我係一個驅魔師，專幫人驅散妖魔鬼怪: 33

咩話……？

點解……白衣女鬼突然決定要殺死Derek？

「會唔會係因為我搵你幫手觸怒到佢，所以佢要殺死我？」Derek雙手捉住我膊頭，好緊張咁問。

「你冷靜啲，如果佢喺透過夢境同你意識連結，應該唔會知道現實我喺你隔籬。」

「咁點解佢……Karen要咁做？」Derek睜大雙眼，「唔通佢唔係Karen？」





「我都唔知。」

我並無身處夢境之中，唔知道當中發生咩事。

夢中殺人的確存在，就好似猛鬼街咁，當意識喺夢中死亡，無法返到身體，現實本人就永遠無法甦醒。

生物係由肉體、靈魂同精神形成，一般人定義嘅「死亡」係肉體嘅消逝，然而實際上只要失去呢三樣嘢當中一樣就會死亡。

例如意識喺異空間消逝，或者靈魂被消滅。





白衣女鬼一直只喺夢境追殺Derek，但呢次突然決定要殺死Derek，產生變化嘅原因好可能只有一個——

Derek嘗試同白衣女鬼溝通。

詳細緣由並唔清楚，因為我並無身處Derek嘅夢境，唔知Derek做咗啲咩。

「既然佢話聽晚殺死你，換言之你依家係安全。況且佢必須要喺夢入面先干涉到你，只要你聽晚開始唔發夢嘅話就唔會有事。」

「即係我要好似猛鬼街入面啲角色咁唔瞓覺？」





「呢個只係下策，我己經諗好對策，無論如何都要聽晚先可以再見到佢，呢段期間我會準備好所布嘢。」

我移開Derek緊緊捉住我膊頭嘅雙手，搭返佢膊頭轉頭。

「我做驅魔師咁多年從未失敗過，所以你大可放心。」

安慰完Derek，我就離開咗佢屋企。

我向Derek講咗個大話，而且我亦無十足把握。

就如之前所講，我並唔擅長處理呢類型案件，因為我係驅魔師，唔係通靈師、傳心師之類嘅人，唔熟悉超自然事物。

睇嚟，我需要搵個幫手。

第二晚，我上到Derek屋企。





「凌先生……白小姐？」Derek打開門。

「你好呀Derek先生！」白寧喺我身後冒出，向Derek揮手。

「佢係嚟幫我手……屌你同我收埋條蔥去。」我一手搶走白寧棵蔥。

入到屋，Derek依然一副忐忑不安嘅表情。

知道今晚可能係自己死期嘅人，無可能仲可以好地地咁坐喺度。

今晚做法同尋晚一樣，透過催眠快速將Derek導入發夢狀態，進入嗰個噩夢。

不過今次會做多樣嘢——





「今次我會同你一齊入去個噩夢入面。」

「……一齊？」Derek露出疑惑嘅表情。

「我會進行離魂，即係俗稱嘅靈魂出竅，進入你體內，同你意識進行同步。」

Derek同白寧一副不解嘅表情，於是我繼續解說。

「喺夢裡面我唔會出現，你依然係主體，而我就依附喺你意識上。我會睇到你睇到嘅嘢，聽到你聽到嘅嘢，甚至連性命會連結埋一齊。」

「性命……連結埋一齊？」Derek好驚訝咁大聲問。

「無錯，如果你喺夢入面死咗，我都會一齊死。」

Derek睜大雙眼，非常驚詫望住我。





「師父，你話咩話？如果Derek先生喺夢入面死咗嘅話，你都會……」

「無咩好擔心，反正百分百唔會有事。」我面向白寧，「不過，今次有你派上用場嘅時侯。」

「我……？」白寧愣然指住自己。

「我會教你點做，你只要守住我哋兩個隔籬，見唔對路就叫醒我哋就得，唔使猶豫。」

我將兩張符紙交畀白寧，交帶畀佢聽應該點做。

「點解……」Derek皺起眉頭，眼神既詫異又困惑，「就算你係驅魔師，都唔使做到呢個地步嘛？」

「就係因為驅魔師，所以先咁做。」





雖然我討厭Derek呢個人，但呢個唔係我卻步嘅理由。

更何況，我想睇下Derek呢個噩夢嘅真相。

準備好之後，我同Derek瞓喺床上，準備進入夢境。

「之後就靠你，同埋你唔好乘機拎棵蔥出嚟。」我交帶白寧。

「放心喇師父，我一定會好好睇實你哋！」白寧都係拎住棵蔥。

唉……無得救。

我合上雙眼，只剩一片漆黑。

「如果你出咗事嘅話，我會將你拉返返嚟。」若兒嘅聲音喺我耳邊傳出。

「嗯。」

然後，我同Derek準備進入噩夢。