽神殿主教身上，不過佢實在太強大，嗰個主教嘅身體十分鐘後就完全潰散，Asmodeus亦自然回歸異空間。Aamon相對而言較為難對付，但集合多位樞機，加上特警協助，總算係成功將佢驅逐返異空間。」
「Wowwwww……教廷果然名不虛傳，可以寫埋個故講都得！」
「我希望唔好，因為我哋都唔想事跡太張揚。」
「嗯，明白……睇嚟今日時間差唔多啦，好多謝穆樞機上嚟接受專訪。神秘台靈異專輯就完啦，好多謝大家一直以嚟支持，我係夏舞，下個節目再見！」
＊
穆爾泰離開之後，攝影棚停機，夏舞拎住本記錄一直以嚟所有嘢嘅筆記簿，邊吹口哨邊喺走廊行。
「呢個世界，原來仲有咁多我哋唔認知嘅知識……太陽神殿或者先係正義嘅一方，可惜人類總會被虛假嘅對與錯蒙蔽，畢竟歷史係勝者寫出嚟嘅故事，真相從來埋於泥土之中。」
腳步聲喺寂靜嘅長廊徘徊，夏舞嘅身影消失於漆黑長廊之中。