我係一個驅魔師，專幫人驅散妖魔鬼怪: 16

＊

我坐喺café角落，對面多咗個奇裝打扮嘅女仔。

「對唔住呀」、「唔好意思呀」、「我都係覺得唔好意思」、「張支票有幾多錢㗎」、「我幫你執返啊」……

呢幾句話短短幾分鐘出現咗過百次，節省篇幅所以略。

運氣呢樣嘢好神奇，幾乎全部宗教都會提及呢樣嘢，但無人可以確實證實存在。





你可以想像成機率，但本身係咪一樣實質嘅嘢則無從得知，所以我哋唔會盲目相信運氣。

但今日我信——命裡有時終須有，命裡無時莫強求。

所以本來諗住由得佢，當係自己黑仔。

殊不知佢話：「爺爺話過欠人嘅嘢就一定要還，如果唔係會遭天譴！」

Ok，咁我問佢有幾多，佢打開佢個銀包畀我睇——





「呢個係我今晚晚餐……本身諗住去試鋒味漢堡……」

三十蚊，連單買個鋒味漢堡都買唔起。

「算啦，嗰度少少錢就由佢。」

「唔得！一係我畀住三十蚊你先，遲啲再還畀你呀！」

「唔使。」





「咁……一係我幫你執返呀！」

「坑渠咁深唔通你爬落去執？」

「唔試過點知得唔得！」

點解……可以咁煩？

大多數人咁嘅情況都會即刻嗌多謝走人，但佢就執著到唔還畀人勢唔罷休咁。

呢個女仔……發生咩事？

「個蓋……好似有啲重……」

「你做乜撚嘢？」





我喺原地俾佢糾纏咗十幾分鐘，為免佢俾人當係傻人發現案，我逼不得已向佢妥協。

「淨係一杯咖啡……真係夠？」

「好過鋒味漢堡。」

幾經說服後，奇裝女終於唔再向我道歉，但唔知點解而家邊望住我飲咖啡邊傻笑……

日式道袍外套、白色背心、牛仔短褲、老爺爺拂塵……愈睇愈奇葩，定係新式仙俠cosplay嚟？

可能我望得太入神，佢留意到我目光。

「你呢身打扮係咩一回事？」





點知我呢一問就好似篤中佢開關，佢即刻變到好雀躍咁講：「哈哈哈！本身唔講得出去㗎，不過算喇……唔怕話畀你知，其實我係個道士，識斬妖除魔！」

著住道士袍但又唔講得出去係咩玩法，唔通Bruce Wayne會著住戰衣同你講佢唔係蝙蝠俠？

唔知係咪我皺起眉頭，佢表情好似有啲不滿咁話：「我唔係講笑㗎！我真係一個道士，唔信我畀我啲法寶你睇！」

仲有法寶添，唔知佢會唔會拎支金剛棒出嚟，然後嚟個七十二變？

正當我滿心期待時，佢喺書包拎咗個裝住蔥嘅透明膠袋。

蔥……？

What the fuck？

奇裝女拎棵蔥出嚟，邊沾沾自喜喺度揮邊話：「唔好睇小呢棵蔥啊，雖然佢只係一棵蔥，但佢係一棵好有用嘅蔥，只要對住鬼拎呢棵蔥出嚟，佢哋就會即刻退避三舍。」





中西電影都會有用蔥蒜驅散殭屍同吸血鬼嘅情節，原理味道過於刺鼻，但用嚟驅鬼又係咩新興宗教嘅花式？

「我仲有另一件法寶，呢件比起啱啱嗰件更加勁！」

可以超越蔥，究竟係蒜頭定芫茜？

但答案出乎意料地正常，係一張刻有朱紅色文字嘅黃色符紙。

呢張符紙算叫有板有眼，但望望下……點解啲字體有種可愛過頭嘅feel？

「呢張符好勁㗎，叫做鬼畫符，有避邪鎮靈嘅作用！嘿！」奇裝女冷不然將符紙黐落我額頭，「係咪好有用呢！」

用娃娃體去畫符紙，唔怪得之叫做鬼畫符。





不知不覺我好似俾佢牽著鼻子走，明明我係嚟飲咖啡而唔係睇佢黐符紙落我額頭。

我慢慢張符紙擺返低，心平氣和問佢：「你仲有無其他法寶呀？」

「無喇……其實呢，我資歷仲尚淺，好多嘢都仲未學識……」奇裝女耷低頭，收返起啱啱囂張嘅表情，實在叫人摸唔清佢頭腦構造。

莫講話作為一個驅魔師應有嘅知識，連一啲道士嘅風範都無。

望見一個咁嘅女仔自稱道士，我忍唔住問咗句：「點解你會做道士？」

「點解？」奇裝女呆咗呆，然後答：「我啊……雖然咩都唔識，又傻頭傻腦咁，但我想去幫啲有需要嘅人，所以就去做道士囉！」

因為想幫人，所以做驅魔師。

曾幾何時都聽過同一句說話。

「但想幫人唔一定要道士㗎，做社工，做義工……好多職業都幫到人。」

「咁係因為——」

叮—！

檯面上嘅電話傳嚟鈴聲。

「荒廢學校探鬼之旅預定聽晚10點」

「到時小學對出小巴站等 唔準放飛機牙😤」

「荒廢學校探鬼之旅？咩嚟㗎？」奇裝女一臉好奇咁望住我。

「我啲同學叫我去探險，無咩特別嘢。」

「哦……咁啊……」奇裝女呆咗呆，「咁我可唔可以一齊去㗎？」