我係一個驅魔師，專幫人驅散妖魔鬼怪: 89
呢個攤檔係汽水圈，我哋要將直徑稍微大過汽水樽嘅膠圈拋過去套住汽水樽。
睇落雖然好易，但實際上好難，而且呢啲攤檔遊戲通常經過精心設計，令人好難掟得中。
不過，為咗尊嚴。
「為咗公仔。」白寧大嗌一聲。
我哋一定要掟中！
哐啷哐啷哐啷哐啷——
我哋用最後五個代幣買咗一桶膠圈，然後喺嘈雜嘅汽水樽聲之中搵個空位，開始不停拎起膠圈向汽水樽拋過去！
哐啷—！
哐啷—！
哐啷—！哐啷—！哐啷—！哐啷—！
「喂！唔好亂掟先得㗎！」我一嘢拍落白寧個頭。
果然係呃錢game，膠圈太細，加上係橡膠膠圈，基本上只要稍微唔準就會彈走。
就算身為驅魔師，身為敏捷嘅我，要玩呢啲需要極度精準同靈活嘅遊戲都唔容易。
倒不如講，運氣比技巧更重要。
「啊啊啊啊啊啊！中咗啦！」
我隔籬嗰個師奶指住汽水樽上嘅膠圈，大聲尖叫。
仆你個街。
但運氣唔係一樣實質控制到嘅事物，佢只係一個概率，唔會因為你祈一祈禱就會變得好運。
已經拋咗大半桶膠圈，但都仲未拋得中一個汽水樽。
「剩返最後五個膠圈。」我望向白寧，「我哋輪流掟埋去。」
「嗯！」白寧先拎起一個，然後拋過去。
哐啷—！唔中。
我又拎起一個，再拋過去。
哐啷—！唔中。
哐啷—！白寧再拋一個，唔中。
哐啷—！我又再拋一個，都係唔中。
白寧拎起最後一個膠圈，但準備拋出去時我撳停咗佢。
「一齊拋。」我將手搭喺佢手上，「最後一個唔俾你拋。」
「……嗯。」白寧燦爛微笑，「好呀。」
我哋一齊拋出最後一個膠圈——
哐啷—！
膠圈同汽水樽碰撞，發出清脆嘅玻璃聲，然後——
「……中……中咗啊！」白寧拉住我手臂，興奮到跳起嚟，「小凌！你睇！」
膠圈啱啱好卡住咗樽蓋位，跟住慢慢滑咗落去。
唔通……奇蹟真係存在喺呢個世界？
明明只係攤位遊戲，但當職員將半身大嘅狗狗公仔抱到我哋眼前時，我嘅嘴角不經意向上翹起。
呢種……係幸福嘅感覺。
「小凌，多謝你。」
白寧攬住狗狗公仔，臉上掛起十分歡喜嘅笑容。
「如果無小凌同我一齊拋，就未必掟到呢個公仔返嚟。」
又再次心動咗下。
原來幸福嘅感覺係咁美好，而家嘅話……大概應該可以？
我將視線移埋一邊，然後話：「就算今次掟唔到，你想要嘅話下次我都會幫你掟。」
「真係嘅？」
「嗯。」
「啊！係喇，我差啲唔記得！」白寧將狗狗公仔遞過嚟，「小凌可唔可以幫我拎住先？」
我單手接過半身大嘅狗狗公仔，而白寧就從手袋拎出一個粉紅色膠袋。
「嗱，畀你。」白寧將粉紅色膠袋遞畀我。
我接過膠袋，從膠袋拎出一個錫紙盒。
大概唔使問，都知入面係啲咩嚟。
我將狗狗公仔掉返畀白寧，然後小心翼翼打開錫紙盒——
無錯，果然係朱古力。
只不過，呢塊……唔係，呢一大舊朱古力有啲奇怪。
「我聽Shelly佢哋講情人節要送朱古力畀男仔，所以我特登請教佢哋，然後自己整出嚟㗎。」
呢舊……係一比一匕首形狀嘅朱古力，不過凹凹凸凸，仲已經溶咗一大半。
「啊！點解會溶咗嘅……」白寧嘟起嘴，一臉可憐望住自己嘅作品。
仲要咁大舊朱古力，你期望我可以點食？定係其實係拎嚟斬人？
唉……算啦。
「小凌，你——」
「好食。」
我徒手拎起呢舊黏手到不得了嘅朱古力匕首，放落嘴咬。
好甜，好膩，而且……呢舊係金莎嚟。
「真係好食？」白寧愣問。
「嗯，不過咁大舊，你同我一齊食。」
我一嘢將朱古力匕首塞落白寧個口，佢嗚嗚聲咁叫，食到成嘴都朱古力。
將金莎煮溶將雪返凍就叫整朱古力，白寧淨係識學埋呢啲垃圾知識。
不過呢把匕首……幾有心思。
真係特別嘅禮物。
食完之後，我問白寧：「你做咩無啦啦送朱古力畀我？」
「因為Shelly佢哋話情人節係送朱古力畀男仔嘅日子。」
「咁佢有無同你講要送畀心儀嘅對象？」
「啊……佢又無講。」白寧頓時面紅耳赤，「原來……係咁㗎？」
「點解你連呢啲嘢都唔知，你呢十幾年人生究竟學過啲咩？」
「呢十幾年人生……」白寧聲量忽然漸漸變細，「唔！就算知，我都會送朱古力畀小凌你！」
「點……點解？」我個心跳得愈嚟愈快。
白寧輕輕抬起頭，水汪汪嘅眼睛同我對視，粉色嘅嘴唇微微張開。
「因為，小凌係我最珍惜嘅人。」
睇嚟……我諗多咗。
白寧，始終係我認識嘅白癡妹。
我冷靜返自己無謂嘅情緒之後，輕輕拍落白寧個頭。
「雖然整到成pat屎，不過多謝。」
我同白寧坐喺角落，身邊擺放住巨大嘅狗狗公仔，邊望日落邊慢慢食朱古力。
我，大概搵到自己想做嘅事——
我認清應該守護嘅事物。
「下次唔好再用金莎整啦。」我食埋最後一啖朱古力，「你知唔知三月十四係白色情人節？」
「三月……十四？」白寧呆咗呆。
「係男送朱古力畀女嘅節日，到時你學下嘢，下次整返舊似樣畀我。」
「下次……無……下……」白寧低頭喃喃自語。
「你講咩？」我皺起眉頭。
「無嘢！」白寧抬起頭，燦爛咁笑住講：「下次我會整靚啲畀你！」
「聽住先。」
夕陽嘅光芒，映射白寧嘅笑容上。
然而——
我無察覺到——
幸福嘅背後——
終焉正在來臨——
自嗰日之後，我再無見過白寧。