我係一個驅魔師，專幫人驅散妖魔鬼怪: 44
……發生咩事？
唔係……點解呢度會有個男人死咗喺度？
啱啱我仔細逐間石屋搜查過，應該無任何人喺呢條村入面……
「啊啊啊！係Kelvin！」Zoe指住男人條屍大嗌，「點解佢會死咗喺度㗎？」
就算唔知係Zoe講嘅人係邊個，都大概估到係同佢一齊嚟呢度行山嘅朋友。
死狀如此恐怖，只能係山魅所為。
鞋底有種濕漉漉嘅感覺，我舉起腳一望係粉色嘅鮮血，從男人後腦枕流過嚟……
唔通……唔通……
佢係從村外被高空掟入嚟？
「癡線！癡線㗎！我要落山啊！」Zoe驚慌大叫一聲，然後轉身跑出去。
「唔可以跑出去！」
但Zoe早已失去冷靜，一味咁跑出去，無論我點叫佢都截唔停佢。
而家唔係糾結男人屍體嘅時侯，我或者明白鎖羅盆村所謂「離奇失蹤」嘅真相。
正當我諗住追出去嘅時侯，卻發現白寧目光呆滯咁望住男人條屍。
唔記得仲有呢個傻妹……！
「唔好望啦！」我拉住白寧隻手，「快啲追住個女仔先！佢會有危險！」
「……喔？喔！」白寧回過神望住我。
我拖住白寧跑出去追Zoe，小黑亦隨即跟喺我身後。
追出去途中我好幾次差點截得住Zoe，但可惜無論我點捉都捉佢唔住……
因為我捉唔到。
直到差唔多村嘅入口，Zoe先肯停低腳步。
但佢停低嘅原因並唔係因為我。
喺村嘅入口，有幾個著住紅色連身裙，臉色白如死灰嘅長髮女人。
係山魅。
佢哋就係嘗試迷惑我，殺死啱啱嗰個男人，兼且同村民離奇失蹤案有關嘅原兇。
Zoe不知所措望住佢哋，雙腳正一步一步後退。
嗰幾個山魅企喺村口，無打算再行近我哋，但就企喺度咧開嘴巴詭異咁笑。
佢哋腳邊有兩個人瞓咗喺度。
「阿樂、阿傑……？」Zoe露出驚恐嘅眼神。
其中一個山魅雙手手指化成幾條樹藤，插落嗰兩個人背脊，好似叉嘢食咁將佢哋舉起嚟。
已經死咗。
同Kelvin死法一樣，被多枝樹枝從體內插穿而死。
「死……去死……嘻嘻嘻……」
山魅隨手一甩，將其中一個人向我哋身後嘅鎖羅盆村掟過去。
砰—！如同西瓜爆裂嘅響聲再從村內傳出。
果然。
啱啱嗰個男人係佢哋從村外掟入嚟。
「要要要要要走……」Zoe嚇到差啲企都企唔穩，狼狽咁後退幾步，「要搵埋芷欣即刻走！」
「芷欣……講佢？」
山魅將樹藤伸入草叢，然後又隨手一揮——
咚—！
一道黑影飛到Zoe腳邊。
「芷芷芷芷芷芷芷芷欣……啊啊啊啊啊啊啊啊啊啊！」
係個五官、軀幹，甚至下體都被樹枝插咗好多個洞嘅少女跌咗喺Zoe腳邊。
Zoe嚇到坐落地下失禁，搏晒命咁向後爬——
咚—！
一條屍體掉咗喺Zoe面前——
「點解……點解……？」Zoe崩潰咁望住眼前。
呢條屍體唔係其他人……而係Zoe自己。
無錯，從一開始我遇到嘅Zoe並非活人，而係一個亡魂。
所以佢先怕我用太陽燈電筒照佢，所以我先捉極都捉唔住佢。
佢大概連自己已經死咗呢件事都唔知，以為自己仲係一個活人。
「無可能㗎……無可能㗎㗎㗎㗎㗎㗎㗎！」
Zoe雙手撳住頭，邊喊邊失聲大叫。
「嘻嘻……嘻嘻嘻嘻……嘻嘻嘻嘻嘻嘻嘻嘻！」
幾隻山魅放聲嘲笑Zoe。
「嘻嘻嘻嘻嘻嘻嘻嘻嘻嘻嘻嘻嘻嘻嘻嘻嘻嘻！」
「假㗎……一定係假㗎！我明明仲活生生喺度，我仲未死，我仲未死！」
Zoe企起身，向嗰班山魅衝過去！
「唔好呀！」
我拔出銀刀，跑過去嘗試阻止Zoe。
「嘻嘻……再見……」
已經太遲。
其中一隻山魅張開血盆大口，將Zoe嘅亡魂吸入肚中。
Shit……始終救唔切Zoe！
我並無停低腳步，拎住銀刀向山魅嘅頸部斬過去！
嗖—！山魅脖頸斷開一半，露出樹木嘅斷面。
只見山魅依然保持詭異嘅笑容，雙手扶住個頭，將頭部同頸部接合返埋一齊。
「嘻嘻……嘻嘻嘻嘻……」
真係令人討厭嘅笑聲。
我即刻後退到村口位置，警戒地同山魅對視。
「師父，Zoe發生咩事，點解好似俾佢哋食咗咁？」白寧愣望住眼前幾隻山魅，「佢哋……係啲咩嚟？」
「山魅，由樹木、雜草或者山石化成嘅妖。本來應該係只會做惡作劇嘅妖怪，但唔知點解會變到咁兇暴。」
不但會殺害人類，仲以人嘅魂魄為食糧。
非常邪惡。
「但佢哋好似唔敢行埋嚟咁……啊！」白寧恍然大悟，「八陽陣！」
「原本鎖羅盆村有法陣保護，免受怨靈同妖人侵，但唔知咩緣故全村村民離開條村，途中誤入結界，俾山魅通通殺晒。」
沿路見到嘅骸骨，就係鎖羅盆村原居民嘅屍骸。
因為時空扭曲，結界內時間流逝速比現實慢緣故，村民嘅骸骨至今未完全風化。
「無形結界係隨住磁場持續變化，後來磁場延展到鎖羅盆村，結界將鎖羅盆村包覆，於是之後嘅行山人士就搵極都搵唔到鎖羅盆村。」
呢個係所謂嘅真相。
不要左上山——其實係「不要再上山」先啱。
不過呢句話並非準確，因為無論上山定落山，都係會死。
但而家知道真相亦無用。
——真相，係由知情人講出嚟嘅事實。
而我哋，早就自身難逃。