消失的五年: 《五十》

呼天搶地嘅叫聲充滿整個貨倉，我緊緊抱住個骨灰盅，完全唔能夠接受呢個事實，不停問自己，點解會咁，點解！！！ 


自從响隧道醒番之後，令我可以一直撑落去嘅原因，係我深信會有重遇嘅一日，就算只係有一絲嘅希望，我都無諗過放棄，但係 …… 依家 …… 一切一切都成為泡影 …… 


「啊啊啊 …… 點解 …… 嗚嗚 …… 點解你要咁做，莫心藍！我老婆同個仔係無辜㗎，點解？點解 …… 啊啊啊啊 ……！！」我聲嘶力竭咁大嗌 


「噢、噢、噢 ….… 點解？意外囉，你知㗎，交通意外吖嘛！頭先你咪好大義凜然咁講，話意外嘅嘢無人想嘅，依家嘅心情點啊？我就係要等你知道呢種心情，知道我點解要咁做 …… 哈哈哈！」莫心藍一面滿意嘅表情 






歪理，歪理 …… 吔 ~~~ 我輕輕放低個骨灰盅，連隨伸手入袋，攞起支槍指向莫心藍！ 


莫心藍完全唔當一回事，繼續笑笑口咁講 


「哎吔，開鎗呀？好啊，爸B，射呢度，對準啲喎！」 






啊啊啊啊啊啊 …… 


郭健東，冷靜啊，幾嬲都好，都要冷靜，Michael 仲响個人渣手上面，你已經失去咗家怡，唔可以連 Michael 都無埋！ 


為咗 Michael，家怡 ……，我 …… 我好唔情願下放低支槍，抑壓住傷痛，咬牙切齒咁講 






「你個人渣究竟想點？究竟你要點樣先放過我個仔？」 


「我想點啊？唔 …… 啊係，我之前咪同你講過你有個任務嘅，時候到喇，跟我過嚟！」 


莫心藍講完之後，就轉身行去貨倉嘅較後位置，而我亦只好緊隨其後，行到最入，右手邊有間房，感覺同頭先投射所播放嘅畫面有啲相似，房入面放咗一堆醫療儀器同張床，行前一睇，床上面瞓住嘅 …… 就係 …… 


「莫心蕙 ……」


睇真啲，雖然儀器上顯示莫心蕙仲有心跳，但呢刻嘅佢，完完全全依賴呼吸機嘅幫助，呼吸淺而弱，雙眼張開，目光空洞，毫無反應，已經同植物人無分別 ……






「哈哈哈 …… 郭健東，依家比個機會你贖罪，唔單止唔殺你，仲放埋你個仔！」莫心藍拍手叫囂


「講！」


「好簡單，嗱 ~ 依家你老婆都死咗喇，而我家姐又單身喎，咁啦，話晒都係因為你我家姐先攪成咁，嗱嗱臨攞番一早預備好嘅戒指出嚟，然後向我家姐求婚，答應照顧佢一生一世，到時你個仔咪我姨甥，我唔單止放佢，仲錫晒佢添，你話係咪兩全其美呢？」莫心藍一面認真


「莫心藍，你黐夠未啊！你家姐已經係植物人喇，就算唔係，我都唔會娶佢，我一生一世只會愛我老婆一個！」我斬釘截鐵咁答


「郭 …… 健 …… 東，你諗撚清楚先好答我啊！」我嘅答案觸及莫心藍嘅神經






「莫心藍，我真係覺得你好可憐，十九年喇，相隔十九年，你個心淨係諗住點報仇，你唔覺得好可悲咩？依家已經害死咗咁多人，點解到咗呢刻你仲唔醒覺，連一個細路都唔放過，吓！！！」


「醒覺？哈哈哈 …… 一陣殺埋你倆父子，我咪醒覺囉！哈哈哈」莫心藍抱腹大笑咁講


「你憎我啫，可唔可以放過我個仔，一命換一命！」


「嘩！好偉大，好感動啊！好爸爸，好，我大發慈悲做番次善事，成件事都怪你多口所致，你吞槍自殺吖，我就放番你個仔，哈哈！」莫心藍指住我手上支槍，就講


「好，你講得出要做得到！」我諗都唔諗就答






「我份人最講口齒，快啲、快啲，我好心急等你表演啊！」莫心藍好興奮咁嗌


我隨即舉起支槍，將槍嘴對準左邊膊頭下少少，一拉


「呯 ~」