消失的五年: 《三十一》

時間 : 09:17 


離開嘉賓大廈幾個鐘，行咗去永安前面嗰間麥記坐低，啲麻醉藥未散晒，個人仲迷迷地，一日之間，死咗兩個舊同學，雖然唔算好熟，但點講都係因我而死，見慣大場會嘅我，個心仍然嗱住嗱住，無法平靜落嚟 …… 


點都好，內疚又可以點，依家所有嘢都無得番轉頭，條路仍然要行落去，既然身上已經冇咗追蹤偷聲器，就可以放心去行每一步。 


突然間冇咗我嘅行蹤，條仆街有可能會向我屋企人埋手，所以我啱啱打咗比家姐，叫佢唔好問點解，暫時去灣仔度住住先，家姐見我咁緊張，都無問點解照做！ 






安頓好屋企人，係時候搵淨低嗰兩個人，談俊龍同范一斌，九點零鐘，一大清早打比個好耐無搵嘅人，就算比人屌，都要咁做，我真係唔想再有人死傷，點知 …… 飛咗落留言信箱，段留言講話俊龍呢幾日帶團離港，要十三號先番，即係聽日，既然係咁，唯有聽日再聯絡佢！ 


呢刻可以做嘅，就係搵范一斌，但係 …… 十九幾年無聯絡，仲要完全唔熟，真係唔知點開口，同佢熟嘅俊龍又未番，但遲一日嘅話，唔知又會有咩變化。 


Michael 危在旦夕，根本無得揀，既然志豪有佢電話號碼，應該有聯絡過，唯今之計，照板再試，用志豪電話打比一斌，電話一通，我就話 






「唔該，范一斌吖！」 


「噢 …… 點啊，豪哥，咁早啊！」一斌就講


「咳咳，唔好意思咁早打擾你，十萬火急，有啲好重要嘅嘢想當面同你傾，咳咳！」我又扮咳咁壓低把聲 






「有咩咁緊要啊？要咁早傾？唔 …… 橫掂今日放假，時間、地點？」一斌諗一諗就話 


「十點半，旺角荷里活中心二樓稻香，先到先搵位！」 


「收到，一陣見！」 


距離十點半仲有一粒鐘，攞起旁邊份生果日報，一睇，內文入面有報導志豪跳樓一事，篇幅唔太多，都係懷疑工作唔順利，所以輕生，黐撚線，咁都得。 


至於 …… 嘉賓嗰單車禍，可晴最終都如我所預計離開咗，呢單意外做成兩死十一人受傷，報導話司機因為突發性心臟病，導致呢次意外，送到醫院後不治，兩單新聞看似毫無關係咁 …… 






時間 : 10:40 


我比預計時間遲咗十分鐘先到，上到去，打比一斌，佢已經到咗，枱號四十五，我慢慢行埋去，眼前呢個男人就係范一斌，瘦身材，帶住副黑色膠眼鏡，斯斯文文，同我印象中差唔多！ 


拉開張櫈，我就坐低，佢比我呢個舉動嚇一嚇，然後就講 


「先生，唔好意思，個位有人！」 


「我知，我就係約你嘅藍志豪！」我笑笑口咁話