《憶海》 自從意外之後，我得到咗超能力: 第二部第九章

網上對這套戲普遍都給予正面的評價，不少人都稱之為催淚神作。

如我所料，大概到戲劇中段位置，我隱約聽到旁邊傳來啜泣的聲音。

我轉過頭去看，果然是秋淼正在抽泣。

預先做好資料搜集的我，當然做好準備吧。

我馬上從衣袋中取出一包紙巾，再抽出一張紙巾紳士地遞給秋淼。





秋淼的哭泣聲亦伴隨著電影的結束慢慢停下來。

「傻妹，使唔使喊成咁呀？」走出戲院後我拍著秋淼的頭笑說。

「咁真係好感動呀嘛，你完全無喊過你係咪冷血㗎？」秋淼聲音仍然有點沙啞。

「邊有感動到咁誇張。」

「咁你會唔會好似佢地咁，下一世都仲揀我做你女朋友呀？」秋淼突然提問。





我一下子把她拉到我身前，從後抱著她，從她耳邊說：

「傻妹，你上一世咪問過囉。」

「哼認真啲啦，我好認真問㗎。」秋淼半帶甜笑半帶不服氣地說「如果俾你再揀多次，你有無諗過揀其他女仔做你女朋友？」

「百世修得同船渡，千世修得共枕眠。我可以遇上你，做到你男朋友，實在係千世百世修返嚟嘅福氣，你認為我會改變用咁多時間做返嚟嘅決定咩？」我也很認真地回答秋淼。

「⋯⋯」秋淼十分低聲地說。





「你啱啱講咩話？」她說得太低聲，連我也聽不清。

「無野啦……你睇吓個邊。」秋淼轉移話題說。

我順著秋淼指向的方向抬起頭看，原來是一所服裝店。

秋淼說完後邊衝了過去。

秋淼想買甚麼衣服嗎？我這樣想著便跟了上去。

秋淼雙眼發亮似的看著櫥窗。

「睇中邊條裙呀？」我好奇地問。

「唔係呀，係呢個呀。」秋淼搖搖頭說並向前指著說。





我再一次細看，原來她指著的是在衣服前的瓶中船。

「你睇吓整得幾精緻。」秋淼說。

於是，我便牽著秋淼的手進入店內。

「歡迎光臨！先生小姐隨便睇。」店員看見我們便笑著說。

「唔好意思呀，擺係櫥窗嘅瓶中船可唔可以賣？」我單刀直入地問。

「呃……對唔住呀先生，個啲係店嘅擺設，係非賣品嚟，所以……」店員面有難色地說。

「哦……唔該晒你。」我聽後禮貌地回應便牽著秋淼離開。





「我話整得好靚渣嘛，你使唔使即刻入去問有無得賣啵……」秋淼離開店後問。

「你想要呀嘛，咁咪試吓問囉。」我笑著說。

「乜你咁無心思㗎，咩都淨係諗住買。」

「遲啲我整個送俾你好無？」我捏著秋淼臉蛋問。

「嗱你話㗎。」秋淼笑說。

在商場四處逛了一段時間，也漸漸到傍晚的時間。

由於秋淼顯得也有點累了，我也送她回家後便回家了。