消失的五年: 《十一》

咁夜好少人會㩒門鐘，我即時去窗邊偷望，發現出面多咗兩架警車，好明顯係衝著我而嚟，輝叔見到就叫我走去 A129 號車上面，關好尾門同側門，其他嘢佢攪掂。


我點點頭就跑落車房，走上 A129，關好門，靜靜咁哩埋响車廂。 


隔咗一陣，我就聽到有好多人响車外面，仲有把男人聲大嗌搜查一下，同一時間，就響起廣播 


「緊急救護服務，救護站去 A129 號救護車，天耀邨耀盛樓 3342 室，情況：有人昏迷 …… 」 






跟住聽到輝叔好緊張咁話 


「嘩，咁大劑呀，阿sir，有人昏迷，唔同你講住，我留個0靚仔帶你周圍搵，我去車先，阿民，你留响度幫啲阿 sir，有咩打比我！」 


輝叔講完就上咗車，司機隨即响行警號，火速離開救護站！ 






當架車行到天影路近天恩邨果陣，輝叔突然叫司機停車打死火燈，跟住就行入車廂，開著燈，就講 


「阿東，輝叔無乜可以幫到你，你快啲離開天水圍，有乜嘢就打比我！」輝叔一邊講，一邊除低制服 


「輝叔，你唔駛理我喎，救人要緊！」我好緊張咁講 






「救人緊係緊要啦，但呢轉係我開門比警察之前打嘅流call，無病人㗎，你睇你，自己咁嘅處境就掛住幫人，我真係無睇錯人，你一定唔可能殺人！」輝叔向我報以微笑 


「咪臭係，東哥，我同成班兄弟都相信你㗎！」 


我向司機位望過去，講呢番說話嘅就係龍仔


「龍仔，大個仔咗喎，結咗婚未先？」 


「上年結咗，好可惜你 ……」龍仔帶點失望咁答 






「恭喜你喎，啲衰嘢唔好講，有機會再同你砍過！」我就笑笑口咁講 


「好！」 


「嗱，攞住佢！」輝叔將身上套制度遞比我 


「做乜啊，輝叔」我好驚訝咁問 


「著住套制度，揸埋架車走，咁樣方便啲，記住有咩幫手call我吖！」輝叔拍拍我就講 






「點得㗎，你已經幫咗我好多㗎喇！」我一時間都唔知點反應 


「唔駛驚喎，我仲有個零月就食糧，怕條撚呀！」輝叔戚戚眉咁講 


「好多 …… 謝你啊，輝叔」我強忍眼淚，上前攬一攬佢


「儍仔嚟㗎，萬事小心」輝叔講完，就同龍仔一齊落咗車 


我著上制服，行到司機位，就開車離開，望住倒後鏡，佢地嘅影像越嚟越細，好快就响鏡裡面消失 …… 






再見喇，輝叔，保重！