女神回憶錄: 序章 活在回憶裏的女神

「不如我地27歲就結婚囉！」
「好吖！」

— —

「鈴～～鈴～～」我㩒熄喺床邊嘅鬧鐘，用力咁打開嗰對好重好重嘅眼皮，第一樣映入眼簾嘅係放喺我床頭嘅嗰個粉紅色小相架。
入面放住嘅就係嗰個向我提出27歲就要娶佢嘅女仔—小琳同我嘅合照。
好可惜嘅係可能我呢一世都冇可能履行呢一個承諾。
我望住相入面嘅我地，我不禁諗起我同佢之間嘅往事。
如果當初我成熟少少，對佢好少少，我地之間嘅結局又會唔會改變呢？





我叫阿軒，一個好平凡嘅男仔，擁有一個好平凡嘅名，一段好平凡嘅中學生活。
唯一嘅不平凡可能就係喺我嘅中學生涯入面認識咗我呢一生人入面唯一一個女神—小琳。至於佢到底為我帶嚟咗啲咩咁不平凡呢？我諗我能夠有呢段咁青春嘅回憶，對我平凡嘅人生嚟講已經係相當嘅不平凡。
而我同呢位女神之間嘅故事就要追溯到我讀中二嘅時候嘅事啦⋯⋯