消失的五年: 《九》

依家我同警車只有三米距離，雙方已經有眼神接觸，我笑笑口講 


「師傅，忙唔忙吖？」 


「今晚就堅囉，頌富嗰邊立立亂，你啲伙記都未停過！」車頭嗰個警察就探頭出窗講 


「嘩 ~ 咁慘呀，好在唔係番夜啫！」我一邊講，一邊嘗試推開大閘 






仆街，鎖住咗，做乜今晚咁早上鎖，玩嘢呀，個密碼係咩呢？五年時間，仲係咪嗰個密碼呢？ 


我手震震咁㩒 1，2，8，9，0，我保你大啊，如果唔啱就瀨嘢㗎喇，跟住按開關制， 


「嚓」一聲 






開咗，呼 ~ 感謝主 ~ 我回頭同嗰警察講句再見之後，就扮成若無其事咁行入救護站！ 


望住個車房，感覺同頭先一樣無變，完全唔覺得過咗五年，我知依家唔係懷缅嘅時候，見到間局去晒車無人，於是行入藥物倉，攞啲消毒用品同膠布，靜靜咁行上寫字樓！ 


從下面望上去，黑媽媽，肯定無人，入到去，果然空無一人，呢度比較安全，咁夜就算有人番局，都好少上寫字樓，望住牆上塊鏡清洗傷口，我終於知道點解頭先會覺得自己好陌生，消失的五年，人隨之然老咗，白頭髮都多咗好多 …… 






我坐低攞番個公文袋出嚟，正想打開，突然有人開咗度門，嚇到我成個人彈咗起身，我地互相對望咗一下，佢慢慢關番度門，就行到我身邊，大家都無出聲，我好恭敬咁立正，然後比禮，對方亦好認真咁回禮，然後就對我講 


「好耐無見，阿東！」 


「哈哈，唔係好耐啫，輝叔！」我微微笑咁答