我係一個驅魔師，專幫人驅散妖魔鬼怪: 73

「你係……若……兒？」

「小凌，多謝你。」

附身白寧嘅若兒抬起頭望住我。

「多謝你一直保護住我嘅魂魄，幫我報仇殺死天魔，對我付出咁多。」

「點解……你要突然以呢個姿態出現？」





「點解……？」若兒呆咗呆，「唔通……小凌你唔鍾意我咁？」

一時間，我無法回答。

「我……實在太鍾意小凌，太過忍唔住……當我見到小凌為咗我殺死天魔嗰下，我就已經再忍唔住……」

若兒瞪大圓圓雙眼，興奮咁望住我。

「我想……我想可以實實在在咁陪喺小凌隔籬，而唔係只係一道摸唔到嘅魂魄……」





若兒緊緊攬住我，然後膽怯抬起頭。

「小凌，你鍾唔鍾意……如果咁樣令你覺得難做，我就隨時離開呢個身體。」

彷彿回到當年。

彷彿可以再攬住若兒嘅身軀，感受若兒嘅溫度。

我……不自覺咁將雙手放喺若兒身後。





「鍾意，我最鍾意若兒。」我緊緊攬住若兒，聞住佢嘅秀髮。

「我都最鍾意小凌。」

若兒低頭依偎喺我心口。

「無論其他人點睇你都唔緊要，因為我知道小凌係為咗我所以先做出呢一切。對我嚟講，只要小凌喺我身邊，就咩都唔怕。」

呢啲全部都係若兒生前從未同我講過嘅話。

而呢番話語，將獨自墮入深淵嘅我拉返上嚟，抹去我心中嘅空虛。

「若兒……」

「哈！我諗起樣嘢！」若兒放開我，雀躍拉住我去廚房，「好耐無煮過飯畀小凌你食，不如我哋一齊煮飯仔呀？」





「一齊煮飯仔？」

「係呀，唔通你仲要我一個人煮？」若兒鼓起臉腮，叉住腰講，「小凌你都大過仔啦，梗係要嚟幫手！」

「哦……」我呆咗呆，然後笑住答：「嗯，一齊煮。」

呢一刻我似身處夢，就好似若兒返生一樣。

無論若兒係咪真係返生，都無所謂。

「喂，你識唔識煮意粉㗎？啲意粉淥咁少邊夠㗎！」

「咁平時自己一個人，食幾多都無所謂。」





「咁依家你要好好度過份量喇！因為我非常大食㗎！」

嗰一日，我將若兒嘅屍首煉製成昆迪拉之後，若兒嘅鬼魂隨即顯現眼前。

「小……凌？」

「對唔住……若兒。」

若兒展現非常訝異嘅表情，佢好快明係咩一回事。

「我唔想同你分開，所以我——」

我仲未講完，若兒已經行過嚟攬住我個頭。

雖然一攬手臂就穿透咗我身體。





「唔緊要小凌，唔緊要。」若兒輕輕作出撫摸我個頭嘅動作。

「若兒……」

「呢個係我嘅責任，我唔應該咁樣離你而去，所以如果你期望我以咁嘅形式出現，亦無問題。」

縱使純白嘅煙霧無法被觸碰，溫柔嘅溫暖始終如一。

「我向你發誓，無論發生咩事，我都唔會再次離開係身邊……永遠唔會。」

即使生死相伴，亦永不分離……

其實，只係無法接受孤獨。





「我記得小凌鍾意食蕃茄汁，有無錯呢？」

其實只係想去尋求救贖。

「小凌要食肥啲先好，整多兩條廚師腸畀你嘆下先！」

我心中，只係想要呢一切。

「小凌，啲意粉好唔好食？」

「好食。」

「咁呢杯咖啡呢？」

我慢慢拎到嘴邊，輕嚐一口，苦澀嘅感覺瞬間湧入味蕾。

「……好飲。」

「真嘅？我第一次沖咋，以前小凌唔鍾意飲咖啡，所以我唔識沖咖啡㗎。」

「真係好飲。」我微微一笑，「只要係若兒沖嘅就好飲。」

「小凌賣口乖。」若兒露出甜蜜嘅笑容。

之後，我同若兒再無出聲，靜靜咁食完呢餐飯。

靜靜咁享受呢八年嚟錯失咗嘅時光。

食完之後，若兒邊抹嘴邊問：「小凌，你想唔想我以後都好似依家咁，煮飯畀你食？」

「……當然想。」

「我有一個方法。」

若兒嘴角展現出無比幸福嘅笑容。

「只要將呢個身體嘅靈魂用昆迪拉消滅，再由我附身，我就可以永遠陪喺小凌身邊。」