我係一個驅魔師，專幫人驅散妖魔鬼怪: 68
……咩話？
「其實……我哋一早知白師妹收留咗你喺佢屋企，雖然師父極力反對，但白師妹堅持咁做。」
嗰個傻妹……
「如果你有佢消息，記住同我講！」肥師兄好緊張咁講。
收線之後，我即刻打畀白寧。
嘟——嘟——
嘟——嘟——
無人聽。
我邊心急咁喺大廳來回行，邊繼續打電話畀白寧，但依然無人聽。
究竟佢去咗邊？
「小凌。」若兒出現喺我面前，「點解你咁擔心白寧？」
「……吓？」我呆咗呆。
「明明……明明我講過會同你戰鬥同底，點解你要搵埋白寧幫手？」
若兒……果然有啲奇怪。
自從佢返嚟之後，就一直有種違和感。
而且，佢對白寧嘅稱呼改變咗。
「就算……到最後係點，我都會喺你身邊，同你永不分離。」
「……若兒你究竟做咩嘢？」我忍唔住問。
鈴鈴鈴——
係白寧來電！
我即刻接聽，但電話另一端卻一片寂靜。
「喂！白寧！」
「嘻嘻嘻嘻……」電話傳出卻係竊笑聲。
「你係……龐亮？點解白寧部電話會喺你度？」我緊張大叫。
「因為呢個小妹妹身上嘅秘密實在太有趣，從第一日見到佢，我就已經對佢好有興趣。」
果然，嗰日我送白寧落樓下之後喺街遇到嗰道黑影係佢！
「你唔好亂嚟，如果唔係我殺死你！」
「又係呢句？你會唔會太悶呀？想威脅人都畀啲心意啊！」
「你條仆街！」
「好喇好喇，我唔會殺呢個小妹妹住嘅，佢係預料之外發掘返嚟嘅寶物！不過呢……過咗今晚，可能就有大把人會死啦！」
今晚……唔通就係嗰個法陣？
「嘻嘻嘻嘻！我知你知我喺邊嘅，我好期待同你，仲有驅魔師小姐再見面！嘻嘻嘻！」
「喂！喂！」
收咗線。
白寧俾龐亮捉走咗。
但有件更加嚴重嘅事情——
睇怕龐亮設嘅係屬於一旦啟動可以奪去大量人命嘅法陣，以佢嘅性格甚至係奪去靈魂嘅法陣。
鋼煉裡面將成個城市所有人命煉成嘅劇情唔係天荒夜譚，只要畫到咁大個法陣，自然就對咁大個區域有效。
當然要將一個法陣畫到成個區咁大係好難，但若然繪畫多個有規律排列嘅連鎖法陣，亦能做到同樣效果。
後果不堪設想。
之後，我打電話畀霍靜同佢講呢件事。
「竟然發生啲咁嘅事……放心，我哋會救返白寧小姐。」
「我都要去。」
「我講過你要喺醫院好好休養，你傷患一個去到又有咩用？呢度交畀我同穆樞機就得。」霍靜始終態度強硬，唔准我插手呢件事。
好彩，佢唔知我偷偷從醫院逃走。
就算佢唔俾我介入，我都要插手呢件事，親自將白寧救返嚟……以及殺死龐亮。
銀刀、噴霧、電筒、鎂粉……我拎晒所有嘢，將所有派得上用場嘅嘢都帶上。
包括昆迪拉。
「若兒。」我將昆迪拉放入褸袋，「我需要你，同我並肩作戰。」
若兒呆咗呆，又驚又喜，臉頰微微泛紅。
「放心，我同小凌永不分離。」若兒化成白煙，竄返入昆迪拉入面。
執拾好驅魔工具之後，我就出發去目的地。
我跟住地圖，夜晚八點到達一個棄置嘅工地。
繼續向前行，喺最裡面位置有個廢棄工廠。
車閘並無閂埋，但濃烈嘅黑霧從車閘不斷湧出。
我打開電筒行入去，見到裡面有個人瞓咗喺地下。
「……霍靜？」
我即刻行過去，但幾道黑色嘅能量喺我面前竄動，阻礙我過去。
「殺……殺……殺死你……」
係怨靈。
我將電筒照向佢哋，佢哋即刻痛苦慘叫，喺我面前退散。
「你見點？」我扶起霍靜。
「凌……寧壹？」霍靜眼皮半開，「點解……你喺度……？」
「你係唔俾我插手呢單案，但我有我一定要插手嘅理由。」
「我知……」霍靜卻好似知道一切咁，「穆樞機已經將所有嘢話晒畀我知，所以我先唔想你插手……」
「穆……樞機，佢喺邊？」
「樓上，佢去消滅龐亮。」
「明白。」
龐亮必須要由我嚟消滅。
但而家要做嘅係先將眼前怨靈驅散，然後安置好霍靜。
「凌寧壹……」霍靜伸出手，遞咗樣嘢畀我。
「呢個……」我接過之後，驚訝咁話，「果然黑警啲黑科技係唔同。」
「殺……殺……殺死你哋……」嗰幾隻怨靈回復原狀，包圍我哋。
太陽燈雖然可以抑制怨靈，但無法徹底驅散佢哋。
不過佢哋智商無陳伯咁高，能量亦無陳伯咁旺盛。
可能係控靈術嘅後果——控靈術就係操縱鬼魂嘅法術，西方稱之為死靈術，簡單咁講其實養鬼仔就係控靈術一種，而高階嘅控靈術可以完全支配鬼魂。
不過咁樣做唔會無後果，人手強行驅動佢哋會加快佢哋能量消散，令佢哋崩壞。
「殺……殺死你哋！」
幾隻怨靈同時向我衝過嚟，我再拎起電筒照住佢哋，然後趁機跑到工廠角落，將霍靜畀我嘅嘢放置。
「霍靜！」我大叫一聲。
「收到！」
頓時，周圍空間變得波動，就好似火焰尖端見到嘅空氣扭曲映像。
「啊啊啊………嗚嗚嗚啊啊啊啊啊啊啊啊！」幾隻怨靈停低落嚟，雙手痛苦撳住個頭。
係磁場。
霍靜畀我嘅係一個黑色小儀器，佢已經喺工廠三個角落放置咗，剩低最後一個。
當四個角放置好後，再由霍靜啟動儀器，就可以喺工廠製造出一個小形磁場結界。
鬼魂係能量，會受到磁場干擾，就好似鎖羅盆村時若兒一樣情況。
我趁怨靈被牽制，拎出硝酸銀噴霧喺工廠中心畫出大曼陀羅法陣，將怨靈身上瘴氣通通引導出嚟，然後驅散。
好快，工廠回復一片平靜。
霍靜受到怨靈攻擊，我將佢扶起牆邊挨住。
「凌寧壹……你拎住嗰把骨刀，係屬於驅魔師嘅禁忌之物。」臨走之前，霍靜忽然講。
「嗯。」
「有啲嘢，做咗就返唔到轉頭。」
「無所謂。」
我轉身離開，跑上去搵龐亮。
但一上到去，就見到慘烈嘅畫面。
「嘻嘻嘻……你終於到喇，但已經太遲喇……嘻嘻嘻……」
龐亮單手捉住渾身浴血嘅穆樞機條頸，舉起佢喺半空。
喺佢身後，係失去意識，手腳被綑綁嘅白寧。