我係一個驅魔師，專幫人驅散妖魔鬼怪: 39

中年男人見我向佢搭話，一臉錯愕望住我。

「我個女已經三日無返屋企。」

「所以你喺度等佢？」

「我得佢呢個女，但佢三日都未返屋企，又無音訊，我好擔心佢……」

中年男人露出一臉茫然嘅表情，呆滯咁望住馬路邊。





「大叔好似好可憐咁……」白寧講咗句。

「呢個世界大把人都可憐，永遠都幫唔晒佢哋。」

點知白寧走到中年男人眼前，揚住手咁話：「大叔，你個女去咗邊呀，不如我哋幫你手搵佢呀！」

「喂，白癡妹！」

「佢……去咗行山，好似係去鎖羅盆村。」





鎖羅盆村……？

一個非常熟悉嘅地方名。

「但佢行到凌晨都未返，於是我打電話畀佢，但佢嗰度訊號好差，我聽唔清佢講咩……淨係好似聽到蕩失路……出唔到去……好多骨頭……跟住就斷線，再打過去已經唔通……」

「咁……」白寧呆咗呆，「咁你有無報警？」

「有，警察話已經發散晒人手搵，但仲未搵到。」中年男人依舊望住馬路邊，「平時阿女會喺呢度落車返屋企，所以我要企喺度等佢，等到佢返嚟為止。」





「喔……」白寧微微點頭，但一副手足無措嘅樣。

鎖羅盆村係香港最猛鬼嘅地方之一，有一個非常駭人嘅故事——

幾十年前，嗰條村裡面嘅村民喺一夜之間全數消失，不留痕跡。最離奇嘅係消失嘅只有村民，村內禽畜同其他物品一概完好無缺，某幾間屋內甚至發現食剩一半嘅飯餸。

自此之後鎖羅盆村就變咗條廢村，就連當時日軍都唔敢攻入去。

之後，有人試過入去探險，但大多數人去到嗰頭附近時，指南針就突然失靈，永遠搵唔到正北方，而且點搵都搵唔到條村嘅入口。

據聞十幾年前有班行山人士去鎖羅盆探險，其中有個人去廁所後失蹤，後來搵返嘅時侯發現佢面容扭曲跪喺地下，死狀恐怖，彷彿死前見到啲非常驚訝嘅嘢。

即使係驅魔師亦唔敢貿然前往，其原因——

嗰度嘅「怪」十分嚴重。





「聽講鎖羅盆村嗰邊好猛鬼，我驚我個女撞到啲唔應該撞到嘅嘢……」

心感不妙。

「咦！咁啱啦，實不相瞞，其實我哋係驅魔師嚟！」

「……驅魔師？」中年男人語氣疑惑咁講。

「喂！」我打算喝停白寧，但已經太遲。

「係呀！就係專門負責處理鬼怪事件！」

「咁……」中年男人轉頭望過嚟，眼神好似重燃希望，「你可唔可以幫我搵返個女？」





「當然可以啦！」

就算而家叫都無用，白寧已經應承咗對方。

我將白寧拉到一邊，問：「你做咩要亂咁應承人哋？」

「嗯？你唔係想幫大叔先行過嚟嘅咩？」白寧歪住頭，一臉困惑問返我轉頭。

「梗係唔係……唉，算數。」

米已成炊，作為驅魔師嘅我會遵從承諾，應承得人一定會算數。

就當買咗個教訓。

我行到中年男人面前，同佢講：「我可以幫你搵返個女，但驅魔師只會接受有報酬嘅委託。」





「報酬……」

「無錯，你，可以畀到咩報酬我？」我質問佢。

「我……」中年男人失落垂低頭，然後又抬起頭，「所有嘢，只要你想要，我會付上任何代價。」

我猶豫地望住佢雙眼。

「……好，委託成立。」

我接受咗中年男人嘅委託，從佢口中得知佢個女外貌特徵，衣著打扮，案發時間地點同最後對話內容。

抄低晒所有嘢之後，我先向中年男人做小人。





「我會依家出發去搵，但講明先，過咗三日我確保唔到你個女生死，最多生就見人死就——」

「唔緊要。」中年男人苦笑一聲，「只要搵到佢，就夠。」

佢雙眼擔憂到已經流唔出眼淚。

真係可憐。

「依家已經好夜，師父唔係諗住出依家出發嘛？」白寧驚訝咁問。

「愈遲搵到，生存機率愈渺茫。」

之前亦講過，驅魔師經常接到唔同類型嘅委託，對我嚟講夜晚行山已經輕而易舉。

「你返去先，我依家返屋企執定裝備出發。」

「等等！我都要去！」

「你又以為去海洋公園玩？今次唔同上次，係百分百會有危險。」

「但係——」

「你又想話身為徒弟當然要跟住師父一齊去驅鬼嘛？我從來無認過你係徒弟，你可以返歸。」

「唔係，我係想講……」白寧眼神堅定望住佢，「見到擔心自己個女嘅爸爸，我無法坐視不理。」

我愣望住白寧。

即使同我對視，佢眼神依然無閃縮。

「今次嘅委託唔係你呢種半桶水嘅驅魔師可以做到，你會有危險。」

「唔緊要，我唔驚。」

「我唔會救你。」

「唔緊要，我會自己救自己。」

我終於明，佢同若兒有咩唔同——

佢混雜咗過去嘅我嘅影子。

「……你鍾意，但唔好阻礙我進度。」

白寧呆咗呆，然後興奮咁話：「多謝師父！」

返到屋企執拾好後，我哋就準備出發。

不過臨出門之前，我停低咗腳步，望向屋內細小嘅身影。

「點解……你要帶埋隻黑貓去嘅？」白寧不解望住將小黑放落袋嘅我。

「因為跟住落嚟會好危險，我需要貓妖幫手。」

話雖如此，但我唔想白寧嚟嘅原因並非危險……

而係，佢可能要面對難以承受嘅真相。