消失的五年: 《三十五》

短短幾個鐘，一斌已經預備好今次行動所需嘅嘢，借咗架輕型客貨車，同攞咗一啲工具，唔知係咪同讀過理科有關，效率非常之高！ 


坐上車，大家心情都有啲緊張，佢重新講多次計劃嘅內容比我聽，每一點都唔可以出錯，必須一擊即中！ 


時間 : 23:55 


照情況嚟睇，如果無乜變數，預計俊龍會喺點零鐘左右出現，一切準備就緒，依家只係等待目標嘅出現！ 






仲有個零鐘時間，我隨便問下一斌嘅近況，佢就略略講下响速遞公司度做個主管，人工唔錯，仲未結婚，但有一個拍咗幾年拖嘅女友，原來佢女友都係我地舊同學嚟，我緊係八下個女仔叫咩名，佢就講 


「莫心蕙」 


我對呢個名有少少印象，好似中二定中三試個同一班，樣貌就唔太記得，如果無記錯，中五嗰年應該係同志豪一班！ 






傾到咁上下，一斌突然用手踭撞一撞我，我望一望，見到遠處有個男人，拉住個手提箱，當佢再行近幾步，我就清楚肯定，眼前呢個男人就係 


談 · 俊 · 龍！ 


凌晨一點半，街上面人影都唔多個，正正係我地落手嘅好機會，我同一斌各自帶上口罩，一斌遞咗把刀比我，無錯，係把刀，到咗呢刻，都唔係考慮啲咩嘅時間！ 






一開門，我低著頭，刀放背後，一步一步行近俊龍，內心不停問自己， 


我究竟喺度做緊乜？ 


响俊龍仲有幾步就踏入大閘，我迅速行到佢背後，右手搭住佢膊頭，左手將刀尖輕貼佢腰間，就講 


「你條仆街咪撚郁啊，一郁你就玩完，哈哈，估唔到我會搵到呢度哩，咪整古做怪，唔好出聲同我行！」 


「大 …… 佬，有事慢慢講吖，你都係想要錢啫？我可以比晒身上面啲錢你！」俊龍口震震咁講 






「錢？哈哈，你玩鳩我呀！我要咩你又點會唔知，快啲講我老婆同個仔喺邊？」我把刀輕輕力篤落佢條腰度 


「大 …… 佬呀！我點會知你 …… 老婆同個仔喺邊啊？你係咪點錯相啊！」俊龍塊面白晒，一面想喊咁樣 


「仲玩嘢！好，上車，一陣先慢慢同你玩！」 


我拉開度門，推咗俊龍上車，一斌即時用塊布住佢口鼻，俊龍掙扎咗幾下，就昏迷不醒 ……


確定俊龍暈咗，我同一斌就行番上車頭，坐低之後，一斌叫我將把刀交比佢，用毛巾包住，好好收埋，我就問 






「依家點做好？」 


「我一早安排好晒，去到你就知！」一斌笑笑口同我講 


雖然已經捉到俊龍，理應開心至啱，但係 …… 我有種不祥嘅預感 …… 


一斌將架車駛到鴻圖道，停咗喺一間公司門口，跟住佢帶上手套同帽，然後落車，小心翼翼將鐵閘推向上，再番上車，快速倒車入裡面！ 


拉番鐵閘，關好，我落車一睇，呢度係一間擺咗好多紙皮箱嘅速遞公司，一盒二盒放晒兩邊，一斌吹咗下口哨，打開車門，我地就合力將俊龍抬上張櫈度，用繩紥穩，膠紙封口，再幫佢帶上眼罩。 






一斌行番上車度，攞咗隻CD，插入櫃檯上面部 Hi-Fi，按 Play，音樂隨即響起，係隻鋼琴純音樂！ 


呢個環境，襯托呢啲音樂，比人一種毛骨悚然嘅感覺，但係 …… 望見一斌異常興奮，手舞足蹈咁，响車尾攞出一件又一件工具，然後拉我過去，逐件工具遞比我，棒球棍、刀、士巴拿、鐵筆 ….… ，之後，一斌整整齊齊咁放响枱面，一絲不掛，成個藝術家咁！