消失的五年: 《二十九》

行過馬路，企响裕華國貨對出，前面就係嘉賓商業大廈，離遠已經見到可晴低頭玩緊手機，我一步一步咁行，仲差幾步距離，就喺呢個時間，一道黃光直射埋嚟，一秒過後，望清楚，原來係一架輕型貨車嘅大燈，唔知咩原因，嗰架貨車失控咁剷上行人路，尖叫聲此起彼落，眼見幾個途人被車撞到，但架車衝勢未止，「嘭」一聲撞落嘉賓大廈嗰鐵閘度！ 


點解 …… 會咁㗎？ 


我完全唔能夠相信眼前嘅畫面，慘叫聲不絕，猶如人間煉獄，一下子，大批途人倒地，碎片散落滿地，較輕傷嘅，正自行爬番起身，不幸嘅，有人卷入車底，奄奄一息，有人被撞到瞓咗喺地，舉手求救，最嚴重一個被夾响車頭與大閘之間，不斷掙扎！ 


咁近距離發生交通意外，發呆一秒，就衝去車頭，望見司機不省人事趴响軚盤，摸一摸佢條頸，仲有呼吸脈搏，既然現場無即時危險，唔移動佢為上策！ 






轉身望向車頭，鮮血淋漓，再望清楚，被夾嘅傷者竟然係 …… 鍾可晴，呢一刻，我真係唔知可以點做，衝力太大，可晴完完全全夾响當中，動彈不得，口吐鮮血，我望住可晴，佢用盡最後力氣不斷掙扎，可惜，我根本幫唔到手 …… ，見佢危在旦夕，但有個問題一定要問，行去佢身邊，表明身份！ 


「可晴，我係郭健東啊，快啲講比我聽邊個係老朋友啊？」 


「啊 …… 救 …… 我啊，我 …… 我唔想死 …… 啊！」 






「講啊，邊個係老朋友啊？」 


「啊 …… 啊 …… 嗚嗚 …… 我 …… 都唔知你 …… 講乜 …… ，救 …… 我，救我 …… 啊 …… 」 


講完之後，可晴就失去知覺，我伸手一摸，仍然有好微弱脈搏，但情況 …… 唔樂觀！ 






呢個時間，圍觀嘅人越嚟越多，警察同救護車亦都好快到場，於是我慢慢離開現場，咁嘅情形，我已經無可能由正門入去大廈！ 


忽然，响人群之中，我見到一個熟悉嘅面孔，佢向我打一打眼色，就行咗去大廈側邊嘅後門，一開，我地就從後樓梯行上七樓，門一推，見佢好熟路咁行，好快就停咗响一度玻璃門嘅前面！ 


咇、咇、咇、咇 


「喳」一聲就打開，我地就咗行入裏面，一睇，呢度應該係一間診所，而我眼前嘅人就係 …… 鬍鬚佬！