我係一個驅魔師，專幫人驅散妖魔鬼怪: 14【Chapter 3 委託三—怨靈】
香港每年都會有唔少失蹤人口、自殺事件，甚至離奇死亡案件，但從來無人去懷疑呢啲案件嘅真確性。
我哋所認知嘅永遠係冰山嘅頂端，但從來無人深潛海底之下查探冰山嘅底層。
其實絕大部分嘅案件都係由警方捏造出嚟。
就好似網絡亦分為表網同deep web，世界上總會有啲嘢會被人隱藏。
一旦到達海底，就會發現更多驚人嘅真相。
俾妖怪吸乾精氣身亡、俾邪魔附身、俾怨靈搵做替死鬼……
數之不盡嘅慘劇每日無時無刻發生，只不過係我哋睇唔到。
人類對妖魔鬼怪認知太淺，而且以現有科學無辦法完整咁解釋到一切。
不過所謂「解釋」只係人類定義出嚟，既然無法用科學解釋，就用言語去解釋。
離奇失蹤、突然猝死、一時睇唔開……稍為修篩一下字眼，令事情睇落變得合理化。
再將網絡上流出嘅真相，用「迷信」、「傳言」呢啲理由去推翻，潛移默化咁將真實化為虛假。
只要有另一個更合理嘅解釋令大眾相信就足夠。
世界就係咁一回事，無論經濟、環境、政治、網絡，甚至超自然以及神怪之談。
不過即便如此，總會有固執嘅人試圖發掘真相，就好似眼前呢三位同學。
「小凌！你有無聽我講嘢㗎？」
「係。」
「個樣咁呆滯嘅？尋日唔夠瞓呀？」
「唔係。」
你哋嘅話題我無咩興趣，點得講出口？
聽講最近附近有間荒廢學校發生靈異事件，鬧得熱哄哄引嚟唔少人嘅注意，連X假期有介紹。
事情不外乎聽到怪聲，見到白衣人影，廁所見到男人上吊，好似有嘢追住……都係呢啲老土情節。
本來無咩特別，不過因為間荒廢學校喺大學附近，引嚟唔少大學生注意，仲有人諗住o camp搞鬼故tour去嗰度探險。
諗返起，我好似仲未自我介紹——我今年year 2，係修讀科學（嘅驅魔師）。
讀呢科純粹係為興趣，對驅魔師嚟講科學同神怪並非對立，就好似之前咁講科學其實有助驅魔。
新興宗教例如new age都將科學立入核心之中，為咗跟上時代嘅進步，我選擇修讀科學作為本科。
講返正題，眼前呢三位同學正討論緊荒廢學校嘅傳聞。
「嗰間荒廢學校有咩故仔聽？我無聽過嘅。」
「好似……係發生過鬧鬼事件……」
「係，話說嗰間學校原本係區內名校小學，三年前發生咗單戀童案事件，聽聞係有個校工趁啲男學生去廁所時，走入去非禮佢哋。」
「咁撚變態嘅？」
「之後當然即刻報警同埋炒咗佢，但之後發生咗一件事……間接令到間小學殺校……」
講緊故仔嘅呢個女仔叫Shelly，佢係個鍾意英倫風打扮，而且份人好多嘢講，咩狗屎垃圾八掛都可以噏一餐，非常嘈吵嘅女仔。
「發生……咩事？」
呢位坐喺Shelly隔籬，睇落驚驚青青嘅韓系少女係阿瞳，性格比較內斂，同Shelly完全相反。
「嗰個校工……喺課室綁咗條繩喺風扇上吊頸自殺……聽講嗰陣個風扇仲轉緊！」
「哇哇哇哇哇！」
「啊啊啊啊啊啊啊啊啊—！」
「屌你咩浩然，你唔好無啦啦大嗌嚇阿瞳先得㗎。」
「Sor囉，但我唔係好信。如果真係有單咁嘅嘢，點解新聞無報過？」
最後呢個鳩嗌嚇人嘅男仔叫浩然，係個日日著牛仔褸，皮膚黑黝嘅男仔。
「好似話係個校長為咗保住校譽，畀錢封住傳媒把口。」Shelly就好似萬能博士咁。
「但係……既然封住咗傳媒把口，點解仲會殺校嘅？」阿瞳驚驚青青咁講。
「本來件事冚住咗相安無事，但有日其中一班學生PE堂完咗返課室時，見到把風扇無啦啦自己開咗，仲有啲嗞嗞聲……」
Shelly收起表情，以低沉嘅聲線講嘢，扮晒鬼故佬咁。
「啲學生行入去一望……見到個校工吊住咗喺風扇上面……」
「轉啊轉……轉啊轉……」
Shelly仲要一路呢句嘢，個頭一路係度轉。
「唔！唔好再講喇，愈聽愈打冷震……」阿瞳雙手畏縮抱肩。
不過浩然聽完依舊平淡，反而露出質疑嘅表情話：「我就唔多信，呢啲似係啲人老作出嚟。如果呢個世界上真係有鬼，點解從來無人證實到？」
浩然又真係問返我之前講過嗰條問題。
「因為暗地裡有班驅魔師將佢哋驅散消滅。」
不過佢唔知道我嘅身份，所以我廢時答佢。
Shelly對浩然嘅質疑表示不滿：「車！咁係因為你未見過啫！」
「唔通你又見過？」
「我無，不過我嫲嫲細個用牛眼淚開過眼，所以佢成日都會見到。」
「屌……我話我老母係超人，識天遁地都得啦。」
「你講到咁唔驚，夠唔夠一齊去嗰間小學先？」
「可以呀，我未驚過。」
「你哋講真㗎……？」阿瞳呆咗望住佢哋兩個。
「梗係啦，阿瞳你都要去！」之後Shelly指住我，「仲有你啊小凌，我預埋你㗎啦！」
人類就係咁樣一回事，牛頓因為見到蘋果從樹上跌落而研究萬有引力，哥倫布為咗搵出通向東南亞嘅航線而發掘新大陸，人類總會對未知嘅事好奇，並去探索。
正因為咁，人類社會先有今時今日嘅成就。
但因為咁，亦有好多人喺探索過程中犧牲。
茫茫大地，總有平凡人唔應該接觸嘅事情。
而且我向自己發過誓，絕對唔會喺委託以外嘅情況下接觸神怪。
——呢個係我絕對原則。