我係一個驅魔師，專幫人驅散妖魔鬼怪: 11
天空一片漆黑，若兒暫時返咗去休息，我獨自坐喺長凳上邊吹住西北風，邊點著嘴巴上支煙。
雖然唔肯定貓妖會唔會出現，但既然附近流浪貓會出晒嚟，點都要搏一搏。
姑且不論張伯件事，我本身都接咗驅散黑貓嘅委託，所以無論係點都會搵隻貓妖出嚟。
「呼——」我將雙手拱埋嘴邊，然後吹出暖暖煙霧。
澄清返，我唔係好似某MV嘅女主角咁MK為咗要整到一身煙味先咁做。
坐喺長凳呢段時間，我重新思考緊成件事。
為咗確認事實，我拎出電話whatsapp穆姑娘：「你係咪話其他受害人大病一場之後，貓妖就會憑空消失？」
穆姑娘兩分鐘後就覆我。
「係呀。」
既然係咁，咁就奇怪。
如果張伯暈低就係所謂大病一場，點解你上到去仲見到隻貓妖？
而且其他受害人一個禮拜就會好返，但點解張伯至今昏迷不醒？
貓妖有咩解究，仇口大到要令張伯醒唔返？
同埋貓妖可以點樣用連身為驅魔師嘅我都唔識嘅手法，去令張伯昏迷不醒？
除非……事情並非如此。
或者，從一開始我就做錯咗個假設。
而家七點五十五分，差唔多到餵流浪貓時間。
雖然兩條尾巴嘅貓絕無僅有，但細過有睇封神演義同西遊記都知妖係識變化術，識偽裝成普通動物，甚至化為人類。
換言之，喺其他人眼中貓妖同普通貓係唔會有分別，大家都係得一條尾。
不過所謂變化術其實只係改變佢哋喺我哋眼中嘅映像，欺騙嘅只有視覺。
只要用其他感官，就可以分辨偽端。
我坐喺長凳靜待，但去到八點幾仍然唔見有人餵流浪貓。
正當我疑惑之時，有個踢住拖拎住膠袋嘅背心肥佬喺公園匆匆跑過。
我即刻衝上前，截住個肥佬。
「喂，我想問平時呢個鐘數係咪會有人嚟呢度餵流浪貓？」
「堆流浪貓……俾班貓義工捉走咗呀！」肥佬好慌忙咁講。
俾貓義工捉咗……！
「班貓義工喺邊？」
「就喺對面街口咋！」
我二話不說，向對面街口跑過去。
貓妖會俾貓義工捉走呢個笑話唔好笑，但萬一事情真係咁就大鑊！
我跑到過去，果然有架van仔泊咗喺馬路邊，車尾箱仲有好多裝住貓嘅籠！
周圍唔見有貓義工，司機座上亦無人，於是我偷偷走上去車尾箱，逐一打開貓籠檢查。
呢隻唔係……呢一隻都唔係……
我將所有黑色嘅流浪貓逐一拎出嚟，摸一摸佢哋屁股有無第二條尾巴。
正喺呢個時侯，我喺車窗見到有個阿姨向車尾箱行緊埋嚟——
「仲唔俾我捉到你哋！」
啱啱嗰個踢拖背心肥佬跑到阿姨面前，指住佢大鬧。
「呢度啲貓全部都係我哋，你點可以擅自拐走晒我哋啲貓？」
「你哋啲貓……？」
「係呀！呢度啲貓全部都有人養，我哋每日都會嚟餵食飯同照顧佢哋，全部都係我哋！」
「總之佢哋係流浪貓，我哋就有權帶走。」
身後傳嚟一片爭拗聲，我趁機會爭取時間逐一打開貓籠檢查。
老實講咩流浪貓定貓義工先關我鬼事，我嘅任務係搵隻貓妖出嚟。
不過我打開咗大半數貓籠，都唔見隻貓妖喺入面。
「你……！你哋係咩組織？我要去投訴！」
「我哋係……係咩組織關係咩事呀？你再唔走我就報警……喂！你喺度做咩！」
阿姨發現咗我，即刻跑過嚟車尾箱！
「有人偷貓呀！有人偷貓呀！」阿姨指住我大嗌，而且仲故意揚起聲調。
但我無理個阿姨，打開埋最後一個籠，拎起裡面僅有一隻黑貓，然後一手摸落佢屁股。
果然，喺屁股末端睇唔到嘅位置有股毛茸茸觸感。
係另一條睇唔到嘅尾巴！
佢就係嗰隻貓妖！
「你個偷貓賊！即刻同我放低隻貓！」阿姨見大嗌行唔通，就轉策略行上車尾箱扯住我。
老實講你係咩貓義工定偷貓賊先關我鬼事，但你係都要阻頭阻勢。
真係麻煩。
「借過唔該。」
我一腳伸咗阿姨落車，然後抱住黑貓跳落車逃走。
「有偷貓賊呀！快啲同我捉住佢呀！」趴喺地下嘅阿姨惱羞成怒指住我。
突然有兩個大隻佬同一個中女從街道兩邊出現，睇怕係所謂貓義工嘅阿姨啲同夥。
「點都要同我捉住佢，唔好俾佢走！」
驅魔師有陣時為咗完成委託，好多時都會捲入不必要嘅麻煩之中。
但對方係人類，唔係妖魔鬼怪，我唔可以好似對魅魔時咁樣暴力解決。
我邊跑，邊從褲袋拎出一支煙點著。
香煙散發嘅雲霧並無隨風飄散，而係喺我身邊徘徊。
「小凌，有咩要幫手？」若兒以白煙姿態出現喺我隔籬。
「幫我趕走後面班人。」
「收到。」
若兒向後飄去，無幾耐就傳嚟驚嚇嘅尖叫聲。
據說做得多虧心事嘅人會易撞鬼，其實係假；但做得多虧心事嘅人會易驚鬼，反而係真。
因為佢哋驚係俾佢哋害過嘅人報復，又或者遭到鬼神報應。
我趁住呢個機會不停向前奔跑，抱住黑貓逃離呢度。
「喵——喵！」
跑到街角時，黑貓忽然怒喵幾聲，銳利貓爪喺我件皮褸上留低幾條爪痕。
「我件褸——」
眨個眼，黑貓喺我手上憑空消失咗。
我停低原地，冷靜觀察眼前條路。
量子力學雖然解釋過瞬間轉移嘅理論，但以生物嘅精密度嚟講係件幾乎無可能達成嘅事。
但如果只係「憑空消失」，係有方法做到。
嗖——
我即刻向前撲上去，但黑貓快我一步走甩咗。
黑貓其實無真正憑空消失，佢只不過係用變化術去令自己隱形，依然喺呢條街道上。
我透過風聲同腳步聲鎖定黑貓位置，不停咁追住佢。
直到去漆黑一片嘅後巷盡頭，眼前空無一物，只剩一片寂靜。
「我知你喺度。」我向前三面牆緩緩咁講，「你搲爛我件褸我唔會同你計較，但你應該知道你有件事要做。」
依然係無半點聲音。
「你要為張伯件事負責任。」
黑貓並無出嚟。
我從皮褸裡袋拔出銀刀。
「如果你唔出嚟嘅話，我就喺呢度強行驅散你。」
霎霎風聲吹過，黑夜之間映出兩道光芒——
嗖—！