《憶海》 自從意外之後，我得到咗超能力: 第二部第十四章

「秋淼呀，我有啲野想同你講呀。」

「係咩呀？神神秘秘咁。」

「我過幾日就要出國參加東亞青年西洋棋國際邀請賽呀，所以有一段時間都見唔到你啦。」

秋淼先是吃了一驚，口中念念有詞不知想說甚麼。

「幾好啵……咁你要去幾耐呀？」





「唔……都要去成半個月㗎。」

「咁耐？難得嘅機會，你要加油呀。」秋淼閃過一絲失望的神情然後便鼓勵著我說。

我想大概是因為那麼長的時間不能相見吧。

之後，我們轉向其他的話題，直到吃完午飯後便重新工作。

雖說是工作，但午後店裡的人流也不算多，因此基本上我們也像上午一樣繼續聊天。





過了不知多久，一個老婆婆走進花店。

「秋淼，成年無見又大個女咗啵。」老婆婆慈祥地笑著說。

「老婆婆，你又嚟買花啦。」秋淼看見也走向老婆婆的方向說。

「咦？嗰位係男朋友仔呀？」

「係呀……」突然一問令秋淼害羞起來。





「你好啦老婆婆。」我打招呼道。

「喔呵呵……一表人才啵。」老婆婆笑著說。

「係呢，老婆婆要咩花呀？」秋淼問。

「同上年一樣啦。」

「俾我諗吓先……一朵香檳百合係唔係？」

「係呀，叻女真係好記性。」老婆婆讚賞道。

「等我一陣，我攞俾你。」秋淼說完便走回花海。

「係呢，老婆婆要啲花做咩？」在等待的期間，我好奇地問。





「咪送俾個死鬼伯爺囉，佢生前好鐘意香水百合，咁聽日係佢生忌，咪攞支花去拜佢囉。」老婆婆回應道。

「對唔住……」我察覺到問錯問題便連忙道歉。

「唔使對唔住，都過咗去咁耐，乜都慣晒啦。」老婆婆豁達地說「佢呀，份人好浪漫㗎，追我嗰陣每朝都係我門口擺低一支香水百合，一直送咗九十九支俾我，去到第一百日佢無送俾我，但係當我走落去屋企樓下個陣我見到佢攞住一紮香水百合等我，然後係成條街嘅人面前向我表白⋯⋯」

老婆婆回憶著往事，臉上流露著從心而發的微笑。

「咁點解唔係玫瑰而係香水百合？」我好奇地問。

「呵呵⋯⋯我以前都有問過佢呢個問題，跟住佢話玫瑰太凡俗，只有香水百合先配得上純潔無瑕嘅稱號，佢仲講咗個百合嘅傳說俾我聽。」

「百合嘅傳說？」





「係呀，相傳有一個姑娘陪伴母親住係一個山區裡面，有一日一位大公爵乘馬車路經此地見到姑娘，以為是仙女下凡，立即邀請她一起回城。姑娘執意不肯，但大公爵恃著自己位高權重，拉著姑娘不放，姑娘只好大聲呼叫求救，此時強風一吹，姑娘不見了，公爵手中只留下一株百合花。所以百合花有高貴嘅意思，而香水百合更係百合花中嘅女王。」

「哦⋯⋯原來係咁⋯⋯」原來單單一支百合花也有如此學問。

「所以後生仔你要珍惜眼前人呀，難得搵到個咁好嘅女朋友。」

「講緊咩咁好傾呀？」秋淼此時走過來說「老婆婆你要嘅香檳百合呀。」

「唔該晒你呀秋淼，幾多錢呀？」

「一支四十蚊，下次要再嚟幫襯呀。」

「呵呵呵……當然會啦，拜拜。」

「拜拜老婆婆。」





老婆婆給錢後，也緩步離開。