我係一個驅魔師，專幫人驅散妖魔鬼怪: 77
「你……話咩話？」白寧一臉愣然。
「你無聽錯，我會放棄做驅魔師。」
「點解……？」
「最初我做驅魔師係為咗陪喺若兒身邊，之後我做驅魔師係為咗贖罪同報仇，但如今呢一切都唔存在。」
所有事情已經了結。
「所以，我再無理由再繼續去做驅魔師。」
「師父唔做驅魔師嘅話……咁諗住做咩？」
「唔知，可能……做返個平凡人，重新去搵自己想做啲咩。」
「咁……」
白寧欲言又止，我哋互相沉默對視。
過咗陣，白寧彷似鼓起勇氣，將下半句講出嚟。
「咁師父可唔可以……係為咗我繼續做驅魔師？」
「為咗你……？」我腦海一片困惑。
「我……我唔係有咩特別意思，只係……」
白寧唔知點解臉頰羞紅。
「我同師父，就只有驅魔呢樣嘢連繫住我哋。如果師父唔做驅魔師，咁以後……就無人教我驅魔……」
「仲以為你想講咩。」
「以為……我想講咩？」白寧既吃驚又氣憤，「我好認真㗎！」
「放心。」我拍一拍白寧個頭，「我係話唔再做驅魔師，但暫時會繼續做落去，同埋就算我唔再做，我都會繼續教你驅魔。」
「即係……師父你終於承認我係你徒弟？」原本一臉憂鬱嘅白寧頓時雙眼發亮。
「……師父你個頭。」我摸摸下，一嘢大大刀拍落去。
「哎呀！」白寧眼泛淚光撳住個頭。
「仲有，你無必要係咁叫我師父。」
「師父……」白寧又一臉無辜，「你要逐我出師門喇？」
「收返起你個死人樣先，我意思係——」
「師父你終於承認我係你徒弟喇？」
「就算唔承認，你都會繼續騷擾我，承唔承認有意思咩？」
「Yeah！太好啦，師父終於認我係佢徒弟！」白寧興奮到跳起嚟，「咁師父你想我點叫你好？叫返你凌先生？」
「你又唔係我委託人。」
「凌仔？」
「……撩交打？」
「咁我應該叫你……」
白寧歪一歪頭，睜大水靈嘅眼睛。
「小凌？」
「……你鍾意。」
我急步向前行，將白寧撇甩身後。
「小凌！等埋我啊小凌！」白寧邊追住我邊大叫。
若兒，睇嚟我仲要繼續做驅魔師，教導呢個傻妹去驅魔。
就好似嗰陣嘅你對我做過嘅一樣。
＊
下個禮拜陸續有好多project，所以我同Shelly佢哋基本上日日上完堂都留喺自修室繼續做project。
但呢幾日阿瞳都係無返學。
「阿瞳仲未搞掂佢細路咩？呢幾日都唔返學嘅？」我邊做project邊問。
「我都唔知，whatsapp佢又無人應。」Shelly答。
「你試下打畀佢問下？下個禮拜就要present，到時佢嚟唔到就大鑊。」浩然話。
「打過啦，今朝先打完，無人聽。」
「咁奇怪？」我驚阿瞳可能係出咗啲咩意外，「我試下打。」
我拎出電話打畀阿瞳。
嘟——嘟——
嘟——嘟——
「……喂？」電話接通咗。
「喂？阿瞳，做咩呢幾日唔返學，下個禮拜要present喎。」
「哦，無嘢呀。」
「係咪未搞掂你細路？」
「我細路……係呀，佢真係好麻煩，如果你見到佢嘅話同我講聲。」
「哦……你聽日會唔會返學，如果你太忙我叫浩然做埋你嗰part。」
「唔使喇，我最近諗通咗啲嘢。」
「諗通咗……？」
唔知點解覺得阿瞳講嘅話有啲奇怪，可能要Shelly同浩然先明。
我開咗擴音，示意Shelly同浩然一齊過嚟聽。
「我以前讀書係為咗搵多啲錢，報答返爸媽養育之恩，但我發覺係錯，因為我發現咗另一樣更值得我投放精神嘅嘢。」
我、Shelly、浩然面面相觀，唔明阿瞳究竟想講啲咩。
「所以我會退學，唔會再返嚟做project。」
雖然唔明白，但大家都感到奇怪。
阿瞳呢個決定，實在太過突然。
「喂，阿瞳！」Shelly對住電話大叫，「你講嘅究竟係啲咩？」
「嘿嘿嘿……」阿瞳發出同佢唔夾嘅低沉笑聲，「你過嚟我屋企就知……」
咔嚓——
阿瞳講完呢句話之後就收咗線。
「喂，阿瞳……係咪有啲唔妥？」Shelly呆咗咁問。
「阿瞳平時好著緊學業，點會無啦啦話唔讀就唔讀？」浩然答。
「我哋不如去佢屋企睇下佢？」Shelly提議。
有種不安嘅預感。
即使唔係熟悉阿瞳嘅我，亦感覺到啱啱嘅阿瞳判若兩人。
做完手頭上嘅嘢之後，我哋就出發去阿瞳屋企。
不過行到學校門口時，Shelly忽然停低腳步。
「嗰個人……」Shelly指住一個企喺門口，頭髮紮辮嘅男人，「好似係阿瞳細路……」
我諗起阿瞳講過，如果見到佢細路記住同佢講。
唔通阿瞳變到咁奇怪係關佢細路事？
「我記得好似叫阿堯……喂！等等！Shelly！」浩然未講完，Shelly就向紮辮男跑過去。
「喂！」
Shelly忽然一手捉住阿堯衣領，嚇到阿堯呆咗呆。
「你做過啲咩嚟？點解你家姐無啦啦話唔讀書？」
「你……講乜撚嘢啊？」阿堯捏住Shelly手腕，捏到Shelly痛苦大叫，「佢唔讀書，關我撚事咩？」
「啊啊啊！好痛啊！放手！」
浩然即刻跑過去，將Shelly同阿堯拉開。
「你有無搞錯啊你！問你一句啫使唔使起晒鋼啊？」浩然見到Shelly表情痛苦，馬上變得怒氣沖沖，「係咪撩交打啊？」
「撩乜撚啊？我唔係嚟搵你哋！驅魔師呢？驅魔師喺邊度？」
「驅魔師……？」Shelly同浩然一頭霧水。
「佢成日話咩有個同學係驅魔師，好勁識驅魔，我係嚟搵佢嘅，快啲叫佢躝出嚟！」
「喂！你搵人有無禮貌㗎？唔該都無聲！」Shelly痛苦撳住手腕，但依然挺起胸膛反駁。
「麻撚煩……你唔講唔好怪我唔客氣。」
雖然阿堯態度極度地差，但直覺話畀我知……佢搵我係有原因。
我行到佢面前話：「我係驅魔師。」
「你係？」阿堯打量我一身，「我有嘢搵你幫手，依家已經唔理得你係咪堅。」
「關阿瞳事？」
「你真係醒，無嗰兩條友咁雷……總之廢話唔講！」
阿堯雖然一臉不屑，但語氣行間卻非常焦急。
「我屋企兩隻老嘢同埋白癡家姐黐撚咗線……好似俾嘢上咗身咁。」