《憶海》 自從意外之後，我得到咗超能力: 第一部第二十八章

「原來插班生嘅新目標係劉焱煒條女呀⋯⋯」

「吓，乜原來佢有女㗎咩，平時都唔多覺，摺到咁⋯⋯」

「有呀有呀，條女好似係低一 form㗎，早排先見到佢地成日係操場一齊溫書⋯⋯」

四周開始響起竊竊私語的聲音。

「我唔係好明你講緊啲咩啵，所以你嚟係做咩？」我不屑地問。





「無咩嘅，只不過成日都聽秋淼提起你，令我想拜會吓真人姐。」他笑說。

秋淼經常提起我？不知她說我甚麼呢？

「哦，咁而家你拜會完啦嘛。請回。」

「未住，其實我嚟仲想提出一個方案。」

「為左令我無咁有罪疚感，不如我地比試一場，你輸左請你放棄秋淼。」未等我問他已經繼續說。





「唔需要有罪疚感，完全唔關我事，你想追咪追飽佢。」我輕描淡寫地說。

嘿，我從心底裡是想這樣說的。

「哦，係咩？你等一陣。」聽著他囂張的語氣，我再一次站起來。

然後我走向人群中一個人。

「馬會強，社籃邊個社賠率最高邊個社最低？」





馬會強，顧名思義就像馬會一樣，在學校裡開盤供校內所有人投注，投注的事項千變萬化，可以是比賽結果，可以是某人表白是否成功，可以是更千奇百怪的東西。

「吓，呃……最高嘅係黃社，1賠3.5，最低嘅係紫社，1賠0.5。你問嚟做咩？」

我沒有回答他，便逕自走回座位。

「以免你輸左係度賴，我地用你最擅長嘅野嚟比試。」我繼續說「我地用社籃分勝負，你輸左唔該唔好再煩我同秋淼。」

話音未落，四周的騷動再次出現。

「唔係呱，睇佢個樣都唔做運動，點樣同人地打呀，個插班生係出面比賽差唔多場場都係mvp⋯⋯」

「條友肯定傻咗，黃社點樣贏紫社呀，成隊都唔識打波，等睇佢柒啦，到時輸咗條女唔好喊呀⋯⋯」

「嗱，說話又唔係咁講啦，今次我撐佢喎，個插班生成日換畫都算，今次搶人條女不突止仲要走上嚟串串貢咁，俾人踩到上心口仲忍就唔係男人啦⋯⋯」





「你又知真係佢條女，話唔定人地兵嚟㗎喳⋯⋯等睇好戲啦⋯⋯」

「你認真？！」插班生用驚訝的語氣看著我，但看了我堅定的眼神便說「好好，你想拱手相讓俾我我梗係歡迎，費事俾人話我強隊恰弱隊唔公平，我地只用個人得分分勝負。」

「前提當然係你出到賽。」他用帶點恥笑的語氣說。