我係一個驅魔師，專幫人驅散妖魔鬼怪: 18

「點解你會喺度？」我詫異咁望住眼前人。

「你話十點學校小巴站對出等啊嘛！」

眼前呢個女仔，就係累我張支票跌落坑渠罅，打扮奇裝怪異嘅道袍少女……好似叫白寧。

「又係你叫我鍾意就嚟嘅。」

又好似講句呢句話，又幫自己立咗flag。





當初呢句話係基於裡面只係普通鬧鬼事件，而家知裡面有怨靈，情況就唔同。

「我嗰陣講下笑，裡面好危險，你都係唔好入去。」

「點解啊？我係個道士，當然要嚟驅除惡鬼啦！」

「你……」

我懶得同佢爭拗住，因為我發現已經過咗十點，但仲未見到Shelly佢哋。





我拎出電話，原來Shelly半個鐘前whatsapp過我。

「我地早左到 你泥吾泥牙 唔泥我地就入去先」

「浩然話想入去先咼 我地入左去拉 你到左就心比我地拉😂」

大鑊……原來佢哋已經入咗去！

我即刻打畀Shelly。





嘟——嘟——

嘟——嘟——

無人聽。

嘟——嘟——

「喂？」

「Shelly！我到咗學校門口，你哋喺邊？」

「我哋喺……沙沙……」

「咩話？我聽唔清！」





「沙沙……你講咩……我話……喺……沙沙……」

「喂！你聽唔聽到我講咩？」

「沙沙沙沙……我……啊啊啊！」

「喂！你哋發生咩事？我依家即刻過嚟！」

「沙沙……見到……沙沙……」

咔嚓——

「喂！喂！應下我！喂！Shelly！」





一片寂靜。

我再打多次畀Shelly，但只有「暫時未能接通」語音。

唔通……佢哋出咗事？

「你朋友……發生咩事呀？」

「我依家要入去。」

校門被緊緊鎖上，我爬上佈滿雜草枯枝嘅欄柵，入到學校裡面。

「喂！等埋我……」白寧笨手笨腳咁爬上校欄。

校舍大門大開，但裡頭只有陰森詭異嘅感覺。





我跑入校舍，霎時感到一片寒冷，周圍空氣彷彿被凝固。

裡面黑到乜嘢都睇唔到咁制，於是我拎出電筒照住前面三四米左右位置，沿住極微弱嘅光線前行。

「小凌。」

一縷白煙頓時冒出，喺我耳邊徘徊。

「呢度嘅陰氣比一般地方重好多，你要小心。」

換句話，呢度嘅怨靈非常強大，足以影響成間學校。

一般而言，普通人係睇唔到靈體，因為眼睛感知唔到嗰道頻率嘅能量。





所謂「陰陽眼」，並非抹一抹牛眼淚就會開到，而係基因突變嘅結果。

舉個例，人類嘅視錐細胞只能感知紅綠藍三色，望唔到紅外線同紫外線以外嘅能量，但鳥類可以感知埋紫外線，所以鳥類比人類望到更多映像。

某部分人視錐細胞基因突變，可以感知更廣泛頻率嘅能量，因而擁有望到靈體嘅能力。

而我戴緊嘅隱形眼鏡，就係改變光線折射，令我睇到更廣泛頻率嘅能量，繼而望到靈體。

不過有一種例外——

「喂！等埋我！」白寧上氣唔接下氣走到我身邊。

「殊，細聲啲。」

校舍內部非常殘舊，天花牆身剝落大半，牆角築起唔少蜘蛛網，欄杆燈膽舖滿晒塵。

但奇怪嘅係見唔到有蜘蛛喺度，荒廢咁耐亦無雜草喺度叢生。

而且呢度異常寧靜，就算放輕腳步行都聽到自己腳步聲回音。

「好黑，咩都睇唔到咁唔唔——」

我撳住白寧把口，認真向佢講：「你跟住我無問題，但依家開始唔准亂咁出聲，唔准亂咁郁，聽到未？」

白寧睜大眼睛，乖巧咁點頭，我先放開手。

噠——噠——噠——

一陣非常緩慢嘅腳步聲從上面傳來。

噠——噠——噠——

唔通係Shelly佢哋？

但腳步聲仲非常緩慢，而且聽落好似只有一個人嘅腳步聲。

我沿住走廊向前行，而腳步聲則愈嚟愈接近。

噠——噠——噠——

前面係樓梯，我沿住樓梯行上一層，再照向走廊時發現一道背影。

「Shelly？」

眼前呢道背影係一道女仔嘅背影，身高體型同Shelly差唔多。

佢緩緩轉過頭嚟，映入眼前係一副陌生嘅臉孔，並非我所認識嘅人。

只不過……

眼前少女面色蒼白，雙眼泛黑，嘴唇泛藍，臉上有兩條黑色淚痕，頸上仲有一條黑紅色嘅瘀痕。

而且佢個頭係一百八十度轉過嚟。