我係一個驅魔師，專幫人驅散妖魔鬼怪: 35

映入眼前嘅——

「Karen……果然係你！Karen！」

一個我所唔認識嘅少女，但Derek十分熟悉嘅人。

從一開始猜測就無錯，喺夢中化成白衣女鬼追殺Derek嘅人就係七年前死去嘅女朋友。

Karen對自己容貌曝光稍微錯愕，但好快就收返表情，面無表情咁望住「我」。





「Karen，點解我叫你個名，你都唔應我？」

「你問點解？呢句話應該我問返你先啱！」

捏住Derek嘅雙手並無放開，反而再次變得用力。

「唔……！」

「點解你要同我講分手……點解你無即刻衝出嚟追我……點解啊！」





我明白啦。

Karen無回應Derek嘅呼喚唔係因為聽唔到，而係無必要。

從一開始，Karen目的就係向Derek報復。

「Karen……我……」

「點呀？依家先諗住假惺惺同我講對唔住呀？太遲喇！」





Karen雙眼流下兩行血淚，表情變得猙獰嚇人！

「Karen……對唔住，嗰陣我講分手只係一時衝動，講完我已經好後悔……我無諗過真係同你分手，更無諗過件事最後會變成咁……」

雙眼有種熾熱嘅感覺，視線開始變得模糊。

「我好後悔，我好後悔當時講嘅話，更加後悔當時做嘅決定……如果我肯放低拍戲，即刻衝出嚟追你，你就唔會死，我真係好憎我自己，好想殺咗自己！自從你死咗之後我每晚都會諗起呢件事，然後覺得好後悔……對唔住，我對你唔住……」

淚水已經慢慢流下，明明係Derek喊緊，但就好似我喊緊一樣。

因為親手害死自己最重要嘅人。

無比後悔嘅感覺湧入我意識中，而且我亦身同感受。

——因為我都試過呢種無力嘅悔恨感。





Derek無力企喺Karen面前，任由佢捏住自己條頸。

「你以為咁講我就會原諒你？你以為喊兩聲我就會可憐你？我可憐你咁邊個可憐我啊？」

Karen表情更變獰厲，雙手用力得要捏斷Derek條頸一樣！

咁樣落去……Derek真係會被殺！

意識依附Derek身上嘅我無法干涉呢個噩夢，唯一救到我哋嘅人只有白寧！

白寧究竟做緊啲咩……點解佢無按我所講叫我哋起身！

「Derek！醒下！快啲反抗！」





Derek已經失去生存意志，一心想補償嘅佢就算俾Karen殺死亦唔會再反抗。

「哈哈……你依家算點？以為咁樣就會得到原諒？以為俾我殺死就係對自己最大嘅懲罰？」

無論我點呼喚，Derek依然只愣望住Karen。

「哈哈哈哈……我唔會俾你稱心如意，你啊……」

突然，新鮮嘅氧氣再次吸入肺中，捏住脖頸嘅雙手亦慢慢鬆開。

「真係個傻瓜。」

Derek一臉呆滯咁望住Karen。

「你……唔係搵我報仇咩？」





「你白癡定低能呀你？我要報仇早就七年前就報咗喇，唔通等到Derek大導演事業有成，周圍都係囡囡嗰陣先嚟搞你咩？」Karen捧腹大笑住咁講。

「咁你做咩要扮成女鬼嚇我？」

「唉……你果然唔記得咗……」

「唔記得咗……？」

「我哋之間嘅約定。」

眼前浮現出一段映像，係Derek嘅記憶——

喺器材周圍亂放，只有三百尺大小嘅狹小studio裡面，一男一女喺度傾偈。





「Derek，點解你咁鍾意鬼片嘅？」Karen坐喺一個非常大嘅喇叭上問。

「因為我鍾意嗰種俾啲非常恐怖嘅嘢追住，但無法反抗，只可以一直跑一直跑，然後跑到盡頭走唔甩嗰種壓迫感同絕望感，唔知點解睇到……有啲興奮。」

「我都係，每次睇到呢啲場面，我就會……忍唔住變濕。」

「你比我仲變態。」

「彼此彼此啫！」

「做你男朋友真係幸福，前戲都唔使。」

「……白癡。」

Karen踢咗Derek一腳，然後企起身。

「不過做導演就無得親手感受呢種感覺，只可以望住人哋，你唔會覺得可惜嘅咩？」

「都唔會㗎，比起做主角我想做創造故事嗰個，不過……」Derek停咗停，然後又繼續講：「有機會嘅話，我都想做次主角，想知俾人追殺嘅感覺係點。」

「咁到時就等我做導演，幫你拍返場驚天動地嘅鬼片啦！包保賣座！」

「下話。」