我係一個驅魔師，專幫人驅散妖魔鬼怪: 26

我稍微疑惑地問：「逐出師門……？」

「係，我無得再做道士喇……」白寧抬返起頭，輕輕點頭。

雖然對我嚟講無關痛癢，但循例上我都問一問：「點解你會俾人逐出師門？」

「因為……我其實已經拜咗師半年，但修為一直毫無進展，師兄佢哋都唔認為我係呢方面嘅材料，所以我先想去自己處理鬼怪事件，證明自己實力。但係過咗三個月，我都係未試過自己一個解決鬼怪事件，就連學校嗰次都係凌先生出手相助先解決到。」

「所以因為咁就俾人逐出師門？」





「學校嗰次之後我有不斷嘗試去處理其他案件，但通通無功而還，所以一個禮拜前師兄佢哋就逐咗我出師門。」

「咁點解你唔同你師兄講學校單嘢係你解決？」

「因為嗰件事係凌先生解決，完全唔關我事，我唔可以獨攬功勞！」

「真係唔知話你戇直定話你蠢好……」

白寧垂頭喪氣咁講：「其實我都有自知之明，可能……我真係無呢方面嘅天份……」





佢咬住下唇，眼神流露出失落，但又有種不甘心。

「但係我真係好試下做到個可以幫人驅鬼驅魔嘅道士……！」

我感覺到呢番話並非講笑，又或者三分鐘熱度嘅說話。

而且我諗起若兒亦經常講相同嘅話。

驅魔師唔係玩英雄扮演遊戲，單純有理念嘅人係無法做到，更何況係個只會拎住棵蔥周圍揮嘅傻妹。





但係我並唔討厭。

「你帶我上去會一會你師兄。」

「吓……？」白寧一臉愕然。

「我想見識一下你師兄有幾咁犀利。」

「但係……佢哋道行修為好高，個個都好犀利！」

「唔緊要㗎，就當切磋一下。」我將咖啡一飲而盡，然後邊壞笑邊向白寧講：「順便俾佢哋睇下邊個先有天份！」

「啊……天份？」

白寧一臉茫然，但我無諗住俾時間佢呆滯，直接推佢去帶我見佢師兄。





「不過去之前，我要返一返屋企拎幾樣嘢。」

拎完嘢之後，白寧帶我行到一棟唐樓，上去某個單位。

「我師父好少會喺呢度出現，裡面淨係得我三個師兄。」

「師父加個三師兄，咪即係唐僧同三位徒弟。」

「……唐僧？」

「無嘢。」

臨入去前，我將兩樣嘢交畀白寧。





「你戴咗上去先，一陣入到去無論見到咩奇怪嘢，無我批准都唔好出聲。」

「唔……好痛……」白寧邊戴邊答我，「知道啦！」

我撳一撳門鐘，幾秒鐘後就有人嚟開門。

「白師妹？」開門嘅人係個全身黃色道袍，體型肥胖嘅中年男人，「你已經唔再係呢度弟子，又上嚟呢度做咩嘢？」

「你好，我姓凌，係一位驅魔師。」我代替白寧回答。

「驅魔師……？即係嗰班教會神父？」肥師兄好不屑咁望住我，「白師妹，你知我哋同教會佢哋水火不容，點解要帶佢哋上嚟呢度？」

「容許我更正，係驅魔師。」

「都係一樣啦，咪又係拎住十字架呃呃騙騙。你走，我同你無嘢好講。」





「其實我聽聞呢度有班道行高強嘅道士，想上嚟見識我，無諗過會俾人咁打發……定係，其實你哋係班空有其表踲神棍呀，大肥豬？」

肥師兄頓時臉紅耳赤大喝一聲：「竟敢出言不遜！」

「師弟等等。」另一位體型較高嘅道士行嚟截住肥師兄，然後望住我講：「啱啱番話對我等嘅誹謗，我唔可以當係耳邊風。」

「我唔係有心睇唔起你哋……其實都有啲係。」

「你個口出狂言嘅小子！」

「兩位師弟退下！」

兩位師兄聽到聲嚇到即刻縮埋一邊，一個體型矮小，但氣勢非常磅礡嘅道士走到我面前。





「閣下無需再多番故意挑釁，不如開門見山講，帶白師妹上嚟呢度究竟所謂何事？」最後呢位矮師兄非常爽快咁問。

我亦無再轉彎抹角，直接答：「我聽到呢個傻妹因為天份唔夠而被逐出師門，所以想睇下逐佢出師門嘅人有咩能耐。」

「呢啲係本門嘅事，應與你等外人無關。」矮師兄平淡咁解釋，「更何況白師妹的確資質不足，拜師以嚟半年修為毫無進展，連一單鬼怪案件都處理唔到，經本門商議後決定將佢逐出師門。」

「你有無諗過教畜教唔好，學生自然就學唔好？」

「可笑！貧道乃茅山派入室弟子，道行修為非凡人可比，豈容你說三道四！」

「講到自己咁勁，夠唔夠膽比試下？」

「比試……？」矮師兄皺起眉頭。

「依家有隻鬼喺呢間屋入面，先將隻鬼搵出嚟驅走嘅人就贏。」