消失的五年: 《五十三》完結篇

當救護車消失視線嗰陣，我忽然記起一樣好重要嘅嘢 …… Michael！ 


「阿sir，貨櫃入面個細佬點啊？」我好緊張咁問身邊嘅警察 


「個細佬無生命危險，救出嚟嗰陣仍然清醒，係有啲脱水情況，救護員檢查完，已經送咗去醫院，你可以放心！」 


「咁就好喇！」我如釋重負咁呼咗口氣 






警察為我扣上手扣後，一步一步咁離開貨倉，企喺貨倉門外等待救護車，抬頭一望，望住天空上嘅藍天白雲，一切一切都喺時候結束！ 


忽然間，有人大嗌 


「老表，呢邊啊！」 






我望向封鎖區外嗰邊，有個人不斷揮手，嗰個就係我表弟 -- 許俊洋 ，喺佢隔離仲有一個人，我嘅恩人 -- 鬍鬚佬！ 


「阿sir，救護車未到，我可唔可以過去傾兩句？」 


「唔 …… 兩句好喇，唔係上司炸型！」 






「唔該你！」 


我同個警察慢慢行去表弟嗰邊，見到佢地兩個，嗰份喜悅嘅情感即時湧上嚟，差啲忍唔住流出眼淚，捽捽個鼻，就講


「老表，鬍鬚佬，估唔到我竟然仲有命見番你地，真係唔知點去報答你地！」 


「屌，兩老表講呢啲，咩都係假，無你用苦肉計套到個人渣講阿 Michael 喺度，邊有咁順利啊！係呢，個傷口點啊？」許俊洋指指我傷口 


「應該唔太嚴重，我之前已經預計好晒個位置，呢個位應該唔會殘廢啩，哈哈哈！」我笑笑口咁答 






「仲識講笑即係無嘢啦！你都唔知啊，我同鬍鬚佬喺出面睇直播，幾鬼緊張，你身上面個鏡頭移嚟移去，好似拍戲咁，我地幾驚你有事啊！」許俊洋手舞足蹈咁講 


「鬍鬚佬，真係要再次多謝你，如果唔係有你部微型攝影機，我兩父子已經去咗賣 "咸鴨蛋"，依家仲還我一個清白，計落我又爭多你一個人情！」我一面誠懇咁講 


「唔好講呢啲住，救護車到喇，快啲去醫院檢查咗先！」鬍鬚佬指一指架救護車，就話 


「好，但我開始腳軟，可唔可以扶一扶我！」我摸摸大腿 


「哈哈哈哈 ……」 






就係咁，件事暫時告一段落！ 


三個月後，2014年5月28日


今日係我再次重返自己崗位嘅第一日，望住手上面呢套制服，白衫藍褲橙風褸，一切都好似發咗場夢咁，但夢醒過後，郤帶嚟無窮無盡嘅傷感 …… 


感覺雖然只係三個幾月，但實際已經過咗五年有多，工作上嘅人事同技巧都唔同晒，新舊戰友，各式各樣嘅新工具，真係需要花少少時間去適應，我估應該唔大問題！ 


講番件事，見我番得工，即係代表無事啦！殺人、襲警、潛逃 …… ，雖然有好多對我不利嘅證據，但係好好彩，嗰日响貨倉度搵到好多關於呢件事嘅證據，當中有本簿記載咗莫心藍早喺二零零九年一月，即係莫心蕙昏迷成為植物人開始，就已經計劃呢個五年嘅殺人行動，其中一頁好古怪，畫咗好多數字同日期，九五年，五月，五日，五個人，五、五、五、五 …… ，估計就係咁取決個五字，而要我失蹤五年！ 






另外，警方仲响貨倉嘅暗格度，發現咗一堆藥物，經化驗後，證實係一啲危險性極高嘅藥物，醫生指出長期注射會令人陷入昏迷狀態同產生大量幻覺 …… 


講完我，就講吓件事嘅主腦莫心藍，心臟停頓，導致一段時間腦部缺氧，雖然經搶救後醒番，但係個人就變得瘋瘋癲癲，口齒不清，成日自言自語，法庭最終根據貨倉搵到嘅證物同嗰日所拍攝到嘅影片，判處佢終身監禁，要响精神病院渡過餘生！ 


至於我個仔 Michael，佢大個咗好多，消失咗五年，兩父子突然間再見番面，初初都有啲隔膜，不過，我相信時間可以改變一切，依家我一放假都會盡量陪多啲佢，彌補番失去咗嘅光陰！ 


最後我要講吓我太太 …… 蔣家怡，我 …… 到咗呢一刻，仍然唔能夠相信佢已經離開我，我嘗試拎啲骨灰去驗，好奇怪得出嚟嘅結果，竟然話呢啲並唔係屬於人類嘅骨灰，我知道之後，即刻去精神病院搵莫心藍，隔住房門望入去，只見佢瑟縮一角，自言自語，無論我點提問，佢都毫無反應 …… ，我亦試過聯絡加拿大嗰邊，佢地話家怡同 Michael 响車禍之後嘅第二日，無故喺醫院失蹤，而 Michael 淨係知道醒番已經比人矇住雙眼，關咗喺一個地方，無再見過媽咪 ….… 


雖然呢個唔算係好消息，但係起碼仲有一絲希望，一個可以一家團聚嘅機會，無論機會率有幾細都好，至少我 · 相 · 信！！






-- 全文完 --