消失的五年: 《四十一》

將鎖匙插入，順時針一扭，「咔」一聲，鎖終於開咗，攞起鎖頭，門徐徐打開，用電話一照，入面有個公文袋，又係公文袋，上次一攞起無耐就爆炸，今次 ….… 唔會又有咩古怪呀？ 


我好小心咁攞起個袋，攞上手，個袋有一定重量，以防萬一，再用電話照清楚，肯定個櫃無嘢，就將公文袋放入袋！ 


望向天，天漸光，都係先離開呢度為上策，由後梯行番落地下，穿過鐵絲網， 跨過欄杆，番到曉明街！ 


時間 : 05:57 






落到商場，過對面馬路，急不及待衝入麥記，是旦搵過角位坐低，隨即攞出個公文袋，打開一睇， 


嘩嘩嘩嘩嘩嘩嘩嘩 ~ 


屌佢老味吖，嚇撚到我即時摺埋個公文袋，放番入袋，條仆街真係黐撚線㗎，要我千辛萬苦潛入學校，竟然要我去搵支 …… 槍！ 






雖然我未證實支槍係真定假，但以條仆街嘅性格，我好有信心支炮係真嘅 …… 


忽然有支槍喺身，周身唔聚財咁，起身，行去廁所，再次將支槍攞出嚟，我唔識分支嘢真同假，但見個彈夾入面上滿子彈，咁都唔駛咩專家檢驗喇啩！ 


我好小心咁放好支槍，摸摸個袋，原來公文袋入面仲有啲嘢，攞出嚟睇，係一個棗紅色嘅圓形盒，一打開，入面放咗一對戒指，一大一小，又槍又戒指，九唔撚答八，究竟條仆街想玩邊科啊？ 






倒轉個公文袋，有張紙仔跌咗响地，我彎彎腰執起，張紙上面寫咗一堆奇怪嘅嘢 


" D5M51YY5 


  D = M = Y - Y，AB = Y + Y，A + B = Y " 


呢堆嘢又係咩意思？


代數 ……，又A又B，又D又M又Y ……，想點啊？D5M51YY5，呢個組合喺邊度見過咁，好似 …… ，但一時間又諗唔起！ 






起初以為用到條細鎖匙，就知道點做，點知依家反而更亂，不過點都好，一定要盡快解決呢堆代數！ 


行番出去坐，原本已經唔夠瞓，望住呢堆嘢，眼都花埋，會考數學揸 "槍"，呢堆數字真係有啲考起我！ 


但睇清楚又唔算好難，首先，D = M = Y - Y，我唔知 Y 係咩，但咩數減咩數，答案都一定係零，D 同 M 自然係 0，所以解到 Y，就可以知晒呢組數字！ 


只要花少少時間，將 1 ~ 9 逐個代入，就知答案！ 


攞起支筆，响公文袋上面不停咁畫，由 1 試到 8，可惜都唔啱，最後到 9， 






Y (9) + Y (9) = A (1) B (8)， 


A (1) + B (8) = Y (9)， 


Y (9) - Y (9) = 0， 


答案 Y 就係 9！！ 


D5M51YY5 代入啲數字之後變為 05051995，05051995 …… 05 …… 05 …… 1995， 我終於明白點解 D5M51YY5 好似咁熟，因為 Y、 M 、D 分別代表 (Year) 年、(Month) 月、(Day) 日，咁 …… 即係一九九五年五月五日，亦係我地六個人畢業嗰年！ 






解開咗代數，隨之而嚟嘅問題就係呢日究竟發生過咩事？