我係一個驅魔師，專幫人驅散妖魔鬼怪: 82

＊

第二日，我同穆爾泰喺教堂準備。

白寧並無罷休，再三咁不停騷擾我纏繞我，係都話要跟埋去。

「我要去！小凌！我要去！」白寧死命扯住我手臂。

「今次太過危險，我驚你會出事。」我嘗試鬆開佢隻手，可惜唔成功。





「我唔驚！無我喺度我先驚你會出事！」

……無你喺度我先唔會出事下話？

「夠喇！」

我用力甩開佢隻手，然後輕輕拍一拍佢個頭。

「下次，下次我會帶你去。」





白寧呆咗呆，如同聽話小貓乖巧咁望住我。

「你講㗎！下次唔可以再掉低我！」

「嗯。」

我同白寧道別之後，行到穆爾泰身邊。

「講完拜拜？」穆爾泰問咗句。





「嗯。」

「真係諷刺，依家嘅你竟然好似當日若兒咁。」

「……的確有少少似。」

我同若兒都帶住一個不知天高地厚，永遠唔聽人講嘢嘅頑劣徒弟。

「出發喇。」

之後，我同穆爾泰去到阿瞳屋企門口。雖然出面睇落與一般別墅無異，但裡面存在住非常強大嘅靈體。

「你諗住點樣入去？撳門鐘？爆門入去？」

「我有鎖匙。」我拎出一把門匙，係上次阿堯開門之後我從佢身上偷返嚟。





因為要預料意外情況，所以我趁阿堯唔為意偷咗佢把門匙。

「哦，咁入去。」穆爾泰語氣隨便咁講。

佢唔係真係問緊我方法，只不過係禮貌上問我一句，實際佢個腦入面已經有各種爆入人屋企嘅方法掛。

我將門匙插入鎖孔，輕輕推開大門。

就同上次一樣，裡面一片昏暗。

我同穆爾泰打咗個眼色，小心翼翼行入屋內。

根據上次經驗，大概從我哋踏入屋內嗰下，Ah Puch就已經察覺到我哋存在。





叮、叮、叮——

玻璃敲打聲緩緩傳出，令人毛骨悚然嘅詭異音樂響遍全屋。

行到飯廳位置，飯檯上幾支點燃嘅蠟燭，一家四口坐喺飯廳滿顏歡笑，邊傾偈邊食飯。

溫馨得令人恐懼。

原本倒塌咗嘅書架回復原狀，水晶吊燈依然喺天花版，應該留喺地下嘅燃燒痕跡亦都唔見，就好似咩都無發生過。

阿堯非常孝順咁主動夾餸畀佢爸爸，同Shelly以及浩然形容嘅阿堯，同我認知嘅阿堯有非常大嘅出入。

「佢哋幾溫馨。」穆爾泰輕聲講咗句。

「我知你講緊笑。」





突然，佢哋忽然停低晒手，全部望向同一個地方——

喺木櫃上，一個如同黑炭般嘅雕像。

被我燒毀嘅雕像。

本應還原一切嘅大廳，唯獨呢個雕像並無復原。

阿堯雙手緊握，低頭向住雕像祈禱：「多謝Ah Puch大人，賜予我食物，指引我人生方向……偉大嘅神……」

「偉大嘅神！偉大嘅Ah Puch大人！偉大嘅Ah Puch大人……」

全家人都一齊向雕像不斷跪拜，雙眼失去靈魂，就好似機械人一樣不停重覆同一個動作，講出預設嘅句子。





彷如邪教崇拜儀式。

「偉大嘅Ah Puch大人……點解……點解你要俾人咁樣對待……」

蓬—！檯上燭光剎那間熄滅，但好快又著返。

不過，眼前飯檯卻空無一人。

危機感侵襲腦海，背後傳嚟一片寒意。

忽然，有雙手從背後將我拉住！

「Ah Puch大人……Ah Puch大人……」阿堯嘅頭從我膊頭伸過嚟，雙眼睜到大一大望住我。

平淡而毫無感情嘅聲音喺大廳不停徘徊，重覆呼叫同一個名字。

「為咗Ah Puch大人，貢獻自己身體吧……」

阿瞳拎住一把餐刀，向我心臟捅過嚟！

我俾阿堯捉住，無辦法避開，於是我捉住阿瞳手腕，將刀尖嘅方向推埋一邊！

突然，阿瞳雙眼反白，無力向側邊瞓低。

我趁呢個機會，猛然向身後嘅牆壁撞過去。阿堯慘叫一聲鬆開雙手，我瞬間移到佢身後，將佢反手壓落地下。

「Ah Puch大人！Ah Puch大人！」

阿堯發狂大叫，唔理會膊頭甩骹折斷，強行扭轉身體用另一隻手搲實我塊臉。

「咁樣係唔夠。」

穆爾泰走到阿堯面前，一個手刀打落佢後頸，阿堯就瞬間暈低過去。

「洗腦程度嚴重嘅人連痛楚都可以忽視，最簡單直接嘅方法係打暈佢。」穆爾泰手勢老練，短短幾秒就將阿瞳同阿堯打暈。

作為教廷樞機級嘅驅魔師，曾作為教廷衛兵進行軍事訓練，有普通人觸及唔到嘅僱傭兵級別身手。

嗖—！燭台突然從飯檯飛過嚟，穆爾泰從羊皮大褸拔出一把銀色短劍，打飛燭台！

「果然唔係一般靈體。」穆爾泰冷靜望向大廳。

周圍傳出轟隆轟隆聲，電視機自己開著，煤氣爐自己撻著火，水龍頭自己開水，冷氣機自己開到最大。

嘶嘶嗎沙……沙呢㗎咯……沙沙沙沙沙……

電器混雜嘅響鬧聲交叉徘徊，卻有節奏混成有規律嘅音節。

「佢講緊咩？」我問。

「聽唔出，又無Google Translation。」穆爾泰聳肩。

我吐一口氣，然後以流快嘅動作拎出銀刀，向如同黑炭嘅雕像掟過去！

「無用，佢唔喺舊炭入面。」穆爾泰搖頭。

的確，嗰舊黑炭並無能量依附。

「如果你朋友老豆將嗰道靈體嘅載體從遺跡帶返嚟，咁依家應該喺屋入——」

蓬一聲，穆爾泰喺身邊消失！

我回頭一望，發現穆爾泰被股無形嘅力量釘喺牆上！