我係一個驅魔師，專幫人驅散妖魔鬼怪: 66
過去兩道痛楚再次於心中浮現。
奪去我全家人性命，然後又奪去若兒性命。
我一直追尋著嘅人終於喺我面前出現！
「……龐……亮！」
怒火頓時冒起，甚至令我無法平靜講出嘅名字。
我忿然衝過去，再向龐亮條頸斬多一刀！
但斬到一半，銀刀俾血肉吸實，無法拔出！
「嘻嘻！唔撚係啊……咁耐無見，一嚟就斬我個頭？」龐亮嘻皮笑臉地講。
唔係……有種奇怪感覺……
「你……唔係龐亮？」我訝異咁問。
「嘻嘻嘻！你估下！」
龐亮舉起指甲尖銳嘅手向我個頭插過嚟，我即刻鬆開握住銀刀隻手，後退避開！
嗖—！
指甲插中右眼眼角，鮮血頓時飆出！
我合埋被鮮血模糊嘅右眼，拎出另一把銀刀。
眨眼間，龐亮消失眼前，不知所蹤。
我細心聆聽周圍聲音。
「喺呢邊！」
我轉身向後捅過去，捅穿打算從背後襲擊我嘅龐亮隻手！
但龐亮好似無痛楚一樣，將被銀刀捅穿隻手打橫拉出嚟，然後捉住我手臂將我掟落其中一架車！
背後受到強勁衝擊，呢一下甚至將車頭掟到凹陷！
我瞓喺車頭，強忍痛楚準備企起身，但下秒鐘龐亮咚一聲踩落車頭，企喺我面前！
佢第一下手成手刀形狀向我捅過嚟，我馬上側頭避開！
車頭響起火花聲，龐亮隻手捅穿咗車頭蓋！
佢並無停手，馬上舉起另一隻手向我捅過嚟！
千均一發之際，我拎起銀刀將龐亮睪丸齊整切落，然後穿過佢褲襠從佢面前逃離。
「嗚……」龐亮痛苦咁撳住下體，「玩埋呢啲小把戲……」
沾染血水嘅肉色睪丸跌落地下，但龐亮彷彿唔介意一樣。
比起被魅魔附身嘅Heidi，龐亮更加異類。
而且，龐亮嘅臉容同八年前一模一樣，絲毫無老化過。
我壓低重心，警戒咁望住佢講：「我今日一定會殺死你。」
「嘻嘻嘻嘻……」龐亮又發出恥笑聲音，「你殺得到咪試下囉！」
頓時，龐亮化成一團黑影向我飛過嚟！
我完全反應唔切，俾龐亮一手捉住條頸，邊向前衝邊將我撳落地下不停磨擦！
千刀萬剮嘅痛楚從背後傳嚟，我雙手捉住龐亮隻手，但完全掙扎唔開！
突然重心一變，龐亮將我拋起！
我連續撞上幾架車之後停低落嚟，眼前天旋地轉，痛到我企都企唔起身！
「就咁樣？」龐亮慢慢行過嚟，「嘻嘻嘻！實在太令我失望，失撚望。」
實力差距太懸殊。
同魅魔嘅程度截然不同。
就算無好似八年前毫無還手之力，亦依然不敵。
但僅係普通驅魔師嘅戰鬥方式。
我一手撳住地下強行企起身，全身肌肉用唔上力，只能用骨頭支撐身板。
已經夠。
我將手放落褸袋，拎出一把白色嘅刀刃。
「呢把係……」龐亮睜大雙眼，驚訝望住我手上把刀。
「今日係你嘅死期。」
龐亮見狀馬上向後跑，我拐下拐下咁追過去！
只要昆迪拉鎖定目標，就可以向目標施展詛咒！
「嘻嘻……嘻嘻嘻嘻！身為驅魔師竟然用埋啲咁邪惡嘅法術！」
「呢個就係你嘅遺言？」
砰—！
正當昆迪拉鎖定龐亮之際，響鳴嘅槍聲突然響起！
龐亮俾子彈射穿太陽穴，倒在地上！
而射出呢槍嘅人，就係企起停車場入口，雙手握住手槍嘅霍靜。
「……霍靜？」我訝異咁望住佢。
「Sorry，我嚟遲咗。」霍靜並無放低槍，仍然將槍指向龐亮。
唔係，而家唔係驚訝嘅時侯。
我即刻拎起昆迪拉指向龐亮，但車輛卻遮蔽住龐亮嘅身影！
「唔……！」我扶住隔籬架車，但無力行過去。
啱啱受嘅傷太嚴重，已經到咗極限！
就喺呢個時侯，龐亮瞓低嘅位置冒起濃濃黑霧。
「嘻嘻嘻……話說，嗰個驅魔師小姐依家點呀？係咪就喺把刀入面？」龐亮嘅聲音從四方八面傳出。
「唔關你事！」我大喝一聲，「究竟你係邊個？你係咪龐亮？」
「嘻嘻嘻……下次見面我就話你知。」
黑影從車後跳出，我馬上舉起昆迪拉，但剎那間龐亮已經逃離停車場。
「唔係掛……打爆頭都唔會死？」霍靜一時太過驚訝，無開槍截擊龐亮。
我雙腳脫力，頓時跪落地下。
「喂！凌寧壹！」霍靜即刻跑過嚟，「你點樣？」
「未死……不過就死……」我喘住氣講。
「識講笑即刻無事喇！」霍靜將我隻手搭落佢膊頭，「嚟！我送你去醫院！」
實在太強。
就連繪畫法陣嘅時間都無，眨個眼就被佢打到殘破不堪。
之後，霍靜call咗白車送我入院，而工廈現場亦被警方封鎖。
但因為太過驚動，俾附近嘅人察覺到，蘋果動同HK01即刻執導，連登亦開咗post瘋狂討論。
秘密封鎖，神秘巨響，連環槍聲……愈嚟愈多有關呢次事情嘅嘢被揭出。
我瞓喺急症室病床上，等待醫生報告。
「身體多處擦傷瘀傷，角膜出血，腦部輕微震盪，不過無骨折……但要做個詳細檢查先可以知道有無事。」醫生拎住份報告同我講。
「唔需要，我好正常。」我從病床起身。
醫生一臉吃驚咁反駁：「吓？先唔講你身上嘅傷，你之前仲有好多舊傷無好好處理，左手手臂皮膚燒傷，肌腱撕裂……你仲企到起身已經叫唔正常！」
「我會自己處理，總之我無時間同你慢慢檢查。」
「咁樣……咁樣唔得……」
「凌寧壹。」霍靜拉開幕簾行入嚟，「你就乖乖聽醫生養傷。」
「無時間養傷，我要去殺……」我醒起醫生喺我隔籬，「我要去處理龐亮。」
「唔使。」霍靜搖頭。
「……唔使？」
「我已經搵咗第二個去追尋龐亮，我哋之間嘅委託已經完結，酬金我會過數畀你。」霍靜冷冷咁講，「由依家開始你再同呢單案無關連，就咁。」
「喂！等等！」我喝停霍靜，「你搵咗邊個人？」
一個身穿黑色乾濕褸嘅中年男人從霍靜身後行出嚟。
「佢係隸屬教廷嘅神父兼任驅魔師，有二十年驅魔經驗，所以你唔使擔心。」
「係你……？」我訝異地望住眼前呢個人——